जिवबा दादा केरकार

जिवबा दादा केरकार पेशव्यांचे मुस्तींतलो झुजारी.

घराबो

ताचें मूळ घराणें पेडणें म्हालांतल्या मोरजी वाठारांतले. ताचो आजो विठ्ठल शेणवी संजगिरी हो मोरजेचो कुळकर्णी आशिल्लो.ताका गणेश,बळवंत आनी रामकृष्ण अशे तीन चले आशिल्ले.तातूंतल्या गणेश हाचो जिवबा हो व्हडलो चलो.ताका बापोलयो बलवंत हाका पोसको दिल्लो.ताच्या आज्यान केरी वाठारांत जागो घेवन घर बांदलें. उपरांत घरचीं सगळीं मनशां मोजरी सोडून केरी वाठारांत रावंक गेली.ताचें मुळावें शिक्षण घरचेघराच जालें.उपरांत सोळाव्या वर्सा फुडलें शिक्षण घेवंक तो कोल्हापुराक गेलो.थंय एका पंडिताकडेन घरकाम करून संस्कृताचो अभ्यास करूंक लागलो.थंयच ताका व्यायाम करपाची संवय जाली.एका वर्सा उपरांत तो पुण्यांत गेलो आनी पेशव्याचो सरदार बर्वे हांगेर रांवक लागलो. बर्वे हाचेवतीन ताका पेशव्यागेर बाकनीस म्हूण नोकरी मेळ्ळी. बर्वे मरतकच जिवबादादाक ताच्या पथकाचो मुखेल म्हूण नेमलो.हें पथक घेवन पिरायेच्या 21 व्या वर्सा तो सदाशिवराव भाऊ हाच्यावांगडा उत्तरेक गेल्लो.पानिपतच्या झुजांत ताणे बरोच पराक्रम केलो.उपरांत नानासाहेब पेशवा हाणें महादजी शिंदे हाका उत्तरेक सुभेदाराचीं वस्त्रां दिवन जिवबादाक ताचे वांगडा धाडलो. शिंदे हाणें जिवबादादाचो पराक्रम आनी बुदवंतकाय पळोवन ताका मुखेल सेनापतीची सुवात दिली.राजपूत आनी जाट हांचे वांगडा जाल्ल्या शिंधांच्या झुजांत,तेचपरी रामभाऊ पटवर्धन हाचेवांगडा टिपूकडेन जाल्ल्या झुजांतूय ताणें बरोच पराक्रम केलो.सुभेदार गुलाम कादर जेन्ना दिल्लीचेर चाल करूक आयलो तेन्ना दिल्लीचो बादशाह शाह अलम हाणें शिंधाकडेन आदार मागलो.जिवबादादा हाणें तोखणायेची कामगिरी करून बादशाहाक जैत मेळोवन दिलें.तेन्ना बादशाहन शिंधांक वजिरी दिवन ताच्या सरदारांक, जिवबादादा आनी लखबादादा हांकां ‘बक्षीबहाद्दर फत्तेजंग’ आनी ’समशेरजंग बहाद्दर’ अशे किताब दिले. जिवबादादाच्या आदारानूच शिंधान दिल्लीची वजिरी केली आनी उपरांत बादशहक वर्साक णव लाख खंडणी दिवन-आग्रा हो वाठार आपल्या राज्याक जोडलो.महादजी शिंदे हाचेकडेन,ताचो उजवो हात म्हूण तो अखेरमेरेन प्रामाणिक रावलो.तेचपरी पुण्यांत वा हेर खंयचेयकडेन वतना राज्याचो कारभार बादशहक जिवबादादाचेर सोंपोवपाइतलो महादजी शिंदे हाचो विस्वास जिवबाचेर आशिल्लो.