भक्तिवेदांत स्वामी प्रभुपाद

भक्तिवेदांत स्वामी प्रभुपाद

अभयचरण गौरमोहन डे हांचो जल्म 01 सप्टेंबर 1896 दिसा कोलकातांत जालो. ते ज्या दिसा जल्मले त्या दिसा थंय नंदोत्सव मनयताले म्हणून तांचे आवय-बापूय तांकां नंदूलाल ह्या नांवान उलो मारताले. तांचें मुळावें शिक्षण स्कॉटिश चर्च कॉलेजींत जालें. त्या काळांत त्या वाठारांतले सगले वैश्णव आपल्या भुरग्यांक थंयच शिकपाक धाडटाले. 1920 वर्सा अभयचरण इंग्लिश, तत्वज्ञान आनी अर्थशास्त्र हे विशय घेवन पदवी परिक्षा उत्तीर्ण जाले. त्याच वेळार गांधीजीन स्वातंत्र्यलढ्याचो उध्दोश केलो. अभयचरण हांणी आपली पदवी स्विकारली ना. पिरायेच्या बाविसाव्या वर्सा तांचें लग्न राधाराणी देवी हांचे वांगडा जालें. ताजे उपरांत तीन वर्सांनी ह्या जोडप्याक पयलो भुरगो जालो. 1922 वर्सा तांची वळख भत्त्किसिध्दांत सरस्वती ठाकूर हांचे कडेन जाली. तांणी अभयचरणाक चैतन्य महाप्रभूचो संदेश सगल्या जगाक कळचो हे खातीर ताजो प्रसार इंग्लिशींत करपाक सांगलें. अभयचरण हांणी ते परमाण एक मासिक सुरू केलें. इतलेंच न्हय तर हाजो प्रसार आनी प्रचार जगभर करपा खातीर इस्कॉन संस्थेची स्थापना केली. 1947 वर्सा वैश्णव समाजान तांकां भत्त्किवेदांत ही पदवी प्रदान केली. तांणी भागवतपुराण, गीता हाचेर इंग्लिशींतल्यान जायतीं पुस्तकांबरयलीं. आपली सबंद जीण तांणी कृष्णप्रचारा खातीर वेंचली. 14 नोव्हेंबर 1977 दिसा तांचें महानिर्वाण जालें. 1959 वर्सा सन्यास ग्रहण जाल्या उपरान ताणेन वृंदावन ह्या क्षेत्रान श्रीमद भगवतपुराणांचे खुबशा प्रमाणान इंग्लिशींत अनुवाद केला. सुरवातेक तीन खंड प्रकाशित जाल्या उपरान 1965 वर्सा आपल्या गुरूदेवाक अनुष्ठान संपन्न करपाक तो अमेरिकेक गेलो, 1966 वर्सा ताणेन अंतरराष्ट्रीय कृष्णभावनामृत संघ हाची स्थापना केली. 1968 वर्सा ताणेन प्रयोग करपा खातीर वर्जीनिया (अमेरिका) च्या डोंगरावाठारान नवे-वृंदावन स्थापित केले. दोन हजार हेकराच्या समृध्द कृषी क्षेत्रान तांचे काम पळोवन ताच्या शिष्यांनी आनीक खुबशा जाग्यांचेर समुदायांची स्थापना केली.