कॉनस्ती मास्कारेन्हस

कॉनस्ती मास्कारेन्हस हो एक तियात्र कलाकार.

जल्म बदल

कॉनस्तांतीनो मास्कारेन्हस, माचयेर ताचें नांव कॉनस्ती मास्कारेन्हस म्हूण गाजलां. ताचो जल्म 23 एप्रील, 1942 वर्सा गोंयातल्या फोंड्यां शारांत जालो. रोजा मारिया फेर्नांडीस आनी जुझेमास्कारेन्हस हे ताचे आवय बापूय.ताच्या आवय-बापायक जलमल्ल्या 8 चलयां आनी 2 चल्या मजगती तो सगल्यांत निमाणो चलो. ताचो बापूय दर्जी म्हूण मुंबई शारांत वेवसाय करतालो आनी ताची आवय अडेचीं कामां करुन एद्या व्हड घराब्याक पोसताली.

शिक्षण बदल

ताणें पुर्तुगेज भाशेंत शेगुंद ग्रांव मेरेनचे शिकप इस्कोला प्रिमार्यान केला आनी गोंय मुक्त जाल्या उपरांत पाचवी येत्ते मेरेन इंग्लिशींतल्यान शिकप ताणें आल्मेदा हाय स्कूल फोंड्या ह्या शाळेंत केलें. त्या काळांत सातवी मेरेन शिकप म्हळ्यार एस. एस. सी पुराय करपा इतलें समजताले.तो एक परजळीत हुशार विद्यार्थी आसलो पूण अर्थीक लाचारपणाक लागून फुडलें शिकप बंद करचें पडलें.

ताचो वावर आनी अभिनय कलेक सुरवात बदल

साडे तीन वर्साचो आसतना कॉनस्तीच्याआंगांत गायन, नाटकां बरोवप, कांतारां रचप आनी अभिनय करप हे गूण आसले. ताणें मराठी नाटकां पळोवन आनी ते उपरांत मुंबई वरिश्ट तियात्र कलाकारांक जशें जे. पी. सौजालीन, सौजा फॅरांव, यंग मिनेजीस, सी आल्वारीस, सीसिलया माशाडो, प्रेम कुमार, आंतोनी दे सा आदीपळोवन आपले अभिनय कलेक धार काडपाचें काम केलें. त्याच तरेन सेंट ऐन चर्च फोंड्या ह्या इगर्जींतलो पाद्रविगार फा. आंतोनियो ताका दोतोन आनी तशेंच धर्मीक तुस्तगीतां, शांतीपाठ आदी शिकयतालो आनी त्या इगर्जेचो मिस्री मिगेंल वायलीन वाजयतालो. उपरांत फा. आंद्रेद आनी ताचे फाटोफाट फा. पाश्कॉल लोबो आनी नवो मिस्रीबापतीस्त हाचे कडल्यान वायलीन, सरगम बरोवप,मधुर आवाजाचे स्वर वाचूक आनी बरोवक तशेंच आपले स्वता धून निर्माण करुंक तो शिकलो. शाळेंतल्यासंमेलनान अभिनय करपांत तशेंच गायन करपांत तो सदांच वांटो घेतालो. तो सांत एना,फोंड्यां ह्या इगर्जेतलो पयलोच कॉयरमास्तर आशिल्लो. त्या भायर ताणें जायते तियात्र बरयले “बदलो रगताचो” (1962) नातालांची परब आनी जेजू क्रिस्ताचो जल्म (1965) जो ताणें सेंट मेरी हाय स्कूल फोंडें ह्या शाळेंतल्या भुरग्यांक शिकयलो आनी माचयेर हाडलो. ‘तुकांच लागून’ (1966) एन.एस.बी(1967) दुबाव-1 (1968) दुबाव-2 (1969). कॉनस्ती आपल्या शेजारी वांगडा मेळून जो एक तारवटी आसलो, आनी करुन काळाव नासतना थंयचे थंय काणी आनी कांतोस बरोवन फोंड्यां वाठारांतल्या तरण्याट्याक वांगडा घेवनकार्नीवलाच्या वेळार जमनीवयलो खेळ सादर करतालो. ताणें जायत्या भुरग्यांक अभिनय आनी गायनाचे परिक्षणूय दिलां. कॉनस्तीचो तियात्रा कडेन ओड पळोवन ताच्याव्हडले भयणीन ताच्या मना आड वचून ताका मुंबय व्हेलो. मूंबई शारांत ताणें ग्रेण्ड क्लब ओफ सेंट एन फोंड्यां स्थापीत करुन, ताणें 3 वर्सां वायरमेन्स लायसन्स ऑफ गवरमेंट ऑफ महाराष्ट्रा हो कॉर्स करुन थंय तो सात वर्सा सुमार इसटर्न इंजिन्यरींग कंपनी खातीर वावुरलो आनी टाटा बोम्बे हाउज सेट्रल बॅण्ड अश्या जायत्या आनीक संस्थाचो वावर केलो

माचयेर वेवसायीक मळार भितर सुरवात बदल

माचयेर वेवसायीक मळार भितर सरपाचे ताणें पुराय जिवीतभर पळयले सपन मुंबई शारांत पुराय जालें जेन्ना इनासियो पेरेरा हाणें त्या काळावयल्या म्हान तियात्र बरोवप्याक आनी दिगदर्शकाक प्रेम कुमाराक उतर घातलें. आनी ताणें कॉनस्तीची परिक्षा घेवन ताका आपल्या वावराडी तियात्रांत ओपनिंग कोरस म्हणपाची संदी दिली. हें आयकून कॉनस्तीक तशेंच हेर तियात्र पंगडान आशिल्ले वांगडी अजापीत जालें

कॉनस्तीन ही संद दोनूय हातांनी हातासून घेवन ताणें स्वता तयार केल्ले कांतार म्हणलें ‘ आमी अशेच उरले गोंयकार’ जाका ताका तीन फावटीं “आनको यो” म्हणून आपोवप जालें आनी हाजीर आसलेल्या प्रेक्षकांनी उबो रावन ताचो सन्मान केलो. तशेंच तियात्रीस्त आंतोनी दे सा जो कांतांर म्हणटल्यांक प्रोंमटींग दितालो ताणें कॉनस्ती कडेन ताच्या काताराचें हातबरप मागलेलें, तो लेगीत कॉनस्तीक पळोवन अजाप जालो की ताणें आपलें कांतांर चुकनासतना आनी आत्मविस्वासान प्रोमटींग करीनासतना म्हळें.

गोंयांत परतून आयल्या उपरांत आत्मविस्वासी कॉनस्तीन1970 वर्सा फोंड्यां शारातल्या लोकांक आपल्या पंगडान घेवनआपलो पयलोच तियात्र “न्हय सपन’’माचयेर हाडलो.हो तियात्र ताणें मुंबय शारांत काम करतना बरयल्लो. पदमाश्री एम. बोयराच्या प्रसिद्ध ब्लोक बास्टर‘संवसार सुदरलो’ ह्या तियात्रांत ताणें अभिनय केलो आनी कांतांर म्हणलें जाचें सुमार 25 दाखवण्यो जाल्यो. वेगवेगळ्या दिगदर्शकांचे हेर तियात्रांनी जातूंतकॉनस्तीन अभिनय आनी कांतांरा केल्यात ते अशें जावन आसात ‘आपल्या हातान घेतलो घात’ (बेन्तो दायस), ‘घात आपल्याक संतोस पेल्याक’ (बरोवपी. एफ. डी. सौजा आनी दिगदर्शक. बॅनेदितो पिनहेरो), ‘हांव पातकी?’ (सेबी मास्क आनी ताच्या बराबर गोंयचे कांय प्रमुख कलाकार), ‘विनगन्स’ आनी ‘पोलितीक’ (माइक मेहता), ‘सांगांती’ (नोनस्टोप खेळ तियात्र) (बरोवपी. वितोरीन पेरेरा,आनीदिगदर्शक. सी. पॅरी, जो कुवेट शारांत घडोवन हाडलो), ‘रुप आंजांचें’ (बोवेंतुरा आलमेदा- जाका कला अकादेमीन दुसरो इनाम फावो जाला). ‘तर तूं’ (पिटर (बेबी) फेर्नांडीस जाच्यो गोंयभर 25 दाखवण्यो जाल्यात), ‘उसरां पावलो’ (पिटर (बेबी)फेर्नांडीस), ‘मीस विलमा’ (बापतीस्त पेरेरा), ‘बाप्पा’ (काणयेतल्या विचारसर्णीचो रचनार, दामासियानो कोहेलो हाचें लिपीयांतरण आनी दिगदर्शन करपीकॉनस्ती), ‘घोव, बायल आनी कुंपार’,हो जमनीवयलो खेळ एकवटीन आंतोनियो (तारवटी) फेर्नांडीस आनी कॉनस्ती हाणीं बरयला आनी दिग्दर्शीत केला.

1975 वर्सा ,कुंवेट शारांत,कॉनस्ती 8 वर्सां थंयच्या शिक्षणीक मंत्रालयांत, विजशास्त्री म्हूण वावुरलो. त्या वेळारताका तियात्रांनी नाचपाची संद मेळ्ळी, तांतुतलोच एक तियात्र म्हळ्यार वितोरीन पेरेराचो नोनस्टोप खेळ तियात्र ‘सांगांती’ जाचो दिग्दर्शक सी. पॅरी आसलो. ह्या तियात्रांन दिग्दर्शकाक सहकार दिवंचे दिवन, ताणें ह्या तियात्रांन नायकाची मुखेल भुमीका लेगीत केल्या. जेन्ना कुंवेट शाराचेर ईराखाच्या लोकांनी आक्रमण केलें तेन्नाकॉनस्तीक गोंया परतुचें पडलें.

एक व्हड मानाचो गायक तशेंच नैसर्गीक संगीत घडवपीकॉनस्तीन 250 वयर कांतारांचे वेगवेगळे प्रकार बरयले जशे, सोलोस,डुयेट्स,दुयोस,त्रियोस,क्वोर्तेस/क्व्वीटेंन्स आनी कोरल. वेगवेगळ्या अवसरांक जशें, काजारांक (सावूदीचें कांतांर), वाडदिसांक, आदी तो संगीत रचतलो. ताणें सुमार 12 कांतांरा ओल इंडिया रेडियोचेर रिकॉर्ड करुन दवरल्यांत जीं आयजवेर आमकां आयकपाक मेळटात.तशेंच ताणें उमाळ्यान भरिल्ली कांतांरा रचलीं तशेंच 6 कांतांरा रिकॉर्ड केलीं जातूंत सोलोस,डुयेट्स,दुयोस,त्रियोस आनी क्वोर्तेस हांचो आसपाव आसा, जीं‘वावुरचें लोकान’ ह्या कॅसेटीन आसा. जी दमासियानो कोयेलो हाणें काडिल्.ली जातूंत पिटर नऱ्होना आनी बाबुश हाणीं संगीताची मांडावळ केल्ली. ‘सिलेकटेड स्टार्ज ऑफ गोवा’ ह्या रंगमेळ पंगडाचो तो वांगडी आसलो आनी हो रंगमेळ घडोवपी सेबी मास्क कुरतोरीं गांवचो तशेंच तो, सेबी-पिटर-कॉनस्ती ह्या त्रियोचो भाग आशिल्लो. तियात्र माचयेर तरेकवार बळिश्ट तियात्रीस्तांक कॉनस्तीन खांद मारलो जे जावन आसात प्रेम कुमार, एम बॉयर, आंतोनी दें सा, सी आल्वारीस,यंग मिनेजीस, आल्फ्रेड रोज,जासींत वाज,सौजा फॅरांव, फिलोमॅनां ब्राज, बेटी नाज, स्टीव रॉड, बाब पिटर, आंतोनॅत मॅण्डीस, रिता रोज, मेरी वाज, आंतोनी सान, सिसील्या माशाडो, आदी.

ताचो भोवमान बदल

तरेकवार संघटणानीं आनी मंडळानीं ताच्या संस्कृतीक क्षेत्रांत, तियात्रा खातीर दिल्ल्या योगदाना पासत ताचो भोवमान केल्लो आसा. गेल्या वर्सा राजीव गांधी कला मंदीर,फोंड्यां हांगा 125 वर्स दिसाच्या तियात्र उत्सव मंडळान, कला आनी संस्कृती संचालनालयानन आनी गोंय तियात्रअकादेमीन तांचो भोवमान केल्लो.