बाबरेश्वर देवस्थानाचो इतिहास आनी परंपरा

श्री बाबरेश्वर देवस्थान हें कलंगूट गावांतलें एक फामाद देवस्थान कलंगूट आनी बागा हाच्या मदीं वसलेल्या खोब्रावाडो ह्या वाड्यार देवस्थान आपलें स्थान घेवन आसा.देवळाचें प्राकार जरी ल्हान आसलें तरी दर्या देगेर वशिल्लें हें देवस्थानमन भाक्तांचें मन भुलोवणें आसा.लागींच दर्या वेळ आशिल्ल्यान थंड निर्मळ व्हांवपी वारो,देवळा मुखार आशिल्ली धवी फुल्ल रेंव सारकिल्ली नैसर्गीक सृश्टी पळोवन भाक्तांचें मन प्रफुल्लीत जाले बगर रावना. ह्या देवस्थानाक सुमार 50 वर्सा वयर जावन गेल्या. बाबरेश्वर म्हळ्यार ‘राखणदार’ आनी तो गांवची राखण करता असो ह्या गावांतल्या लोकांचो समज आसा. गांवचें लोक ह्या देवाक खूब मानतात तशेंच गांवा भायल्या लोकांचोय ह्या देवाचेर खूब भावार्थ आसा. आपलें कसलेंय कार्य करपाक जेन्ना पावल मुखार मुखार तेन्ना ह्या देवाच्या आशीर्वादानूच कार्याक हात घालतात. दर्शन घेतना लोक पांच केळी, नाल्ल आनी उजवाती ओंपतात तशेंच केळीचो घड अर्पण करतात. आपल्या काम- धंद्या संबंदान, शिक्षणा संबंदान, भलायके संबंदान वा हेर कसल्याय अडी अडचणी संबंदान जे प्रस्न आसा तें सुटावे जावचें म्हूण देवाकडेन मागता आनी तांच्या भावार्था प्रमाण तांच्यो मागण्यो पुराय जाता. ह्या देवळांत पयली भट नासलो.फक्त गांवचो एक मनीस थंय पूजा करतालो.ह्या देवाचेर खूब श्रध्दा आसल्या कारणान खूब लोआशिल्ल्यानक ताच्या दर्शनाक येता.देवाचें प्रिय फळ केळी लोक केळ्याच्या घडाची आंगयतात आनी आपलें कार्य सिध्दीक पावतकच आंगयल्ल्या प्रमाण ताका केळीचो घड अर्पण करतात.तशेंच वर्साच्या जात्रेवेळार चवथीक जशी माटोळी बांदतात तसो देवळा मुखार माटोव तयार करून ताका आंगवणीचें केळीचें घड बांदतात. वर्सान वर्स ह्या देवळाची जात्रा जाता.ही जात्रा सुमार सात दीस चलता.कलंगूट गांवचें तशेंच कलंगूटच्या भोंवतणच्या वाठारांतलें लोक ह्या जात्रेक व्हडा उमेदीन आनी व्हडा संख्येन उपस्थीत आसाता.कलंगूट हें पर्यटन स्थळ आशिल्ल्यान हे जात्रेक आमकां विदेशी लोकूय सहभाग घेतना दिश्टी पडटा.जात्रेच्या निमतान भोंवतणी विद्युत (लायटी) सजावट आनी फोली लावन सजयतात,सातूय दीस महाप्रसाद आसता, देवळाच्या मुखार माचयेर ह्या दिसांनी मनोरंजनाखातीर वेगवेगळ्यो कार्यावळी घडोवन हाडटात. हे जात्रेक आनीक एक नांवान वळखतात तें म्हळ्यार ‘केळ्याची जात्रा’ आनी विदेशी लोकांक उद्देशून ‘Banana Festival’ म्हूण नांव पडला.देवाक भक्तांनी अर्पण केल्ल्या केळ्यांची दुसरे दीस ते सातवे दीस मेरेन पावणी करतात . दर दिसा सुमार पन्नास ते साठ घडांची पावणी जाता.ह्या जात्रेचें खाशेलपण म्हळ्यार जशीं जशीं पावणी जाता तशें तशें घड वाडत आसता.अशीं ही एक गोंयांतली आपलें वेगळें अस्तित्व आशिल्ली जात्रा.