Arya Samaj
| |
Romi
|
Bhartantolo ek arvil'lo dhormoponth. Hea ponthachi thapnnuk svami doyanond sorsvoti hannem 10 epril 1875 mhollear choitr xu. Protipoda somvt 1932 disa keli. Ho dis hea ponthacho thapnnuk dis mhunn aizuy monoitat.
Arya Samazachi thapnnuk korpak fuddli gozal karonn zali-
Mulxonkor ombaxonkor namvachea eka bhurgean svami doyanond sorsvoti hem namv dharonn korun somneas ghetlo. Ghordaracho teag korun to soteacho sod gheunk bhomvpak laglo. Namnecho somskritotgone progoneachkxu svami virzanond hachekodden tannem veakronn ani voidik xastracho obheas kelo. Sodeacho hindu dhorm' sonaton voidik dhormaporos zaito vegllo asun pourannik dhormacho teag korun vedabheasacho prosar keleabogor monisozatichem koleann zaup oxky oxem taka nimnnem disun ailem. Guru virzanondachea adexauylean aryosomazachi thapnnuk korpacho tacho hetoi hoch aslo.
Son 1883 meren svami doyanondan sogllea bhartodexachi bhomvddi keli ani mukhel nogramni aryosomazachi thapnnuk keli. Ary somazacho het lokam'meren pavoupak tannem zaitea gronthanchi rochnnuk keli; tatunt ‘ sotearthoprokax ’, ‘ somskarovidhi ’ ‘ rigvedobhaxy bhumika ’, ‘ rigvedobhaxy ’(7 vem monddol meren), ‘ yozurvedobhaxy ’ ani her lhan vhodd gronthancho aspavo zata. Svami doyanondachea mornnauporant 1883 to ary somazant futt poddli ani tache don fantte zale. Eka fanttean mamsahar ani ostontechea xikxonnacho purskar kelo. Dusrea fanttean he gozalicho nixedh kolo, dekhun taka ‘ mohavidealoi pokx ’ ani ‘ purannomotovadi pokx ’ oxim don namvam poddlim.
Arya Samazachi thapnnuk mumboit zali tori tacho prosar moharaxttrant vhoddloso zaunk na. Lokhitovadi ani nyaimurti randde hamnni mat moharaxttrant aryosomazachi thapnnuk korpacho ani hea somazachea totvancho prosar korpacho mhotvacho vaur kelo. Sodea bharot soddun brohmodex, thailomnndd, molexia, afrika, vestt inddiz (trinidad) hea vattharant aryosomazacho prosar zala.
Molbarant 1921 to mopla muslomanamni vhodd bondd kelem ani khub hindunk battoun musloman kele. Hea sonkxttachea kallant ary somazache lok molbarant gele ani sumar oddez hozar battyil'li hindu kuttumbam portim hindu dhormant haddlim. 1937 to, hoidrabad somsthanant aryosomazacher nizam' sorkaran bondi ghali. He bondeadd ary somazachea onuyayamni soteagroh kelo. Sumar bara hozar aryosomaji lokamni tekhatir bondkhonn bhogli. Kiristamv ani islam' hea don dhormanchea akromonnasaun hindudhrmachi rakhonn korpakhatir aryosomazan jitlea sonkxttank tondd dilam titlem her khoincheach dhormoponthan divonk na. Ut'tor bhartantlea hindumodim zagritai haddpachem khore xrey ary somazak vota. Ary somazak ek svotontr ponth mhonnun ut'tor bhartant vollkhotat. Tori to hindudhrmaporos vegllo mhunn maninat.
Arya Somazacheo thollaveo, pranti-i ani okhil bharti-i svorupacheo tin sobha asat.Ary somazachi dhormik upasona soptokantlean ek fautt dor aitara sokallochi zata. Upasoneche survek veaspitthalagim ujeant somontrok ahuti ditat, ani upasonek arombh kortat. Hi upasona char voram cholta.
Totva
बदलAryasomazachim mukhel totvam va vichar pronnali oxeo -
- Sogllea yotharth gineanacho ugom' ani sogllea vostunchem adikoronn pormexvor.
- Ixvor ho sochchidanondsvorup asun to onadi, onont, nirakar, nixkolonk, purai xoktiman, sorvosakxi, poromneayi, kakullotest, sogllea somvsarachi nirmonni korun taka pallpi-pospi, dekhun tachem bhozon-puzon korchem.
- Ved ho ixvoracho svas zaun asa. Sogllea yotharth gineanachem mull vedant axil'lean vedanchem odhyoin korop ani korun gheup zonn eka areachem povitr kortouy zaun asa.
- Zonn eka arean soteak pallo divoncho, osteak fatt korchi.
- Veuharant dor ek kortup dhormak pallo divn niti-nem' pallun korpak zai.
- Monxanchi odhibhoutik, somajik, adheatmik ani her gozalint udrogot ghoddoun monisozatichem koleann sadop, ho ary somazacho mukhel ud'dex asa.
- Mogan ani neayan vagop, hem dor eka ary monxachem kortouy zaun asa.
- Ogonean na korun ginean zoddop hem areanchem dhyey zaun asa.
- Fokot svotachea koleannant somadhan maninasotona dusreachi khoxi tich apli khoxi manop.
- Somajik koleannakhatir vavurotona dor eklean apaposantole bhedbhavo-vaittoponn visropak zai. Khajgi ani svotachea hitache nodren zonnekolo aplea motapromann vagpak mekllo asa.
Aryosomazachea hea dha totvam'modolim poilim tin totvam dhormik nodren mhotvachim asat. Uril'lim totvam hea ponthache niti-nem' zaun asat.Svami doyanondan ‘ ved ’ hea utracho orth ginean oso kela. Ved ixvorpronnit asun sogllea xastranchim mulot'tvam tatunt aspauleant. Tim svoimsidhd ani sotyosvorup asat.Monisozatichea voigoneanik ani pormarthik vicharancho ugom' vedant asa mhunn char vedoch tamnni promann manleat. Brahmonngronth, so xastram, smriti ani otthra purannam tannem promann mhunn many korunk nat. Mull vedant murtipuza, ovtarovad, tirth, vrotam, pourannik onuxtthanam ani herancho purskar na. Takalagun aryosomazachea prourtokamni heo gozali manun gheunk nat. Tamnni xradhdam bond kelim ani puroitankoi kaddun uddoile. Ram'-krixnn he devache ovtar nasun te vhodd mhapurus asat oxem hea ponthachem mot asa. Hindunche solla somskar aryosomaz manta. Te bhair dor ek aryosomaji dadlean fuddle ponchmohaigone korpakuch zai oxi ary somazachi agonea asa.
1. Brohmoigone- sondhea ani neman vedpotthonn 2. Deuygone- ognik ahuti divp 3. Pitriyogone-zannttea monxanchi seva 4. Otithiygone- vidvan soireank va somneaxank jeunn divp 5. Boliygone- kudd'ddo, opongull, onath toxench monzatink on'n divp.
Bhartak porthun voidik margar vhorop ani sogllea somvsarak voidik dhorm' xikoup hi ary somazan aplim kortoveam manlim. Teach vangdda vedancho prosar ani udhdaroi kelo. Vedanchem odhyoin korpacho odhikar soglleank asa oxem ho somaz manta. Zatibhed va osprixyotai aryosomaz manina. Punn gunnokrmancher adaril'le chaturvornny manta. Dekhik- top, ginean ani xanti he gunn axil'lo brahmonn, virourit'ti ani fuddaroponnacho gunn axil'lo kxotriy, duddu ektthaupant huxar axil'lo voixy, tor kuddichea xromak mhotv divpi xudr oxem ho ponth manta.
Aryosomazan jivo, prokriti ani brohm' him tin totvam vegvegollim manleant. Mokx zoddop hem dor eka monxachem dhyey asun dor eklean tem svotachea yotnamvorovim melloupak zai. Mokxachi purai toyari korpak mellchi mhunn ixvoran purnojlmachi yeuzonn kelea. Oxem aslem tori ixvorachi sot'ta moreadit asa oxem tachem mot asa.
Aryosomazak ‘ niog ’ podhdot many asa. Aryosomaz ghovo-bail, vidhva-vidhur hankam sokoilea nemankhala niog sombondak porvanogi dita.
1. Dadlo/bail, rog va her karnnank lagun bhurgim zaupak osomrth tharlear. 2. Ghovo dhormik karnnankhatir, odhyoin korpakhatir va poixe zoddpachea havesan kaim tharavik kall ghor soddun gelear. 3. Ghovo va bail vaitt va koddu uloupi aslear. 4. Bail vanjh aslear va logna uprant atth vorsam meren bhurgem zalem na zalear. 5. Zolmol'lim sogllim bhurgim olpayuxi tharlear. 6. Bailek soglleo choleo zalear. 7. Zor bail gurvar asa va khub kallmeren duyent aslear toxench ghovo duyent aslear ani dogam'modlea ekak zor zuvanoponnak lagun ‘ kam' ’ allbonda hadduk zomna zalear, niog acharopak horkot na.
He nem' korpafattlean vyobhichar, zarokrm' allabonda haddop, puruxosontot nirmann korop, kamvikarachem xomon korpak niticho marg dakhoup he het asle. Punn doyanondachem niogot'tv achronnant haddop mat tachea onuyayank zomlem na.
Survek somazachea prourtokamni apli motam va totvam lokank pottoupakhatir khub yotn kele. Virodhi motachem khonddon kelem. Teuporant tamnni vidhaik vaur hatant gheun gurukulam, mohavidealoyam,hordvarolagim kangddi hangachem gurukul, vixvovidealoyam, madhyomik xalla, onathaloyam, vidhvaxrom' sarkeo somstha suru keleo. Sonatoni hindudhrmiyanchea virodhak tondd divn vedpronnit dhormachea punrut'thanachem vhodd kary kelem. Hea somazachi prouddh vivah, punrvivah, zatinax, vornn rochnnuk, osprixeancho udhdar, gunnokrmovibhag him totvam atam hindunk many asat.
Udoipurocho moharaz, lala mulraz, lala ramxoronnodas ris, mohnolaloji bixnnulaloji, lala zogn'nath, gopall hori dexmukh (lokhitovadi), ponddit xeamji krixnnourma he ary somazache podadhikari asle. Brohmibhut svami xrodhdanondak aryosomazacho hutatmo mantat.
Prarthonasomaz va brahmosomaz hancheporos aryosomazacho sorvosamany, bhousacher chodd probhavo asa.