सी. आल्वारीस

देवनागरी

Romi

सी. आल्वारीस हो तियात्र माचयेचो एक युगपुरुश थारता. कारण जितल्या प्रामाणीकपणान सी. आल्वारीसान कोंकणी तियात्र माचयेर तियात्र प्रदर्शीत केले तितले आनीक कोणेंच करुंक नात. सात वर्सांचे पिरायेर ताणें कोंकणीचें काम सुरु केल्लें. चलपाक शिकतना आवयचें बोट धरुन चलतात ते परीं सी. आल्वारीसान कोंकणी तियात्रांत आनी सिनेमांत आपली गोडी दाखयली हांतूंत कांय दुबाव ना. भुरगो सी. आल्वारीसान पयल्याच खेपेक आपल्या बापायच्या गांवांतल्या खेळ तियात्रांत काम केल्लें. भुरग्याचें पयलें पावल मारिल्लें खंय सद्दांच चुकता पूण ह्या कोंकणीच्या भुरग्यान आपलें पयलेंच पावल मारलें आनी तें सारकें जालें जाका लागून आयच्या धांवत्या युगांत सी. आल्वारीस कोण हाची जाप प्रत्येक तियात्र मोगी मनशा कडेन आसा.

गोंय, मुंबय आनी गाल्फाक आपलें तियात्र सेगीत सादर करपी असो हो तियात्रिस्त गोंयचे भुयेंर फामाद जालो. तांच्या घराण्याक फकाणांगेर अशें म्हणटालें. जाल्यार आयज तांकां कोंकणी माचयेचे युगपुरूश मानतात. बरें सारें पडल्यारच रुखाक फळां येतात तशेंच जेन्ना सी. आल्वारीस हांचे बापुलभाव चॅंपीयन आल्वारीस हो संगीतकार आसून लेगीत सी. आल्वारीसाक तियात्रा खातीर संगीत बरोवन दिलें ना. जाल्यार दुसरे वटेन सी.आल्वारीसान मेनडीसाक (तियात्र बसोवपी) उतर दिल्या कारणान, स्वता सी. आल्वारीसान कांतारां रचून तीं स्वता गायलीं, तेन्नां तांकां आपली तांक दिसून आयली. ह्याच कारणाक लागून सी. आल्वारीस एक तियात्र बरोवपी, संगीतकार, एक बरो नट थारलो. ताणें शंबर(100) आंकड्या वयर तियात्र बरोवन ते माचयेर प्रदर्शीत केल्यात.