Alute Balute
| |
Romi
|
Alute balute bharti-i kheddeantole poromporagot votni hokk. He hokk mhollear graminn orthoveusthechi bunead mhonnlear zata. Kheddeant raupi bigor xetkar lokancho veusai poromporen cholot ayil'lean taka kulporomporagot hokkachem svorup prapt zalam. Taka lagun he veusai ani tankam mellpi hokkank ‘olute- bolute’ oxem mhonnttat. Hea hkkank lagun xetkar ani ekamekam'modlea sombondank ut'torent zojmani (yojmani) pod'dot ani moharaxttrant ‘olutedari-bolutedari’ oxem mhonnttat. Hea zojmani va olutedari-bolutedari pod'dotint xetkar ho yojman oxem mantat. Zalear bigor xeti-veusayik he ‘kamin’ (itsuk) oxem somzotat.
Moharaxttrant oxa bigor xeti-veusayikanche olutedar va ‘naru’ ani bolutedar va ‘karu’ oxe don prokar asat. Xetkaranchim mhotvachim kamam korpi ani tancheo disoptt'tteo gorzo bhagoupi te bolutedar. Tankam mobdolo mhollear dhaneacho vanttoi chodd melltta. Olutedaraporos bolutedaracho hokk chodd vhoddlo asta. Pattil ani kulokrnni soddlear, chougulo, mhar, mest,sohar, chambhar, kumbhar, mhalo, xett, zoxi, poritt, gurou ani kharvi he ‘bara bolutedar’ mhunn namvajil'le asat. Zanchea bogor xetkaranchem oddna punn je xetkarancheo barik-sarik kirkoll gorzo bhagoitat te olutedar. Hatunt teli, tambolli, salli, songor, ximpi, malli, gondhlli, ddourea, bhatt, tthakor, gosavi, mulanna, vadontri, ghoddxi, kolaunt, torall, koroll, bhoi heo otthra zati aspautat. Dorek gamvant h soglle olutedar-bolutedar astach oxem-i na. Vell prosongak olutedar ani bolutedar ekamekanchim kamam kortona disun yetat. Olutedar ani bolutedaranchea veusayam voilean tanchi vhoddli, modli ani dhaktti voll va kas oxi protvari kortat. Tanchi bidagi veusaya promann tharaitat.
Xetachea kama bhair logn va her dhormik-samajik suvalleantoi mhar-mangak dhorun soglea olutea-boluteanchi kamam poromporen tharail'lim astat. Tache khatir tankam khonn'nal'l hanchea sarko mobdolo kama promann ama oiptipromann melltta. He olutedari-bolutedari pod'dotint gamvatole bigor xeti veusayantolem kuttumb, tanche kam' ani tacho mobdolo hancho nixchit ani obhedy oso mell disun yeta. Hatunt kaim zannank olutea-boluteanchi pillounnuk dista, zalear kaim zannank xetkarancho chholl dista.
Graminn orth veusthent adharobhut axil'li hi pod'dot udyegikoronnachea ani nagrikoronnachea probhavakhala halim halim moddun poddot aily. Apapleo vaddtteo gorzo ani opekxa bhagoupa khatir sogle zann xaramni vochun sthayik zatat. Dekhun kheddeantolem poilinchem ekamekancher adarun raup unnem zait asa. Duddvanchea viniym'-madhyomak lagun hacher porinnam' zala. Khub kodden 1933 vorsa saun mharanchi tancheant zal'lea nouzagritayek lagun aple votni hokk ani gamvkichim kamam soddun divpak survat keli.
Gõyantuy adlea tempar oxe bigor xetoudd veusayikanche votni hokk axil'le. Gamvche mhale, moddoull, mest, mhar, chamar hea sarkile bigor xetoudd veusayik gamvchea xetkaranchi apoplea veusayamvorovim vorsobhor fukott kamam kortale ani hea kamachem mol mhunn xetkar tankam xetant pikoil'lem pik omukuch oxa promannant ditale. Hem pik divp xet molltta tea disa ani mollnnechea zagearuch zatalem. Bhartantlea her vattharam promann gõyantoi udyegikoronnak lagun hi pod'dot lhou lhou noxtt zait geli.