मास्टर वाझ

जुझे वाझ हो एक तियात्रीस्त.

जल्म

जुझे लोरेन्स वाझ हांकां सगळे फामाद मास्टर वाझ ह्या नांवान वळखतात.हो अरोरा आनी बेंजामीन हांकां सप्टेंबराचे 6 तारकेर 1927 ह्या दिसा म्हापश्यां तियात्रिस्तांचे फामिलींत जल्मलो.

वावर

आयज तो 84 वर्साचे पिरायेर सर्गेस्त मिंगेल रोड हांचो एकूच जीवंत शिश्य. तो थोड्या भोव जीवंत कलाकारां मदलो असो एक कलावंत जाणे तियात्राच्या क्षेत्रांत पाय तियात्रिस्त जुआंव आगुस्तीन फेर्नांडीस, सायब रोशा, दियोगीन डिमेलो, कीड बॉक्सर आनी हेर म्हालगड्या तियात्रिस्तांच्या तियात्रांनी अभिनय केला.

अर्नस्ट रिबेलो हाणें आपल्या ‘बोंबोयची इश्टील’ह्या तियात्रांत मास्टर वाझ हांची बाल कलाकार म्हूण माचयेर वळख करून दिली. ताच्या बापायक तियात्राचे माचयेर मास्टर वाझ म्हूण वळखताले देखून ताच्या चल्याकूय मास्टर वाझ हें नांव दिलें.

तो बायलेच्या भुमिके खातीर चड गाजलो आनी ताची उमेद आनी कृती आधुनीक काळांतल्या जायत्या बायल कलाकारां परस खूब बरी आशिल्ली. ताची उलोवपाची आनी चलपाची तरा, आदी. थोडक्यांत ताणें केल्ली बायलेची पूशेणटेलेर्णत्व वागणूक खंयच्याय मनशाक ताचो बिनचूक बायलेचो अभिनय नदरेक फटोवन वतालो.

मास्टर वाझान आपली प्रतिभा अभिनया पुरतीच मर्यादीत दवरूंक ना.पूण ताणें आपल्याक उत्तम संहिता लेखक म्हूण विकसीत केलो. ताणें बरयिल्लो पयलो तियात्र ‘जॅक आनी मॅक तारवार जाले पॅक’ हो हांसयाळो विनोदी तियात्र आशिल्लो.

योगदान

ताणें सगळे मेळून 25 तियात्र बरयल्यात आनी दिग्दर्शीत केल्यात. ‘बापूय’, ‘मालगोडो पूत फुलगोडो’, आनी ‘घोराचो दिवो’ हे तांचे सगळ्यांत बरे तियात्र जावन आसात. ताणें तियात्र सादर करपाक गोंयांतूच प्रवास करूंक ना तर भारताच्या वेगवेगळ्या भागांनी तो गेलो. जशें पुणे, मालवण, वेंगुर्ला, सावंतवाडी,बेळगांव ,दिल्ली आनी दामान. तशेंच ताणें आपली नाटकुलीं काराची आनी आफ्रिकेच्या वेगवेगळ्या शारांनी जशें मुंब्बासा, नायरोबी, नाकुरू आनी काम्पाला हांगां सादर केलीं.

तो एक उत्तम कांतारां रचपी आनी ताणें आपल्या लांबदीक जिवितांत हजारांनी कातारां रचलीं.तांच्या कांतारांचीं उतरां सदांच आकर्शक आनी अर्थपूर्ण आसतालीं आनी ताकाच लागून ताचीं जायतीं कांतारां खास करून ताचे डुयेट चड गाजले.

मोगाचो आंवडो’ ह्या पयल्या कोंकणी फिल्माच्या सुरवातेच्या गिताचीं उतरां मास्टर वाझ हांणी रचलीं.तशेंच ताणें ‘म्होजी घोरकान्न’ ह्या आनीक एका कोंकणी फिल्माच्या गिताचीं उतरां स्वता बरयली. आपूण एक गीतकार आशिल्ल्यान तो बायलेच्या भुमिकेन डुयेट कातारां गायतालो. ताणें कोंकणी माचयेर बळिश्टपणान डुयेट कातारां गायलीं.मास्टर वाझान‘ऑल इंडिया रेडियोचेर’ जायती लोक-नाटकुलीं बरयलीं आनी सादर केलीं आनी आपल्या नाटकी प्रतिभेचो लाब ताणें गोंयच्या लोकांक दिलो. ‘विस्वाशी घोरकान्न’,‘विज्मीत’, गांवची सेवा’,आदी हीं थोडीं नाटकुलीं ‘ऑल इंडिया रेडियोचेर प्रसारीत जाल्यांत.

पुरस्कार

ताणें तियात्राच्या उदरगतीखातीर दिल्ल्या मोलादीक योगदाना खातीर खास करून कांतारांक आनी संगिताखातीर ताणें जायते पुरस्कार जोडल्यात.गोंय कोंकणी अकादेमीन ताणें तियात्राखातीर जिवीत भर दिल्ल्या योगदानाखातीर 1992 वर्सा सेनेटरी सुवाळ्यां निमतान तांचो सत्कार केलो.कुवेत कोंकणी हेरीटेज ह्या संस्थेन मास्टर वाझाक ताणें तियात्राच्या उदरगती खातीर दिल्ल्या समर्पीत सेवेखातीर तांकां पुरस्कार दिवन तांचो भोवमान केलो. युनायटेड क्लब ऑफ उत्तोर्डान ‘प्राइड ऑफ उत्तोर्डा’ हो माथाळो ताका अर्पण केलो. 2000 वर्सा गोंय सरकारान ताका सगळ्यांत भोवमानाचो गोंय राज्य सांस्कृतीक पुरस्कार भेटयलो.