Gurvachar vo Gorbhestponn
| |
Romi
|
Gorbhopat: 28 soptokam purai zauchepoilinch gorbh gorbhaxoyantlean bhair poddop ani gurvaroponnacho xeutt zaup, haka gorbhapat oxem mhonnttat. Hachem karonn mhollear 28 soptokam zauchepoilim gorbh auychea gorbhaxoyabhair svotontroponnan jieunk xokna. Bhartabhair her boreach fuddaril'lea dexamni mat novea voijki upkoronnank lagun 20 soptokam purai zal'lo gorbh jivo urta.
Ddimbpexichea (Ovum) doxank lagun gorbh morta va vyong axil'lo zolmak yeunk xokta. Gunnsutranchea (Chromosomes) doxank lagun auyk koslem-i duyems dekhik- zor yeun, goddem'mut, rogtodab vaddu, kallzachem duyems, pottacher mar bosun gorbhaxoyant vyong va dox toyar zaun, zuvllim bhurgim axil'lean, gorbhaxoyant udok (hydramnios) chodd axil'lean, nallichi gantth poddil'lean ani gorbhoxoyachi rogot purounn bond poddil'lean oxa torekovar karnnank lagun gorbhopat zaum yeta.
Prokar: 1. Opurai gorbhopat (incomplete abortion) : gorbhacho kaim onx bhair poddtta ani uril'lo gorbhaxoyantuch urta. 2. Purai gorbhopat (complete abortion): purai gorbh bhair poddtta. 3. Chukil'lo gorbhopat (missed abortion): gorbh morta ani gorbhaxoyantuch borech dis urta. 4. Sonkttomoi gorbhopat (threatened abortion): gorbhopat zaunk niktich survat zata, punn gorbh choddso gorbhosuvatesaun vegllo zaina ani gurvaroponn fuddem vochunk xokta. 5. Oprihary gorbhopat (inevitable abortion): gorbh bhair poddpachi prokia samki fuddem pauta ani gurvaroponn samballopakhatir kainch korunk zaina. 6. Pum va mater zal'lo gorbhopat (septic abortion): gorbh poilim morta ani taka samsrgik zontu lagtat, haka lagun gorbhosuvatek somsrgodox toyar zata. 7. Donddni-i gorbhopat (criminal abortion): naka axil'lea gurvaroponnantlean suttpakhatir, gorbhaxoyant koslich vost ghalun gorbh noxtt korpacho yotn zalear gorbhosuvatek mar bosta. Ken'na ken'nai burak legit zat. 8. Punrudbhovi gorbhopat (recurrent abortion): tin va chodd fautt gorbhopat zaup.
Lokxonnam: 1. Gurvar bailechea angar rogot zaup. 2. Pottant va fattint dukhop. 3. Protyokxant gorbh va tache kuddke yonintlean bhair sortona disop. 4. Angar puddikoracho stravo zaun ghann yeup. 5 purai gorbhopat zal'lo aslear gurvaroponnachim sogllim lokxonnam somptat.
He bhair yonichi topasonni (per vaginal examination) korit zalear rogot va pujikoracho stravo dixtti poddtta. Hatan topasotokoch gorbhaxoyacho akar sodchebhoxen lhan lagta ani gorbhosuvatechem tondd bond zal'lem asta.
Upai: rogtacho stravo thamboupakhatir ani dukh chodd aslear ximrentlean vokhod divn mel'lo gorbh bhair kaddop,12 soptokamporos unno aslear xostrancho upeg korun gorbh bhair oddun kaddop (D and C).
Sonkttomoi gorbhopat aslear, gurvar bailek svosth nhidoup, chodd tokalos gheup na, upxamok va nhid yeupachem vokhod divp, gorbhaxoyache snayu nivllaup, gurvaroponn fuddem choloupakhatir gorbh samballopachem hormon divp.
Pum va mater zal'lo gorbhopat zalear-gurvar bailek hospittolant dourop, dhonnkuttechem injesamv divp ani rogot divp. D and C korun gorbhaxoi saf korop ani vell poddlear xostrokria korun purai poklli nitoll korop (Laparotomy).
Gurvar bailechea jivitak ani poreayan gorbhaxoyantlea bhurgeak dhoko nirmann zait zalear kritrim' podhdotin gorbhopat korpachi chal poilimsaun asa. Oxa prokaroche gorbhopat khasa gorbhavixinchem xikxonn ghetil'lea dotorankoddlean korun ghetat. Oso kritrim' gorbhopat korpacheo boreo podhdoti asat ani oxa prokarocho gorbhopat korpavixim kaidey asa bharot sorkaran 1972 to voijki gorbharoponn somapti kaido (Medical termination of pregnancy act) lagu kela. Hea kaidea vorvim khoinchey bailek zor gurvaroponnacho mansik va kuddicho tras zata, zalear va her kosleoi oddchonni asta zalear dekhik-gurvaroponn bolat'tkaraurovim ailear va bhurgeak koslem-i vyong zaupachi xokyotai aslear tinnem gorbhopat korun gheupakhatir 20 soptokam purai zauche poilim hospittolant vochunk yeta.
Logn zal'lea zoddpeak kuttumb niozonache podhdotiche chukik lagun zor gurvaroponn yet, zalear gorbhopat korpacho purai hokk bharot sorkaran dila.