बंदे अलीखाँ

बंदे अलीखाँ एक व्हड वीणावादक.तो दिल्ली लागसारच्या किराण (कैरान) ह्या गांवचो आसून ताका त्या घराण्याचो मूळ पुरूस मानतात.जयपूर,ग्वाल्हेर,इंदूर ह्या दरबारांचो ताका आलाशिरो आशिल्लो.ग्वाल्हेर घराण्याचो गायक हद्दुखाँ हाचो तो जावंय.वीणा वादनांत पुराय भारतभर ताची नामना आशिल्ली.बारिकांतल्या बारिक स्वरांचें भान दवरपी गोड वादक अशी नामना आशिल्ली.मिंडेचें गोड वादन हें ताचें खाशेलपण.हाचेभायर तो धृपद गायकूय आशिल्लो.1885 त पंडीत भास्करबुवा बखले,किर्लोस्कर नाटक मंडळींत आसतन,ताच्या पदान भारावन बंदे अलीखाँन ताका स्वखर्चान गंडो बांदलो. पं.भास्करबुवान स म्हयने ताचेकडेन शिक्षण घेतलें.बंदे अलीखाँची बायल आनी ताची पट्टशिश्या चुत्राई ही लेगीत त्या काळांली नामनेची गायिका आशिल्ली. ताच्या हेर शिश्यांभितर चंद्रभागाबाई,बिनकर मुरादखाँ,इंदूरचो बीनकर वहीदखाँ आनी लतीफखाँ,देवासाचो गायकु रजब,अलीखाँचो बापूय मुगलूखाँ,बडोध्याचो जमालुद्दीनखाँ आदींचो आस्पाव जाता.निमाणें ताचें पुण्यांत आशिल्लें.थंयच ताका मरण आयलें.