शशिकला होडारकार आल्मेदा

शशिकला होडारकार आल्मेदाही एक सुटके झुजारी.

जल्म आनी भुरगेपण

शशिकला होडारकार आल्मदांचो जल्म 23 जून, 1931 दिसा फोंडें तालुक्यांत जालो. तांच्या बापायचें नांव मंगेश होडारकार तर घरकाराचें नांव आनास्तासियो आल्मेदा. आनास्तासियो आल्मेदा हेवूय एक निजाचे सुटके झुझारी आसले. शशिकलेचे शिक्षण बी.ए. मेरेन जाल्लें.भुरगेपणांत 1946 च्या स्वातंत्र लढ्या विशीं तांका विशेश अशी म्हायती जरी नासली तरी तांच्या व्हडल्या भावाचो ह्या लढ्यांत संबंद आशिल्ल्यान घरांत जीं उलेवपी जातालीं ताचे वयल्यान तांकां 1946 च्या लढ्या विशीं आयकून थोडें भोव गिन्यान जाल्लें.

सुटके खातीर योगदान

1954 त शशिकलेचो प्रत्यक्ष संबंद गोंयच्या सुटके झुजा कडेन आयलो तेन्ना त्यो निकत्योच एस.एस.सी. पास जाल्ल्यो. चली भुरगें तेन्ना नोकरी करनासली म्हूण त्यो घरांतच आसताल्यो. तांच्या व्हडल्या भावाक स्वातंत्र्य चळवळीची खूब आस्त आशिल्ल्यान कॉलेजीक शिकता आसतनाच ते राष्ट्रसेवा दलाच्या कार्यावळींनी वांटेकार जाताले. 1949-51 ह्या काळांत ते नॅशनल काँग्रेस गोंय संघटनेच्या पुणे संघटनेचे कार्यकारी समितीचे वांगडी आशिल्ले. 1954 त तांकां भुंयगत वाठारांनी वांटो घेता ह्या आरोपाखाला अटक केली आनी बंदखणीची ख्यास्त फर्मायली. तांचे वासपुसेक बरेच लोक येताले. त्याच वेळार सिंधुताई देशपांडे तांच्या घरा आयल्यो आनी तांचे प्रेरणेन शशिकलेन सुटके झुजांत वांटेकार जावपाची स्फूर्त घेतली. होडारकार कुटूंब 1948 सालांतल्यान मडगांवां रावतालें. तांणी सत्याग्रहांत वांटेकार जावपाक घरचीं तयार नासली. व्हडलो भाव बंदखणींत तर धकटो भाव पुण्यांत शिकतालो. घरांत फकत ऐवय आनी आजी. तरी लेगीत सिंधुताईची स्फूर्त घेवन 25 नोव्हेंबर 1954 दिसा पणजे जावपा आशिल्ल्या सत्याग्रहांत तांणी वांटो घेवपाचें थारायल्लें. पूण सिंधुताई मडगांव तांच्याच घरांत राविल्ल्यान पुलिसांची खर नदर तांच्या घराचेर आशिल्ली. देखून तांकां सत्याग्रहांत वांटो घेवंक मेळ्ळो ना.

ख्यास्त आनी बंदखणींतली जीण

उपरांत 17 फेब्रुवारी,1955 ह्या दिसा तांणी विलासिनी प्रभू हांचे वांगडा हातांत राष्ट्रीय बावटो घेवन सत्याग्रहांत वाटो घेतलो. डॉ. गायतोंडेक हद्यपार केल्ली म्हण दुकानां बंद दवरून, संप पाळुया असो मडगांवाच्या दुकानदारांक उलो दीत तांणी जय हिंद, वंदे मातरम् अश्यो घोशणा दिल्यो तेन्ना पुलिसांनी तांकां धरलीं आनी स वर्सांची बंदखणीची ख्यास्त फर्मायली. तांकां आनी विलासिनीक स वर्सांची सुटका जाली. शशिकले बरोबर बंदखणींत लक्ष्मी पैंगिणकार, सुर्यकांती फळदेसाय, मित्रा बीर, कार्लिस्ता आराऊज, कुमुदिनी पैंगिणकार, शारदा सावयकार, शांता हेदे, सुधाताई जोशी, सिंधुताई देशपांडे अश्यो सत्याग्रही बायलो आसल्यो. आठ म्हयने तांकां पणजेच्या बंदखणींत दवरलीं. थंय तांकां तांची आवय मेळपाक येताली आनी येताना तांच्या वांगड्यांक तांकां जाय आशिल्ल्यो वस्तू घेवन येताली. बेदखणींत तांणी खूब पुस्तकां वाचली आनी त्या वाचनान तांच्या मनाचेर बरें संस्कार जावंक पावले. गोंय पुर्तुगेजांच्या जुलमांतल्यान मेकळें जालें तेन्ना त्यो पुण्यांत आसल्यो. 1966 त त्यो गोयांत आयल्यो. कुटूंब नियोजन खात्यांत नोकरी करूंक लागल्यो. पुण्यांत आसतना 1965 मेरेन त्यो समाजवादी महिला सभा, राष्ट्रसेवा दल ह्या सास्थांच्या कार्यांत वांटेकार जाताल्यो.

फावो जाल्लो सन्मान

18 जून 1986 ह्या दिसा गोंय सरकारान तांच्या सुटके झुजांतल्या वावराचो भोवमान केलो.