प्रभाकर जनार्दन दातार

जल्म

एक नामनेचो शाहीर. ताचें पुराय नांव प्रभाकर जनार्दन दातार. तो जातीन चित्पावन ब्राह्मण आशिल्लो.ताचो जल्म नाशिक लागशिल्ल्या गंगापूर गांवात जालो.पिरायेच्या पंदरा-सोळा वर्सासावन तो कविता करुंक लागलो.

जिविताची वाट

गंगापूरलावन पुण्याक वतकच तो रास्ते हाचेकडेन कारकून म्हणून काम करुंक लागलो.

कवनांची खाशेलपणां

थोड्याच काळांत ताच्या कवनांची नामना सगळेकडेन पातळ्ळी. तमासगीर लोकूय ताच्या कवनांची मागणी करूंक लागले,तेन्ना तो गंगू हैवनीच्या फडांत गेलो. सवाई माधवराव आनी दुसरो जीराव हांच्या काळांत ताची नामना पेशव्याच्या दरबारांत पावली. बाजीरावाचेर ताणें 30-40 लावण्यो बरयल्यो . पुराणीक कथांचेर आनी देवदेवतांचेरूय ताणें जायतीं पदां रचल्यांत . तेभायर ताणें चडशे वीर, श्रुंगार आनी करुणा अशें तीन रस आळयल्यात. अचूक शब्दयेवजण, रेखीव रचना आनी चितवेधक वर्णनशैली आदी उल्लेख करपासारखीं खाशेलपणां ताच्या कवनांनी दिसतात. पेशवाईविशीं ताका खुबूच ओड आशिल्ली. देखूनूच ताणें खडर्याचे झूज, रंगाचे दरबार, सवाई माधवरावाचें मरण, बाजीरावाचो राज्यनशा आदी विशयाचेर भरपूर पोवाडे रचल्यात. पेशवाईचो अस्त जातकच प्रभाकराचेर खुबूच वायट दीस आयलें . पोट भरपाखातीर फुडें ताका मुंबय, ठाणें, बडोदें शारांनी भोंवडी करची पडली.ह्या काऴांत तो व्हड व्हड वेपारी आनी श्रीमंत लोक हांचेरूच कवनां करून गावंक लागलो.निमाणच्या काऴांत तो दारादारांनी डफ घेवन भोंवतलो. प्रभाकराक हिंदी आनी उर्दू भाशांचेंय गिन्यान आशिल्लें . ताच्यो कांय हिंदी कविताय उपलब्ध आसात.