Ahimsa
Romi
|
Bharti-i ary dhormachea zaitea udat't totvantolem ek mukhel totv. Ohimsa ho dhorm' mhonnunoi manil'lo asa. Bhartiyanchea 48 somskarant ohimsek atmosomskar oxem mantat.Survek ohimsa ek mokxosadhon mhunn procharant aili. Atmogineani monis konnachich hotea korina va konnak dukhoina karonn prannimatr mhollear ekach ixvorachi rupam hem taka khobor asta. Ohimsa dhorm' ho boudhd va zoin hamnni poilim updexant haddla oxem kaim zannanchem mot asa. Punn bharti-i ary dhormant zoin ani boudhd hancheakuy adim ohimsa totvacho udoi zal'lo dixtti poddtta.
Gineanorupi monxan khoinchem-i mokxosadhon apnnauche khatir ohimsa totv many korunkoch zai oso sidhdant bharti-i tot'tvogineani lokamni purvil'lea kallant manddil'lo. Ohimsa dhorm' ho soglleamni pallpacho dhorm' asa ani koslyai torechi himsa korop hem patok zaun asa oxem mot mohabharot kallant loksomazant axil'lem. Somvsar soddun vanprosthaxrom' apnnaupi nivrit'timargi yotimuni himsa korinasole ani mams khainasole oxi govai grik itihasokar hiroddottos ( i.So.Po. 450 ) hannem dil'li asa. Areancheo ahara vixim jeo kolpona asleo tantunt mams khal'lean monis oxudhd zata oxi-i ek kolpona axil'li, jiche vorvim ohimsechea procharak boroch pallo mell'llo. Fuddlea smritikaramni oxi kolpona kaddli ki zo monis jea pranneanchem mams khata to pranni dusrea zolmant tea monxachem mams khata. Tekhatir mams aharant vhodd promannant bondi aili. Punn hi kolpona survek nasli. Jen'na ary lok bhartant yeun udente kodden ani dokxinne kodden vochot raule toxem tankam dhany ani bhajipalo chodd promannant mellot raulo. Tekhatir tankam mams khaupachi titlixi goroz urli na.
Zaitea vorsam saun zanche purvoz mams khatale tea bharti-i lokamni ohimsa dhormak mhotv dilem ani mamsaharacho teag kelo. Hi monxachea itihasantoli tokhnnayechi gozal oxem mhonnttat.
Zoinachea kallant ohimsa totvak khubuch pallo mell'llo. Zoin sadhunk ohimsa, soty, ostey, brohmochry ani oprigroh him panch mohaurotam pallchim poddttat.
Tatuntolem ‘ohimsa’ hem soglleant vhodd vrot asa. Zoin dhormat ohimsa tosvachi foddnnixi barik sannin kelea. Ekadrea jivak marop va taka tras divp oso himsecho spoxtt orx zata. Rag yetkoch monis vichar korinasotona dusrea jivak tras dita, takai himsa mhonnu yeta. Tebhair vaitt vichar monant dourun kel'lem khoinchem-i kam' himsa zaunk xokta.
Ohimsa purai toren pallpakhatir zoinatole sthanvasi ponthache yoti bhomvtona vatt nivll korunk aple vangdda sutacho kuncho dourotale. Jivo zontu tonddant vochun tanchi hotea zaunchi nhoi mhunn tonddar lugttachi falli bandtale. Angavele kopdde famfuddlear tachevele jivo morot mhunn kopdde famfddinasole.
Boudhdamni-i ohimsek manyotai dili asli tori ti pallpant kaim addvad asat. Hea dhormant monis dhormak onusorunoch ohimse vixi yeuzop zalam. Boudhd dhormachea oxttangik margant ohimsa hi yogy akankxanchea vollerent ek fautt ani soudortonachea vollerent dusre fautt ayil'li dixtti poddtta.
Boudhdamni aplea ponchxilant ohimsek poili suvat dilea. Ohimse vixim khasa budhdochim totvam matxim vegllim axil'lim. Ji vost bhikxa mhonnun ditat ti apnnauchi oso tacho adex axil'lo. Tachea motapromann mams bhokxonnan monis bhoxttona tor vaitt kortupamni bhoxttota. Bhoxttop va na bhoxttop hem kitem khata hacheavelean tharna tor monis kitem korta ani koxem korta hache velean tharta. Ekdam chondd namvanchea dhouddachea ghorant bhikxa mhunn mellil'lem dukrachem mams budhdan khal'leachi akheayika asa. Sodea chin, zopan sarkilea dexant zom-i boudhd dhormache onuyayi asat te mamsahar vorjy maninat.
Somratt oxokan ohimsechem svota achronn kel'lem ani dusreankuy tevixim agonea asat. Khoincheach jivachi hotea zaunchi nhoi oxem oxokak distalem. Tea kallant soireank zonauranchem mams divn khoxi kortale. Oxokan he chalicher bondi haddli. Toxench aplea rajvaddeant zaupi zonauranchi hotea tannem thamboili.
Bhagout dhormant ohimsa montrak manyotai divn himsa prodhan yogoneak virodh kela.Mohabharotantlea narainnithopakheanant uprichor razache akhean dil'lem asa. Ho raza bhagout dhormak mantalo. Tannem aplea oxvomedh yogoneant poxuhtea korche bodla yovanchi ahuti divn yogonekrm' purai kel'lem. Bhogvan narainnan brohmadidevak voixnnou dhormacho sidhdant sangtona oso adex dila.
Yotr vedaxch yogoneaxch top: sotyom domstotha।
ohimsadhrmosomyukta: prochereyu: surot'toma:। so vo dex: sevitveo mam voS dhorm': poda sprixet।। orth: jea dexant ved, yogone, top, soty dom' hi ohimsa dhorman bhoril'li asa tea dexant tumi ravat. Odhrmachi tumkam mat'tuy bada zauchi nhoi.
Vedviroit yogoneant zonaurank martale. Zoinamni ani boudhdamni zonauranche hotyeadd cholloull ubaroli ani bhouxik lokanchem mot zonauranche hotyeadd bodl'le. Tori voidik dhormache khor vangddi brahmonn ani kxotriy hanni mat zonaurank marpachem soddlem na. Mohabharotachea kalla meren himsok yogone zatalech. Mohabharotachea kalla uprant jen'na boudhd ani zoinacho paddavo korun ary dhorm' voir sorlo ten'na porakromi kxotriy razamni oxvomedh yogone kel'leachem dakhle mellttat. Punn voixnnou dhormachea bhorbhorattichea kallant lokanche hea yogoneachea vaitt ani bhirankull chalivixim mot bodl'le.
Gitentlea goneanolkxonnant ohimsecho aspavo asa ani ohimsa mhollear xaririk top axil'leachem-i tatunt mhollam. Xrikrixnnachea kallant yogone yagachem borench bollgem axil'lem. Xrikrixnnachea kallantleanoch himsok yogonea add lokanchem mot lhou lhou korun bodlunk laglem.
Hindu somskritayentoli ohimsechi suvat spoxtt asa. Voidik dhormant dhormik mhotv axil'lea yogoneant zori zonauranchi hotea korpachi chal axil'li tori kallantoran he yogone bond poddle ani bhokti margacher adarit mokxomarg ruddh zalo. Ohimsa, soty ani brohmochry him totvam hindu dhormachim khaxelim angam zalim.
Mohatma gandhi chalu kallantolo ohimsecho ek vhodd upasok. Tannem soteagrohachem ek novem totv upegant haddlem ani taka adar mhunn ohimsek mhotv dilem. Achary vinoba bhave ho ohimsecho dusro vhodd upasok. Tachea motan nirbhoita, mog ani sohkary oxe ohimseche tin orth asat.
Ohimse vixim ostonti vicharountanchi vicharosoronni veglli asa. Amcheant dhorm' ani ahar hatunt jitlo lagosl'lo sombond asa titlo tanchea vicharount ani dhormik lokant to disna. Mams bhokxonn kelem va soro pielo mhunn te ostonti lokanchea dhorma add zaunk xokna.
Monxacho sobhavo songhrxoxil axil'lean taka svotachi ani svotache aspotichi rakhonn korche khatir zhujchench poddtta. Hem motint ghet zalear ohimsa totv apnnaunk sompe nhoi.Punn dusre votten svota jieuchem ani vangddach dusreankuy dieuche khatir palou divcho oxem mot apnnailear ahimsechem mhotv zannouta.