Romi
   

Gujrat Rajeachi adli rajdhani ani ek mhotvachem udyegik xar. Lokhsonkhea 25,15,000 (1981). Kxetrofoll 92.98 chovo. Kimi. Mumboiche ut'torek ostont relve margan hem xar 492 kimi. Ontracher asa.

Clockwise from topː Gandhi Smarak Sangrahalay at Sabarmati Ashram, Ahmedabad Railway Station, CEPT University, Kankaria Lake and the Kirti Stambh at Hutheesing Temple
City Walls of Ahmedabad 1866

Axapl'li (atanchem axaul) hi bhil'lanchi rajdhani raza kornn hannem ikravea xenkddeant jikhli ani tichea xejrach tannem kornnauti nograchi thapnnuk keli. Pondravea xenkddeachea poilea ordant sultan ohmodoxah hannem hea don nograchea ovxexancher sodeachem ohmodabad xar vosoilem. 15 vea xenkddeantolea bhomvddekaranchea likhannavelean tea kallantolem hem zogantolem sobit ani girest xar axil'lem hem disun yeta.

Sollavea xenkddeant zhuzank lagun hea xarant osthirotai axil'li. Nimannem, okboran hem xar jikhlem ani hangachi poristhiti sudaroli. Hea kallant vepar dhondeak boroch nett ailo.Bhangor, chandi, zori- rexmi, sutikamachem kosob, koriukam', dhatuchim kamam haka lagun ohmodabad xarak khub mhotv ailem. Punn ourongojebachea kallant hangachi sthiti khalauli.1817 vorsa meren hanga morattheanchi razoutt choltali. Fuddem brittix razouttint hangachi sthiti sudarot geli. Udyegodhondeant lhou lhou korun zom' bosunk laglo. Kaim vorsamni kapddacheo girnneo suru zaleo, ani vepar dhondeant mumboiche fattofatt ohmodabad xaracho kromank laglo.

Visavea xenkddeachea dusrea doxkant hangachea upnogorant mohatma gandhichea sabromoti axromachi thapnnuk zali. He ghoddnnuken ohmodabad xarak dexachea rajki-i ani somajik nodren mhotv ailem. Dex svotontr zatkoch bhaxavar rajeam zali ani ohmodabad xar gujratochi poilim rajdhani zali.

Rochnnuk, manddaull, veuhar adim gozalimvelean ohmodabad hea xarache don vibhag korum yeta. Adlem ani novem ohmodabad. Adlem ohmodabad, sabromoti nhomyechea udent tiracher asa. Somudrosopatti posun fokot 55 mi. Unchayecher axil'lean ken'na ken'nai hea xarak humvarachi bada zata. Adlea ohmodabad nograk 4.5 te 6 mi. Unchayecho tott asa ani tatunt bhitor axil'li vosti adlea xarachi kolpona dita. Novea xaracho vistar soglle kodden patll'lla ani tatunt ud'degik porisoraxivai elis briz, xahibag oxim adhunik upnogoram-i asat.

Ohmodabad xarant kapddacheo girnneo, suti rexmi, kritrim' dhage, lokhonn, vokhdam ani her utpadonache karkhane asat. 1930 vorsa saun hem xar xikxonnachea mollar fuddarolam. Gujratachea bhaxa, somskriti ani uchch xikxonnachem hem kendr asa. Kopddeavelem vinnkam', bhortokam', rongkam', lankddavelem korivo he porne kole vangddach adhunik kolechea vikasacheo hanga zaiteo yeuzonno choltat.

Hea xarant pondravea xenkddeantoli zum'ma moxid, sollavea xenkddeantoli ranni siprichi moxid, xahibag, narainn mondir adim zaitim polloupa sarkim thollam asat. Te bhair hangam 125 voir zoin mondiram asat. Hanga axil'lo mohatma gandhicho sabromoti axrom' tor antororaxttri-i smarok zalam.

Ohmodabadchean sumar 25 kimi. Ontracher sodeachi gujratochi rajdhani gandhinogor asa. Relvemarg, roste ani vimanomarg adi yeradarichea sadhnamni hem xar bhartantlea her xarankodden zoddlam.

Polleiat बदल

Ahmedabad

"https://gom.wikipedia.org/w/index.php?title=Ahmedabad&oldid=198939" चे कडल्यान परतून मेळयलें