पर्ल बक

पर्ल बक ही नोबॅल पुरस्कार मेळोवपी नामनेची लेखिका.

भुरगेपण आनी शिक्षण

तिच्या बापायचें नांव एबसलोम सिडेंस्ट्रीकर आनी आवयचें नांव कॅरलिन आशिल्लें.तिचो बापूय चीनांत पंथोपदेशक आशिल्ल्यान पर्ल हिचें भुरगेपण थयंच गेलें.सुरवातीचें शिक्षण तिणें शांघाय शारांत घेतलें.उपरांत अमेरिकेंत येवन लिंचबर्ग, वॅस्ट व्हर्जिनियाच्या रँडोल्फ-मॅकन विमॅन्स कॉलेज हातूंत 1914 वर्सा ती पदवीधर जाली.

जिविताची वाट

 1917 वर्सा ती जॉन ती लॉसिंग बक ह्या पंथोपदेशकावांगडा लग्न जाली.पूण 1934 वर्सा ताका घटस्फोट दिलो.1935 वर्सा ती न्युयॉर्कांतलो एक प्रकाशक रिचर्ड जे. वॉल्श हाचेकडेन लग्न जाली. पूण आपलें बरप मात पर्ल बक ह्या नांवानूच चालू दवरलें. 1921 ते 1931 ह्या काळांत नानकिंग विध्यापिठांत शिक्षिका म्हणून तिणें काम केलें.

बरपावळ

1923 त अमेरिकेच्या म्हयनाळ्यांनी, चीनी जिविताचेर आदारीत तिच्यो काणयो आनी हेर बरपावळ उजवाडायली. तिची पयली कादंबरी ‘इस्ट विंड, वॅस्ट विंड’ ही 1930 त उजवाडायली. पूण 1931 त उजवाडाक हाडिल्ले ‘द गूड अर्थ’ हे कादंबरीन तिका आंतरराष्ट्रीय कीर्त मेळोवन दिली. हे कादंबरीत तिणें भुंयेचेर जिवापाड मोग करपी वांग लुंग ह्या कश्टी शेतकामती आनी ताचे बायलेचें चित्रण केलां. हेच कादंबरीक तिका 1932 त ‘पुलित्झर पुरस्कार’ फावो जालो. हे कादंबरी उपरांत ‘सन्स’ (1932) आनी ‘ए हावस डिव्हायडेड’ (1935) ह्यो कादंब-यो बरयल्यो. एकाच विशयाचेर बरयल्लो कथांझेलो ‘द हावस ऑफ अर्थ’ (1935) ह्या नांवान प्रकाशीत जालो. ‘द फायटिंग एंजल’ (1936) हें आपल्या बापायचें चरित्र तशेंच ‘द एक्झायल’ (1936) आपले आवयचें चरित्रूय तिणें बरयलां. ‘द पॅट्रियट’ (1939) ‘अदर गॉड्स’ (1940), ‘ड्रॅगन सीड’ (1942) आनी ‘इम्पेरियल वुमन’ (1956), ह्यो कादंबर्यो ‘द फस्ट वायफ’ (1933), ‘फार अँड नियर’ (1947), कथा ‘द चायल्ड हू नॅवर ग्रू’ (1950), ‘माय सॅव्हरल वल्डर्स’ (1954) आनी ‘ब्रिज फॉर पासिंग’ (1962) हीं तिचीं आपजिणेचेर बरयल्लीं पुस्तकां.

== संदर्भ ==