अर्जुनाचा झाड

अर्जुनाचा झाडाचे महत्त्व

अर्जुनाच्या आंगार आशिल्ले धवसर सालीक लागून हें झाड आमचें लक्ष ओडून घेता. अर्जुनाच्या झाडाचीं पानां कात्रे आशिल्लीं जाल्यार फुलांचो रंग धवसो आनी हळडु वो असता. ह्या झाडाची साल वखदी आनी भोवच गुणकारी आसून काळजाच्या दूयेंसाखातीर हें झाड खूब महत्त्वाचें. आयुर्वेदांत ह्या झाडाचो वापर काळजाच्या दूयेंसाखातीर मुखेलपणान करतातः

अर्जुनाच्या सालीचो उपयोग

कुडींतलो पित दोश इबाडून जावंपी काळजाच्या दुयेंसांत तशेंच काळजाची क्रिया सुदारपा खातीर अर्जुनाचो सालीचो चूर्ण गांवठी तुपांत शिजोवन तातूंत साकर घालून पियेवपाक दितात. अशे केल्यार मांसपेशीचे बळ वाडटा आनी काळजाचें पोशण बरे तरेन जाता. कांय फावटी काळजाच्या दुयेंसा वेळार काळजाक सूज येता. त्या वेळार लेगीत अर्जुनाचो चूर्ण घालून शिकयल्लें तूप दिल्यार गूण मेळटा. कोणाचोय रक्तदाब (Blood pressure) उणावत जाल्यार तशेंच ह्रदयाचो आकार विकृतपणान वाडल्यार अर्जुन सिद्ध तूप वा अर्जुन घालून शिकयल्लें दूदाचो बरोच फायदो जाता. बिकांतल्यान रगत पडटा आनी बरोच त्रास जाता आसत जाल्यार अर्जुन चूर्ण घालून शिकयल्लें दूद वा उदक थंड जातकच घेवचें.(T. B) सारकें दुयेंस आसल्यार दुयेंतीक परत परत खोंकली येता आनी हड्डड्यांत भितर दुखता जाल्यार दुदांत अर्जुनाचो चूर्ण शिजोवन साकरी वांगडा दिवचे. ते भायर अर्जुनाचो चूर्ण अडुळश्याच्या पानांच्या रोसा वांगडा साकर घालून दिवचो. एखाद्या मनशाची चरबी वाडिल्ली आसल्यार अर्जुनाचे सालीचो चूर्ण सारक्या प्रमाणांत पोटांत घेवचो.

अर्जुनाची साल

प्रमाणा भायर वापर केल्यार ताचे वायट परिणामूय जातात. दुखापत जावन सूज वा दुख आयल्यार वा घावो जाल्यार त्या भागार अर्जुनाचे सालीचो रोस काडून वा सालीचो चूर्ण लावचो. घावो पेकपाक मजत जाता. हाता-पांयाचीं हाडां मोडल्यार अर्जुनाची ताजी साल बारीक वांटून मोडिल्लया जाग्यार लावची आनी अर्जुनाचो चूर्ण पोटांत घेवचो. ह्या लेपान हाडां जुळून येवपाक मजत जाता. पयलींच्या काळार अर्जुनाचे सालीचो उपेग हांडां जोडपाक करताले. गांवगिऱ्या वाठारांत कांय कडेन अजुनूय हो प्रयोग केल्लो दिश्टी पडटा. एखादे बायलेचो गर्भाशय सैल जाल्यार तशेंच तांबडें वा धवें आंगार वता आसता जाल्यार अर्जुनाचो चूर्ण उदका वांगडा घेवचो. अर्जुनाच्या झाडा पसून तयार केल्लें ‘अर्जुनारिष्ट’ हें पातळ वखद बाजारांत सहजतायेन मेळिल्ल्यान वेल्या कांय दुयेंसां खातीर ताचो उपेग करूं येता.