गुलाब

देवनागरी

Romi

गुलाब हो फुलांचो राजा. माथ्याक माळटकच तो अस्तुरेचें सौंदर्य फुलयता. मोगाचें प्रतीक म्हूण मानिल्ल्या ह्या गुलाबाच्यो वेगवेगळ्यो जाती आसता. तांबडे, हळडुवे, गुलाबी, धवें अशा विंगड विंगड रंगाचें गुलाब आमका मुखेलपणान पळोवपाक मेळटा.

गुलाबाचे उपेंग

गुलाब हें फूल पळोवपाक बरें दिसलें वा मन प्रसन्न करपी आसलें तरी ताच्यांत वखदीय गूण आसात हें भोव थोडयांक खबर आसतलें. ह्या सोबीत सुंदर गुलाबाच्यो पाकळ्यो बारीक वांटून तें वांटण चमचो भर पोटांत घेतल्यार वात(GAS) कमी जाता. तशेंच पातळ परसाकडेन जाल्यार लेगीत आयलें वांटण उपेग पडटा. गुलाबाच्या पांकळ्याचें हें वांटण चड प्रमाणांत पोटांत घेतल्यार संडास पातळ करपाक मजत करता.हाका लागून जे व्यक्तीक सूको संडास जावन परसाकडेन त्र स जाता अशा वेळार वयल्या वांटपाचे‌ तीन चार चमचे पोटांत घेवचे. गुलाबाच्या पांकळ्यांचें वांटून केल्लें पातळ वखद घेतल्यार काळाची क्रिया सुदारपाक मजत जाता. कुडीतलें रगत इबाडून जावपी कांय दुयेंसांनी हें वखद घेतल्यार बेगीन गूण मेळटा. गुलाबाच्यो पाकळ्यो आनी खडी साखर हांचो एकाचेर एक थर करून कांचेच्या भरणेत वताक दवरत जाल्यार कांय दिसांनी एक लेह तयार जाता. ताका 'गुलकन्द ' म्हण्टात. हें मिश्रण रगत उणें आसल्यार ( Anaemia) तशेंच पिंताचो त्रास आसल्यार एक एक चमचो सदांच कांय तेप घेवचें. बरोच लाव मेळटा.

संडासांतल्यान रगत पडप वा आंगांत जळजळ पडल्यार गुलाबाचें वयलें वखद पोटांत घेवचें. आंगाक चड घाम येवन घामसाण मारीत जाल्यार होच प्रयोग करचो. तशेंच कुडींतल्या शुक्रधातूचें बळ कमी जाल्यार वयलें पातळ वखद घेवंचें.बळ मेळपाक मजत जाता. जोर आयल्यार बाजारांत मेळपी गुलाबपाणी थंड उदाकांत घालून त्या उदकांत कपडो बुडोवन आंग पुसून घेवचें. तशेंच ताच्यो घडयो कपलार दवरल्यार जोर देंवपाक मजत जाता. कातिचो रंग इबाडल्यार तशेंच घावो जावन सूज आयल्यार त्या भागार गुलाबाच्यो पाकळ्यो वांटून लावच्यो. कातीचो रंग सुदारता‌ आनी सूज कमी जावन घावो बेगीन ‌पेकपाक मजत जाता. गुलाबपाणी लावन मुखामळ धुल्यार मुखाक्मळार तिकतिटसाण येवन चेरयाचेर तेज झळकता. तांबड्या गुलाबाच्यो पाकळ्यो वांटून मुखामळार लायल्यार कातीचो रंग सुदारुन चमक येता. आमी आमच्या पोरसांनी वा कुंडल्यांनी गुलाबाचें झाड अपुरबायेन लायतात. तांकां गुलाबूय फुलतात. तांचो परमळ आमकां आवडटा. आमी जायते फावट वेगवेगळ्या कारणां खातीर गुलाब बाजारांतल्यान विकते हाडटात आनी ते बावतकच भायर उडयतात. पूण आमी जर ह्या गुलाबाच्यो पाकळ्यो काडून ‌वयर सांगिल्ले प्रयोग करीत जाल्यार घरा बशिल्लेकडेन वेगवेगळ्या दुयेंसांचेर आमच्यांनी उपाय करुं येता.