Juanv pormannem Jezu Kristachem Xubhvortoman
| |
Romi
|
|
1:1 Orombak Sobd aslo, ani Sobd Deva sovem aslo ani Sobd Dev zaun aslo. 2 Survatek To Deva sovem aslo; 3 Tache vorvim sorv vostu rochleat ani rochleleam vostum modem Tache vinnem ailelem kaich nam, 4 Tache sovem jivit aslem, ani tem jivit zaun aslem mon'xancho uzvadd. 5 Uzvadd kallokant porzollta, ani kallokan uzvaddak attapunk nam. 6 Devan dhaddlolo ek monis aslo: tachem nanv Juanv. 7 Sogttamnim bhavart dovorche khatir uzvadda vixim govai diunk mhonn to govai koso ailo. 8 To apunnuch uzvadd nhoi aslo, punn uzvadda vixim govai diunk to ail'lo. 9 Dor eka mon'xak uzvaddaitolo niz uzvadd Sobd zaun aslo. 10 To sonvsarant aslo, ani sonvsar Tannench rochlolo, tor-ui sonvsaran Taka ollkhunk nam. 11 Apleam modem To ailo, ani Tachech porjen Taka manun ghetlo nam. 12 Punn Apnnak manun ghetleleam somestank, Aplea nanvacher visvas thevteleank, Devachim bhurgim zaunchem Tannem dennem dilem. 13 Hankam rogtan nhoi, kuddiche voddnnen nhoi, mon'xache khuxen-ui nhoi, punn Devan zolm dila. 14 Sobd monis zalo ani amche modem jielo; To kurpen ani sotan bhorlolo; Tachi mhoima amim dekhlea; hi mhoima Bapachea ekleach Putachi khaxa mhoima. 15 Tache vixim govai diun, Juanvan arddun mhonnlem: "Hanvem tumkam oxem sanglelem: 'Zor-ui To Mhoje uprant ieta, tor-ui Mhoje adim aslo dekhun, To Mhoje-von vhodd', oxi hanvem tumkam zachi khobor sanglea to Hoch." 16 Ani Tache sopurnnaientlem amim sogleamnim ghetlam; kurper kurpa. 17 Somurt Moizesa vorvim dil'li; kurpa ani sot Jezu Krista vorvim aileant. 18 Devak konnem kodinch polleunk nam; punn Bapachea gopant asa tea ekleach Putan Tachi ollokh dilea.
19 Hi Juanvachi govai: tum konngai mhonn tache lagim vicharcheak, jednam Judevamnim iadnikank ani levitank Jeruzaleak thaun pattoile, 20 tannem sarkem porgott kelem, tannem nam mhonnlemna; tannem ugtteponnim sanglem: "Hanv Krist nhoi". 21 Ani tannim taka mhonnlem: "Tum konn tor? tum Elias?" Tannem tankam mhonnlem: "Hany Elias nhoi". "Tum provadi bi?" Ani tannem mhonnlem: "Nam". 22 Tednam tannim taka mhonnlem: "Oxem zalear, tum konn? Amkam pattoileat tankam amim kitem sangchem? Tujech vixim tum kitem mhonntai?" 23 Juanvan mhonnlem: "Izaias bhaknnaran sangun dovorlam: "Sorvesporachi vatt nitt korat, oso oronneant ek tallo bob marta' hotallo hanv". 24 Tankam Farizevamnim pattoilele. 25 Tannin tache lagim anink-ui vicharlem: "Tum Krist nhoi, Elias nhoi ani provadi-i nhoi zalear, snan koxem ditai?" 26 Juanvan portipall kelo: "Hanv snan ditam to udkan ditam; punn tumche modem eklo asa zaka tumi ollkhonant. 27 To Mhoje uprant ietolo, punn tacheam vhannanchi vadi soddunk mhaka favo nam". 28 Hem Betanient, Jordanache poltoddi, Juanv snan ditalo thoi ghoddlem.
29 Dusrea disa Juanvan Jezuk apnna-xim ieta to dekhlo ani mhonnlem: "Polleiat ho Devacho Menddro, sonvsarachem pap kaddta to! 30 Hachich khobor sangun hanvem tumkam oxem mhonnlam: 'Mhoje uprant konneklo ieta, punn Mhoje adim to aslo dekhun to Mhoje von vhodd'. 31 Hanvuch Taka ollkonaslom, punn Tachi ollokh Izraelak diuncheak hanv udkan snan diit ailam." 32 Ani Juanvan oxi-i govai dili: "Parveachea rupan sorgarthaun Atmo denvlo ani Tacher tharlo to hanvem dekhlo. 33 Hanvuch Taka ollkonaslom, punn Zannem mhaka udkan snan diunk dhaddla, Tannem mhaka mhonnlem: 'zacher tum Atmo denvlolo ani tharlolo dekhxi, Toch Povitr Atmean snan ditolo.' 34 Hem hanvem dekhlam, ani ho Devacho Put mhonn hanv govai ditam".
35 Dusrea disa Juanv apleam dogam xisam sangata novean thoi aslo; 36 ani Jezuk choltanam tannem dekhlo ani, mhonnlem: "Ho polleiat, Devacho Menddro!" 37 Him tachim utram aikun, te dog xis Jezu pattlean gele. 38 Tednam vollon ani Apnna pattlean ietale te polleun Jezun tankam mhonnlem: "Tumkam kitem zai?" Tannim Taka zabab dilo: "Rabbi" - mhonnge Guruji — "Tum khoi rautai?" 39 Tannem tankam mhonnlem: "Ieiat ani polleiat". Te gele ani To rautalo ti svat tannim dekhli; ani to dis te Tache xim raule. Sanjechim sumar char vazlelim. 40 Juanvachim utram aikun, Jezu pattlean gel'le team dogam bhitorlo eklo, Andre, Simanv Pedrucho bhav aslo. 41 Dusre sokallim Andre, Simanv aplea bhavak mell'lo; tannem taka mhonnlem: "amkam Mesias - mhonnge Devan makhlolo - mell'la". 42 Ani tannem Simanvak Jezu-xim vhelo. Tacher barik nodor ghalun Jezun mhonnlem: "Tum Simanv, Juanvacho put; tuka nanv ghalchem asa Kefas", - mhonnge khoddop.
Jezu Filipak ani Natanaelak Apoita
बदल43 Fuddlea disa, Jezun Galileiak vochunk ievjilem; tednam Taka Filip mell'lo; ani Jezun taka mhonnlem: "Mhoje pattlean ie". 44 Filip Betsaidecho aslo; Andre ani Pedru, he-i teach nograntle asle. 45 Filipak Natanael mell'lo, ani tannem taka mhonnlem: "Moizesache Somurtint ani provadeancheam pustokamnim zachi khobor asa, to amkam mell'la: to Nazaretcho Jezu, Juzecho put". 46 Natanaelan taka mhonnlem: "Nazaretantlem kitem borem ieum iet?" Filipan taka mhonnlem: "Ie ani polle". 47 Jezun Natanaelak Apnna-xim ieta to dekhlo ani tache sovem koslench baskollponn nam!" 48 Natanaelan Taka mhonnlem: "Tum mhaka khoi ollkhotai?" Jezun taka zabab dilo: "Filipan tuka apounche adim, tum anjirachea zhadda tolla astanam, Hanvem tuka dekhlo." 49 Natanaelan Taka portipall kelo: Guruji, Tum Devacho put, Tum Izraelacho Raza!" 50 Jezun taka mhonnlem: "Tuka anjirachea zhadda tolla dekhlo, itlench tuka Hanvem mhonnlem dekhun, tum visvas dhortai? Heam-von odik vhoddleo vostu tum dekhtoloi". Ani taka mhonnlem: "Hanv tumkam sot sangtam, sorg ugtto zal'lo tumi dekhteleat, ani Devache dut Mon'xachea Putacher choddlele ani denvlele tumi polleteleat".
2:1 Tisrea disa Galileiachea Kana ganvant ek logn aslem, ani Jezuchi avoi thoi asli; 2 tea lognak Jezuk-ui ani Tacheam xisank apovnnem aslem. 3 Soro somplo. Tednam, Jezuche avoin Taka mhonnlem: "Tanche lagim soro nam". 4 Jezun tika mhonnlem: "Ostore, tuka ani Mhaka hem kiteak poddlam? Mhozo vell azun pavunk nam". 5 Tache avoin chakrank mhonnlem: "To sangit titlem-i tumi korat." 6 Thoi Judevanche xudhi korpache riti pormonnem fatrachim so donnam aslim; dor-ekant char te so kollxe zatale. 7 Jezun tankam mhonnlem: "Donnam udkan bhorat". Ani tannim tim oto-sor bhorlim. 8 Tannem tankam mhonnlem: "Tantlem kaddun logna-jevnnachea karbhareak vhorun diat". Tannim toxem kelem. 9 Karbharean soro zal'lem udok chakun pollelem. To soro khoicho ailo tem to nokllo aslo, punn udok kaddlele te chakor mat zanno asle. Dekhun karbharean novreak apoun haddlo, 10 ani taka mhonnlem: "Soglleanger poilo boro soro ditat, ani lok borench pietoch, holko to vantt'tat. Punn tunvem boro soro atam porian dovorlai". 11 Hi apleam khunnam modli poili khunna Jezun Galileiachea Kana ganvant keli, ani Apli mhoima dakhoili; ani Tacheam xisamnim Tacher visvas thevlo. 12 Tea uprant, Aple avoik, bhavank ani xisank sangatak gheun to Kafarnaum gelo; punn tim chodd-xe dis thoi raulimnant.
13 Judevanchi Paskanchi porob lagim pauleli; Jezu Jeruzaleak gelo. 14 Devmondirant boil, xellio ani parve viktale te, ani savkar aplea veparachea manddar boslele te Taka sampoddle. 15 Tannem dorianchi ek soiti keli, ani ti gheun tankam sogleank, xelliam boilam soit, Devmondirantle dhanvdaile, savkaranche duddu otle ani tanche mandd omtile. 16 Parve vikteleank Tannem mhonnlem: "Hem sogllem hangasorlem kaddat; ani Mhojea Bapachem ghor tumi veparachem ghor korum nakat". 17 "Tujea ghorachea mogan hanv lastam", oxem boroielem asa mhonn Tacheam xisank tednam ugddas ailo. 18 Judevamnim Taka mhonnlem: "Oxem korunk Tuka podvi asa mhonn kosli khunna Tujean amkam dakhounk zata?" 19 Jezun tankam portipall kelo: "Hem mondir tumi moddat, ani tin disamnim Hanv tem novean bandun ditam". 20 Judevamnim Taka mhonnlem: "Hem mondir bandunk sovechallis vorsam laglim ani tin disamnim tem Tum novean bandtoloi?" 21 Punn To Aple kuddichea mondirachi khobor kortalo. 22 Jednam Jezu meleleantlo jivont zalo, tednam Tannem oxem mhonnlelem mhonn Tacheam xisank ugddas zalo; ani Jezun uloilelea utracher ani Povitr Pustokacher tannim visvas thevlo. Jezuk Sogleam Mon'xanchi Ollokh Asa 23 Paskanche porbek To Jeruzaleant astanam Tannem kel'leo khunna polleun puskoll lokan Tacher visvas dovorlo; 24 punn Jezun zalear Aplo visvas tancher thevlona, 25 kiteak To soglleam mon'xank ollkhotalo, ani mon'xanchi ollok mellun gheuncheak konnanchech govaiechi Taka goroz nasli; mon'xachea monant kitem cholta tem Taka thavem aslem.
3:1 Farizevanchea pokxantlo, Judevancho eklo mukheli, Nikodem nanvacho, konneklo monis aslo. 2 To ekdam ratcho Jezu-xim ailo. Tannem Jezuk mhonnlem: "Guruji, Tum Deva koddsun ailolo xastri mhonn ami zannonv, kiteak apnna sovem Dev nam zalear, tum kortai tosleo khunna konnuch korunk xokonam". 3 Jezun taka portipall kelo: "Hanv tuka sot sangtam: voir thaun zolmolea bogor konnachean Devachem raj polleunk zainam". 4 Nikodeman Taka mhonnlem: "Mhataro zalolo monis koso mhonn zolmotolo? Tachean anink ek pavt aple avoichea kusveant bhitor sorunk ani zolmunk zait?" 5 Jezun portipall kelo: "Hanv tuka sot sangtam: udkacho ani Atmeacho zolmolea xivai konnuch Devachea Rajeant bhitor sorunk xokona. 6 Jem masa-rogtachem zolmota tem mas-rogot, ani jem Atmeachem zolmota tem atmo. 7 Novean zolmunk zai, oxem Hanvem tuka mhonnlam dekhun tum ojap zaum naka. 8 Varem apnnak zai tevxilean marta, ani tum tacho avaz aikotai, punn khoichem ieta vo khoi veta tem tum noklloi; zo konn Atmeacho zomola tache sovem toxench ghoddta." 9 Nikodeman Taka porot mhonnlem: "Hem koxem zaum ieta?" 10 Jezun taka zabaab dilo: "Tum Izraeli porjecho xastri ani tori tum hem noklloi? 11 Hanv tuka sot sangtam: ami zannanv tem uloitanv, ani amim dekhlam tachi govai ditanv, punn tumi amchi govai manun ghenant. 12 Tumkam sonvsaracheam vostunchi khobor sangtam tednam tumi sotmaninant; sorgincheam vostunchi khobor sangin tor tumi ti koxi sotman'xat? 13 Sorgar thaun denvlelea ani sorgar rautelea Mon'xachea Puta bogor konnuch sorgar choddunk nam. 14 Ani zoxem Moizesan oronneant sorop ubarlo, toxench Mon'xachea Putak ubarunk zai, 15 Tacher visvas thevte leam somestank sasnnachem jivit mellcheak. 16 Devan sonvsaracho itlo mog kelo ki Tannem Aplea ekleach Putak vopun dilo, Tacher visvas thevtat team sogleancho nas zainam zauncheak, punn tankam sasnnachem jivit mellcheak.. 17 Kiteak Devan Putak sonvsarant dhaddla, sonvsaracher khastichem formonn marunk nhoi, punn Tache vorvim sonvsarachem taronn zauncheak. 18 Zo konn Tacher visvas thevta, taka khastichem formonn nam; punn zo konn Tacher visvas thevinam, tacher khastichem formonn poddlelem asa, kiteak tannem Davachea ekleach Putachea nanvar bhavart dhorunk nam. 19 Ani ho asa nivaddo: sonvsarant uzvadd ailo, punn mon'xamnim uzvadd soddun kallokacho odik mog kelo, kiteak tanchim kortubam noxttim aslim. 20 Zo konn khotteponn korta to uzvaddak kanttallta, ani aplim kortubam koslim tim kollon ienam zauncheak to uzvaddak ienam. 21 Punn sota pormonnem cholta to, apleo kornio Deva sovem keleat mhonn ugddapim kollon ieuncheak, uzvaddak ieta."
Jezu ani Juanv
बदल22 Uprant Jezu ani Tache xis Judeiant gele; thoi To tanchea sangata raulo ani snan ditalo. 23 Salima lagim, Aenonant, thoi udok chodd dekhun, Juanv-ui snan ditalo; ani lok thoi vetalo ani snan ghetalo. 24 Juanvak azun bondkhonnin ghalunk naslo. 25 Ekdam Juanvacheam kei xisamnim eka Judeva lagim xudhi vixim vivad suru kelo. 26 Ani te Juanva-xim aile ani mhonnunk lagle: "Guruji, Jordana poltoddi zo tujea sangata aslo ani zache vixim tunvem govai dilii, to polle hanga apunnui snan dita ani sogllo lok tache-xim veta". 27 Juanvan zap diun mhonnlem: "Devan dilea xivai konnak keich mellonam. 28. 'Hanv Krist nhoi, punn Tache fuddem mhaka dhaddla', oxem hanvem mhonnlam mhonn tumich Mhoje vixim govai ditat. 29 Hokol mhollear novreachich; taka lagim aslolo novreacho ixtte, novreacho tallo aikun, vhoddle khuxalkaien murgott'ta. Hich mhoji khuxalkai, ti atam bhoron ailea. 30 To vaddot-vaddot vochunk zai, punn hanv zalear odik-odik Ihan zaunk zai."
Jezu Sorgar thaun Denvla
बदल31 o Zvoir thavn ieta To soglleam-vêin vorto. Zo prithumentlo upzota to prithumecho, ani tachem ulovnnem prithumechem. Zo sorgincho ieta To soglleam-von vorto 32 Apnnem dekhlam ani aikolam tachi To sakxi dita, toripunn konn Tachi govai manun ghena; 33 Tachi gova manun gheta to monis Dev sotevont mhonn ruzu korta 34 kiteak Zaka Devan pattoila To Devachim utram uloita: Dev Taka map-mezop nastana Atmo dita; 35 Bap Putacho mog korta ani Tannem soglleo vostu Tachea hatant dileat. 36 Zo Putacher bhavart dhorta, tache sovem sasnnachem jivit asa; zo Putacher bhavart dhorinam, to jivit bhogunk paunchona, punn Devacho krodh aplea mathear haddta.
4:1 Snan diun Apunn Juanva-von odik chodd xis korta, oxem Farizevanchea kanar poddlam mhonn Jezuk gomun ailem. 2 Khorem mhollear Jezu Apunnuch snan dinaslo, punn snan ditale te Tache xis. 3 Tednam To Judeiantlo bhair sorlo ani portun Galileiant gelo. 4 Taka Samarientlean vechem poddtalem. 5 Sikar nanvachea Samariechea eka nogrant To paulo; Jakoban Juzek aplea putak dil'lea bhatta laginch ho nogor aslo. 6 Jakobachi bai thoi asli, ani Jezu cholun-cholun thoklolo dekhun, baichea kanttar boslo. Sumar donpar zal'lo. 7 Samariechi ek bail udok kaddunk thoi aili. Jezun tika mhonnlem: "Mhaka ilem pieunk di". 8 Tache xis jevnnak kitem-i gheunk mhonn nogrant gel'le. 9 Samarieche bailen Taka mhonnlem: "Tum Judev ani hanv Samariekarnn, tor koso mhonn Tum Mhoje kodde pieunk magtai?" Khorem mhollear Judevank ani Samariekarank poddonam. 10 Jezun tika portipall kelo: "Devachem dennem koslem tem tuka tor gomlelem ani 'Mhaka pieunk di' oxem tuka mhonnta to konn to tum zanno asli zalear, tunch tache kodde magteli asli ani to tuka jivem udok ditolo aslo". 11 Bailen Taka mhonnlem: "Saiba, udok kaddunk Tuje lagim kaich nam, ani bai khol asa, tor Tuje kodde jivem udok khoichem? 12 Jakob amchea Bapa poros Tum vhodd kitem? Tannem amkam hi bai dili» apunn tichem udok pielo, toxench tachim bhurgim ani tachim gorvam". 13 Jezun tika mhonnlem: "Hem udok pietattankam soglleank portun tan lag teli, 14 punn Hanv diin tem udok piet takakedinch tan lagchina; Hanv taka din tea udkachi tache bhitor ek zhor zateliani ti taka sasnnachem jivit diit vhanvteli". 15 Bailen Taka mhonnlem: "Saiba tera udok mhaka di oxi mhaka anink tan lagchina ani udok kaddunk hanga ieunk-ui poddchemna." 16 Jezun tika mhonnlem: "Voch, tujea ghovak apoun hadd ani hanga ie". 17 Bailen zap dili: "Mhaka ghov na". Jezun tika portun mhonnlem: "Mhaka ghov na", hem tunvem sarkem sangleim, 18 kiteak tuka panch dadle asle ani tuzê sangata atam asa to-i tuzo ghov nhoi; hem tunvem sarkem sangleim". 19 Bailen Taka mhonnlem: "Saiba, Tum provadi mhonn mhaka atam koll'lem. 20 Amcheam purvozamnim hea dongrar Devak bhozlo, punn tumi Taka Jeruzaleantuch bhozunk zai mhonn sangtat". 21 Jezun tika mhonnlem: "Mhojem aik, bai: tumi hea dongrar zaum vo Jeruzaleant zaum Bapak bhozchimnant oslo vell ieuncho zalo; 22 tumi ollkhonant Taka bhoztat: ami zalear ollkhotanv Taka bhoztanv, kiteak taronn Judev lokantlem ieta. 23 Punn oslo vell ieta, khorench mhollear ho vell paulo, ki khore bhozpi atmean ani sotan Bapachi bhokti kortele kiteak mhollear oslech bhozpi Bap sodta. 24 Dev Atmo, ani Tacheam bhozpiamnim Taka atmean ani sotan bhozunk zai". 25 Bailen Taka mhonnlem: "Mesias — mhonnge Devan makhlolo — ieuncho asa mhonn hanv zannom. To ietolo tednam amkam sogllem sangtolo". 26 Jezun tika mhonnlem: "Hanv to, tuje koode uloitam to". 27 Teach vellar Tache xis thoi paule, Ani eke baile lagim To uloita mhonn tankam ojap dislem, punn "tichem Tuka kitem zai?" vo "tiche kodde TuM kiteak uloitai?" oxem konnench vicharlemna. 28 Tednam ti bail udkacho kollso thoich sanddun nogrant geli ani lokak mhonnunk lagli: "Hanvem kelam titlem-i konneklean mhaka sanglam; 29 ieiat ani taka polleiat; hoch Krist zait gai?" 30 To lok nograntlo bhair sorun Taka mellunk ailo. 31 Itlea mhonno-sor xis Tache kodde magtale: "Guruji, jeu-ia". 32 Punn Tannem tankam mhonnlem: "Mhaka jem khannjevonn asa tachi tumkam ollokh nam". 33 Dekhun xis ekamekak mhonnunk lagle. "Taka konnem jeunk haddun dilam gai?" 34 Jezun tankam mhonnlem: "Zannem Mhaka pattoila Tachi khuxi korunk ani Tachem kam xarti pavounk, hench Mhojem khann-jevonn". 35 "Char mhoine, uprant lunvnni", oxi tumche modem mhonn'nni asa nhoi? Hanv tumkam sangtam: tumche dolle uklun polleiat, xetam zalim dhovim, lunvchim zalim! 36 Lunvta to apli mozuri gheta ani sasnnachea jivitak pik ektthai korta, ani oxe vompi ani lunvpi borobor sontostat. 37 Hanga hi mhonn'nni lagta: 'eklo vompta, dusro lunvta'; 38 jea xetache koxtt kaddunk nant, tea xetant tumkam hanvem lunvunk dhaddleat; dusreamnim tache koxtt kadleat, ani tancheam koxttanchea follant tumkam bhag mell'la". 39 "Hanvem kelam titlem-i tannem mhaka sanglam", oxi te bailen govai dil'li dekhun, tea nograntlea puskol, Samariekaramnim Tacher visvas dovorlo. 40 Dekhun Samariekar Tache-xim aile tednam, apnna-xim rau mhonn tãnnim Tache kodde maglem; anti thoi To don dis raulo. 41 Ani Tachea utrak lagun anink khup-khup zannamnim Tacher visvas thevlo. 42 Tim bailek mhonntalim: "Atam anink tujeam utrank lagun nhoi, bogor aminch Tachem aikolam dekhun ami sotman'tanv, ani To khoroch sonvsaracho tarok mhonn amkam kollon ailam".
43 Thoi don dis raulea uprant To Galileiak gelo. 44 "Khoicheach provadeak aplea ganv-ghora man mellona",oxi Jezunuch govaiki dil'li. 45 Galileiantlo lok porbek gel'lo; Jeruzaleant porbechea somoiar Jezun kel'lem tem sogllem tannim dekhlem; dekhun, To Galileiant ailo tednam, tannim Taka boro ievkar diun ghetlo. 46 Mhonntoch To annik ek pavtt Galileiachea Kana ganvant ailo; hanga Tannem udkacho soro kel'lo. Ani Kafarnaum eka rajodhikareacho put piddent aslo. 47 Jezu Judeiak thaun Galileiant paula mhonn aikun, to Taka mellunk gelo. Mhornnache tonnir paulelea aplea putak boro korunk ie mhonn to Jezu lagim magtalo. 48 Jezun taka mhonnlem: "Khunna ani vizmitam dekhlea xivai tumi sotman'cheak nant". 49 Rajodhikarean Taka mhonnlem: "Saiba, mhozh bhurgo morche adim ie". 50 Jezun taka mhonnlem: "Voch, tuzo put jivo asa". Jezuchea utrar patieun to monis aple vattek laglo. 51 To vatter astananch tache chakor taka mellunk gele, ani tacho put jivo asa mhonn tannim taka sanglem. 52 Dekhun khoichea vogtar taka borem dislem gai mhonn tannem tankam vicharlem. Tannim taka sanglem: "Kai, donparchem ek vaztam tacho zor gelo". 53 Jea vellar Jezun apnnak "tuzo put jivo asa" oxem mbonnlelem, teach vellar hem ghoddlem mhonn bapaik gomun ailem, dekhun tannem ani tachea akhea ghorabean Jezucher visvas thevlo. 54 Judeiantlo Galileiant portun ietoch hi Jezun kel'li dusri khunna.
5:1 Hache uprant Judevanchi porob asli ani Jezu Jeruzaleak gelo. 2 Jeruzaleak, Xellianche Tollie lagim, ek bandavoll asa; Hebrev bhaxen tika Bhethzatha mhonntat; tika panch tarangannam asat. 3 Thoi kurdde, thontte, aren dhorlele osle khup piddevont, poddlele asle; te soglle udok haltelem mhonn rautale. 4 Sorvesporacho dut kedna kedna tollient denvtalo ani udok haltalem; udok haltoch zo konn poilo udkant denvtalo to kosle-i piddentlo boro zatalo. 5 Thoi êk piddevont aslo, tache piddek atthtis vorsam zal'lim. 6 Jezun taka dekhlo ani to thoi zaito kail osle gotir aslo mhonn zanno zaun taka mhonnlem: "Tum boro zaunk sodtai?" 7 Piddevontan Taka zap dili: "Saiba, udok halta tednam mhaka tollient ghalunk mhozo konn nam, ani hanv vetam mhonno-sor dusro ieun apunn poilo bhitor sorta". 8 Jezun taka mhonnlem: "Utth, antrunn ukol ani chol". 9 Ani teach vellar to boro zalo ani aplem antrunn uklun cholunk laglo. To dis Son'var aslo. 10 Dekhun piddentlo suttlelea mon'xak Judevamnim mohnnlem: "Az Son'var, tujean antrunn uklum nozo". 11 Tannem tankam zap dili: "Zannem mhaka boro kela, Tannem mhaka oxem mhonnlem: 'tujem antrunn ukol ani chol'" 12 Tannim tache kodde vicharlem; "Tujem antrunn ukol ani chol' oxem tuka konnem mhonlnem?" 13 Konnem mhonnlelem tem boro zal'lo monis nokllo aslo; kiteak thoi ji lokachi lutt zal'li, tiche modem Jezu nanch zal'lo. 14 Uprant to Jezuk Devmondirant mell'lo, ani Jezun taka mhonnlem: "Polle, tum atam boro zalo! anink patok kori naka, na tor tuka kitem-i adle-von paxtt zait". 15 To monis gelo ani apnnak boro kela to Jezu mhonn tannem Judevank sanglem. 16 Ani Jezu osleo vostu Son'vara disa kori dekhun, Judev Tache pattlean laglele. 17 Jezun tankam mhonnlem: "Mhozo Bap kam' korit asa, toso Hanv-ui kam' korit asam". 18 Hea pasot Judev odilkuch Taka jivexim marunk sodtale; karann, To nhoich Son'var moddtalo, punn Devak Aplo Bap mhonnun, Apnnakuch Deva sarko kortalo.
Putacho Odhikar
बदल19 Jezun tankam mhonnlem: "Hanv tumkam sot sangtam, Aplech osttogim Putachean kaich korunk zainam, punn Bap korta mhonn jem To polleta tench To korunk xokta; ani jem Bap korta tench Put-ui korta. 20 Karonn, Bap Putacho mog korta, ani Apunn korta titlem-i Putak dakhoita; ani tumi ojap zauncheak hanche-von vhodd kortutvam To Taka dakhoitolo. 21 Zoso Bap mel'leank utthoita ani tankam jivit dita, tosoch Put Apnnak zai tankam jivit dita. 22a Kiteak Bap konnachich mon'subi korinam; punn 23a zoso Bapak man ditat tosoch Putak-ui sogttamnim man diuncho mhonn, 22b Tannem soglli mon'subi Putachea hatant dilea. 23b Zo Putak manina to Taka dhaddla tea Bapak manina.
Jezuk Govai Divpi
बदल30 Mhojech podven Mhojean kãich korunk zainam; zoso Hanv aikotam toso Hanv nirnnoi ghetam; ani Mhozo nirnnoi niticho, kiteak Hanv Mhoji khuxi nhoi punn Mhaka pattoila Tachi khuxi korunk sodtam. 31 Hanvuch Mhoje vixim govai diin zalear, Mhoje govaiki niz nhoi. 32 Mhoje vixim govai ditolo dusro konn asa, aniji govai To Mhoje vixim dita ti niz mhonn Hanx zannom. 33 Tumi tumcheam niropeank Juanva-xim pattoile, ani tannem sota vixim govai dili. 34 Hanv mon'xanche govaiecher dhorlolo na; punn Hanv oso uloilam zalear tumchea taronna pasot uloilam. 35 Juanv ek zollto ani loklokit divo zaun aslo ani tachea uzvaddak ilo vell murgottunk tumkam borem lislem. 36 Punn Mhaka asa ti govai Juanvache govaike poros vhodd: Jim Bapan Mhaka kamam sompadunk dileant — Hanv kortam tinch kamam — Bapan Mhaka pattoila mhonn Mhoje vixim govai ditat. 37 Ani Mhaka pattoilelea Bapanuch Mhoje vixim govai dilea. Tacho tallo tumim kodinch aikunk na, Tachem rup-ui tumi kodinch polleunk na. 38 ani Tacho Sõbd tumche sovem rigunk nam, kiteak Zaka Tannem dhaddla Tacher tumi visvas thevinant. 39 Xastr-likhitamnim sasnnachem jivit asa mhonn somzun, tumi tim chit ghalun vachtat; khorem mhollear tinch Mhoje vixim sakxi ditat; 40 toripunn tumkam jivit mellcheak Mhoje-xim ieunk tumi raji nant. 41 Mon'xancho zo man Mhaka mellot, tachi Hanv porva korich na. 42 Punn Hanv tumkam pokkim ollkhotam: Devacho mog tumche sovem nanch. 43 Mhojea Bapache nanvim Hanv ailam, ani tumi Mhaka manun ghenant; dusro konn apleach nanvan ailo tor, taka tumi manun gheteleat. 44 Tumkam bhavart koso assum-iet? Kiteak mhollear tumi ekamekacho man gheun khuxi zatat, punn ekleach Deva koddcho zo man ieta taci tumhi porva korich nant. 45 Bapa mukhar Hanv tumkam laun ditolom mhonn somzum nakat; Moizesacher tumi visvas dovortat, tor toch Moizes tumkam laun ditolo. 46 Tumi Moizesacher visvas dovorlolo zalear, Mhojê-rui visvas dovortele asleat, karonn tannem boroilam tem Mhoje vixim boroilam. 47 Punn tacheam borovpancho tumkam visvas nam zalear, Mhojeam utrancho koso mhonn tumkam visvas asum—iet?"
6 Magir Jezu Galileiachea vo Tiberiasachea Doriache poltoddi gelo. 2 Ani lokachi urponz Tache pattlean geli, kiteak piddevontam khatir Tannem kel'leo khunna tannim dekhleleo. 3 Jezu dongar choddlo ani Apleam xisam sangata thoi boslo. 4 Judevanchi Paskanchi Porob lagim pauleli. 5 Aple dolle uklun ani lokachi vhodd urponz Apnaxim ieta ti polleun Tannem Filipak mhonnlem: "Hea lokak khaunk diuncheak khoiche mhonn undde gheumche?" 6 Tachi porikxa korcheak Tannem hem mhonnlem, kiteak Apunn kitem kortolo aslo tem To boro zanno aslo. 7 Fitipan Taka zabab dilo: "Ek-ekleakilo-so kuddko poddtolo zalear, don'xim denaranche undde tankam paunchenant." 8 Tacheam xisam modlea eklean, Andre, Simanv Pedruchea bhavan, Taka mhonnlem: 9 "Hangasor konneklea bhurgea lagim panch undde ani don maslleo asat; punn itlea lokak hem khoi pauta?" 10 Jezun mhonnlem: "Lokak bosoiat": Te suvater zaitem tonn aslem; mhonntoch lok boslo: dadlech sumar panch hozar asle. 11 Tednam Jezun undde ghetle ani Devak dhin'vasun bosleleank te vanttle; têch porim mas-lleo-i vanttleo. Tankam zai titlem vanttun dilem. 12 Ani te dhadoxi zatoch, Tannem Apleam xisank mhonnlem: "Kuddke urleat te ektthãi korat; kãich ibadd zaum noiê." 13 Dekhun, tanchem khaun zatoch, zovacheam panch unddeanche urlele kuddke tãnnim ektthãi kele, ani oxeo bara panttleo bhorleo. 14 Hi tannem kel'li khunna lokan dekhli tednam tãnnim mhonnlem: "Sonvsarant ieuncho asa to provadi dubhava viret hoch to!" 15 Te ieun Apnnak bollan vhorunk ani patxai korunk sodtale mhonn Jezu zanno aslo, dekhun to koddsorun Apunn eklo novean dongrar gelo.
16 Sanz zatoch Tache xis doria-xim gele, 17 eka hoddear choddle, ani Kafarnaum vochunk doria utrunk lagle. Jezu tanchê sorxem paunchê adim kallok zalo. 18 Zonnzonnit varo suttlo ani doria uchamboll zaunk laglo. 19 Sumar tin ki char kilometranchi vatt tanddun kaddtoch, tãnnim Jezuk doriacher cholta ani hoddea lagim pauta to dekhlo. Tankam bhem dislem, 20 punn Tannem tankam mhonnlem, "Hanv to, bhieum nakat". 21 Tednam te Taka hoddeant gheunk kortale, punn, tbõiche-thõich, te vetale te toddik hoddem laglem.
Lok Jezak Sodunk Ieta
बदल22 Dusrea disa, thoi ekuch hoddem aslem ani Jezu Apleam xisam sangata tea hoddear choddunk naslo, punn fokot Tache xis gel'le mhonn poltoddi raulelea lokan pollelem. 23 Tiberiasa thaun anink hoddim tãnnim undde khal'le tea zagea lagim paulelim. 24 Jezu thõi naslo ani Tache xis-ui thõi nasle mhonn tãnnim dekhlem tednam, to lok hoddeamnim choddun Jezuchê sodik Kafarnaum ailo.
25 To tankam toddir mell'lo; tednam tãnnim Taka mhonnlem: "Guruji, Tum hanga kednam ailoi?" 26 Jezun tankam zap diun mhonnlem: "Hanv tumkam sot sangtam, tumi khunna dekhleo mhonn nhoi, bogor undde khaun dhadoxi zaleat dekhun tumi Mhoje sodik aileat. 27 Khaun sorta toslea khanna khatir tras gheum nakat, punn sasnnachea jivitaktogta toslea khanna khatir tras gheiat; oslem khann Mon'xacho Put tumkam ditolo; karann Deva Bapan Tacher Aplo xikko marla". 28 Tednam tannim Taka mhonnlem: "Devak zai tosiim kamam korunk amim kitem korchem?" 29 Jezun tankam mhonnlem: "Zaka Devan dhaddla Tacher visvas dovrat: hench tem Devak zai tem kam." 30 Tannim Taka mhonnlem: "Toxem zalear, Tujer amim visvas dovorcheak kosli khunna korun amkam dakhoixi? Tujean kitem korum-iet?" 31 "Amchea purvozamnim oronneant man'na khelo; 'Tannem tankam sorgincho unddo khaunk dilo', oxem boroilelem asa". 32 Jezun tankam mhonnlem: "Hanv tumkam sot sangtam, Moizesan tumkam sorgincho unddo diunk na; tumkam khoro sorgincho unddo dita to Mhozo Bap, 33 kiteak zo sorgar thaun denvta ani sonvsarak jivit dita toch Devacho unddo". 34 Tannim Taka mhonnlem: "Ho unddo amkam sodam di". 35 Jezun tankam mhonnlem: "Hanv jivitacho unddo; Mhoje-xim ieta taka bhuk lagchina, ani Mhojer visvas dovorta taka kodinch tan lagchina. 36 Punn Hanvem tumkam oxem sanglam: tumim Mhaka dekhla, tori Mhojer tumi visvas dovrinant. 37 Mhozo Bap Mhaka dita tim sogllim Mhoje-xim ietelim; ani Mhoje-xim ietat tankam Hanv poro ghalchonam. 38 Mhoji khuxi korcheak nhoi, punn Mhaka pattoila Tachi khuxi korcheak Hanv sorgar thaun denvlam; 39 ani Zannem Mhaka pattoila tea Mhojea Bapachi khuxi hi: jim sogllim Bapan Mhaka dileant tanche modlea konnakuch Hanvem ibaddcho nhoi, punn nimannea disa tankam sogleank Hanvem novean jivont korchim. 40 Hich Mhojea Bapachi khuxi; jim konn Putak polletat ani Tacher visvas thevtat, tankam soglleank sasnnachem jivit melltelem, ani nimannea disa Hanv tankam novean jivont kortolom". 41 "Hanv sorgar thaun denvlolo unddo" oxem Tannem mhonnlem dekhun Judev Tacher gunngunnunk lagle: 42 Te mhonntale: "Juzecho put Jezu to hoch nhoi? Tachea avoibapaik ami ollkhonanv kitem? 'Hanv sorgar thaun denvlam', oxem Tachean koxem mhonnum-iet?" 43 Jezun tankam zap diun mhonnlem: "Tumchech modem futfutum nakat. 44 Konn-ui Mhoje-xim ailo zalear, Mhaka dhaddla tea Mhojea Bapan taka Mhoje-sim oddun haddla, dekhunuch to Mhoje-xim ieunk xokta; oslea mon'xak Hanv nimannea disa novean jivont kortolom. 45 'Tim sogllim Devan xikoilelim mon'xam zatelim', oxem Provadeancheam borovpamnim mellta. Jim konn Bapachem aikotat ani xiktat, tim sogllim Mhoje-sim ietat. 46 Konnem Bapak dekhla mhonn nhoi, punn Zo Deva thaun aila Tannem mat Bapak dekhla. 47 Hanv tumkam sot sangtam, zo konn visvas thevta taka sasnnachem jivit mellta. 48 Hanv jivitacho unddo. 49 Tumcheam purvozamnim oronneant man'na khelo ani te morun gele. 50 Punn ho asa sogar thaun denvolo unddo: konn-ui to khait zalear morchonam. 51 Hanv sorgar thaun denvlolo jivo unddo; ho unddo khata to sasnnak jieta; ani sonvsarak jivit mellcheak Hanv unddo ditolom to Mhojem mas". 52 Tednam Judevam modem vad-vivad zalo; te ekamekak mhonnuk lagle "Are, ho anink amkam aplem mas khaunk koso ditolo re?" 53 Dekhun Jezun tankam mhonnlem: 'Hanv tumkam sot sangtam, tumi Mon'xachea Putachem mas khelea bogor anr Tachem rogot pielea xivai tumche sovem jivit aschemnam; 54 zo Mhojem maskhata ani Mhojem rogot pieta tache sovem sasnnachem jivit asa, ani taka nimannea disa Hanv jivont kortolom. 55 Kiteak Mhojem mas khorem khann ani Mhojem rogot khorem pivonn. 56 Mhojem mas khata ani Mhojem rogot pieta to Mhoje sovem rauta ani Hanv tache sovem rautam. 57 Zoso jivea Bapan Mhaka dhaddla ani Bapa vorvim Hanv jivo asam, tosoch Mhaka khata to Mhojê vorvim jivo astolo. 58 Ho sorgar thaun denvlolo unddo; tumcheam purvileamnim man'na khelo ani tori te morun gele, toxem hem nhoi; ho unddo khata to sasnnak jivo astolo". 59 Hem Tannem Kafarnaunt xikoitanam devosthanant mhonnlem.
60 Hem aikun, Tacheam xisantleam zaiteam zannamni mhonnlem: "To sangta tem kotthin lagta; konnachean toslem aikun gheum iet?" 61 Haka lagun Apie xis oxe gunngunntat mhonn Apnnachech osttongim zanno zaun, Jezun tankam mhonnlem: "Hem manun gheunk tumkam zodd lagta, 62 Ani Mon'xachea Putak aslo thoi choddtana tumi dekh-xat zalear? 63 Atmo ki jiv dita, mas kiteakuch upkaronam; tumkam Hanvem sangleant tim utram atmo ani jivit. 64 Punn tumche modem visvas dhorinant tosle kai zann asat". Konnkonn visvas dhorche nasle, ani konn Aplo ghat ghetolo aslo, tem Jezu poilinch thaun zanno aslo. 65 Ani Tannem mhonnlem: "Dekhunuch Hanvem oxem sanglam: Bapa koddchem hem dennem ghetlea bogor konnuch Mhoje-xim ieunk xokonam. 66 Hea uprant Tacheam xisantle zaite zann fattim sorungele, ani Tachea sagata anink bhonvonam zale. 67 Jezun bara zannank mhonnlem: "Tumi-i vochunk sodtat?" 68 Simanv Pedrun Taka zabab dilo: "Saiba, konna-xim mhonn ami vetelenv? Tujim utram sasnnachea jivitachim; 69 ani Tum Devan sonskarlolo mhonn amim sot manun ghetlam ani amkam khatri asa". 70 Jezun tankam zabab dilo: "Tumkam bara zannank Hanvem vinchun kaddleat ki na? tori tumche modlo eklo devchar". 71 Simanv Iskariotacho put Judas, hache vixim Tannem oxem mhonnlem, kiteak ho, barantlo eklo zaun-ui, Tacho ghat ghetolo aslo.
7. Jezuchim Soirim
बदल7:1 Tea uprant Jezu Galileiant bhonvunk laglo; Judeiant bhonvchi Taka khuxi nasli, kiteak Judev Taka jivexim marunk sodtale. 2 Judevanchi Tombanchi porob lagim pauleli. 3 Dekhun Tacheam bhavamnim Taka mhonnlem: "Hangasorlo bhair sop ani Judeiak voch, ani Tum kamam kortai tim Tujeam xisank polleum-di. 4 Konn apli ollokh ugddapim diunk sodta zalear, to aplim kamam guptim korina. Tum oslim kamam kortai zalear, Tum khaxa sobhemazar dixtti podd." 5 Tacheanch bhavamni Tacher visvas dhorlonam. 6 Jezun tankam mhonnlem: "Mhozo yell azun paunk na, punn tumcho vell sodanch paulolo asa. 7 Sonvsarachean tumcho dves korunk zaina, punn to Mhozo dves kortach, kiteak Hanv tachim kortubam vaitt mhonn govai ditam. 8 Tumi porbek vochat; Hanv he porbek vochonam kiteak Mhozo vell azun paunk nam". 9 Oxem mhonnun to Galileiant raulo.
10 Punn Tache bhav porbek vetoch Apunn-ui gelo, ugtteponnim nhoi punn konnak kollonastana. 11 Porbechea disa Judev Taka sodtale ani mhonntale: "To khoi asa?" 12 Ani Tache vixim lok zaitem futfuftalo. Konn mhonno: "To boro monis". Ani konn mhonno: "Nam, To lokak fosoita". 13 Toripunn Judevanche bhirantin konn Tache vixim sobhemazar uloi naslo. 14 Porob modem-xi pautoch, Jezu Devmondirant gelo ani xikounk laglo. 15 Hem polleun Judev ojap zaun mhonntale: "Haka zannvai khoichi re? Xikxonn kai na taka", 16 Jezun tankam portipall kelo: "Mhoji xikovnn Mhoji nhoi, punn Mhaka pattoila Tachi; 17 konn Tachi khuxi korunk raji asa zalear, Mhoji xikovnn Devachi vo Mhojeach monantli, tem taka kollon ietelem. 18 Zo konn aplech osttongim uloita, to aplich vhoddvik sodta; punn zo konn apnnak dhaddla tachi vhoddvik sodta, to sota pormonnem cholta; oslea mon'xa sovem lottikponn nam. 19 Moizesan tumkam somurt dilea ki na? Toripunn tunmche modlo konnuch somurt samballina. Kiteak mhonn Mhaka jivexim marunk sodtat?" 20 Lokan mhonnlem: "Tujer devchar bosla! Konn Tuka jivexim marunk sodta?" 21 Jezun tankam zap dili: "Hanvem ek kam' kelam, ani tem polleun tumi sogott ojap zatat. 22 Moizesan tumkam sunôt korcho kaido ghalo (ti Moizesa koddchi mhonn nhoi, punn purvozam koddchi ailea) ani Son'vara disa tumi mon'xachi sunot kortat, 23 Moizesachi somurt moddina zaunk konneka mon'sachi Son'vara disa sunôt zata zalear, Hanvem Son'vara disa eka mon'xachem sogllem ang borem kelam dekhun tumi kiteak Mhaka zolltat? 24 Tonddak polleun nit korinakat, punn promannikponnan nit korat".
Jezu Obhixikt Zait?
बदल25 Jeruzaleantleam kai zannamnim mhonnlem: "Jivexim marunk sodtat to monis ho nhoi? 26 Ani ho polle to sot'ten, uloita ani te taka kaich mhonnonant! Ho khoreponnim Krist mhonn amcheam vhoddilank kollon ailam gai? 27 Tori ho khoicho to ami zannonv; punn Krist dixtti poddtolo tedna, to khoicho to konnak kollchem na." 28 Dekhun Devmondirant xikoitana Jezun vhoddlean mhonnlem: "Tumi Mhaka ollkotat, ani Hanv khoicho ailam, tem-i tumi zannot? Punn Hanv Mhojech osttongim ieunk nam; Mhaka pattoila To sotevont, ani Taka tumi olkhonant. 29 Hanv Tache thaun ailam ani Tannem Mhaka pattoila dekhun Hanv Taka ollkotam". 30 Te Taka dhorunk sodtale; punn konnench Tacher hat ghalunk nam kiteak Tacho vell azun paunk naslo. 31 Tori loka modlean zaiteamnim Tacher visvas dhorlo; tannim mhonnlem; "Krist ietolo tednam, ho monis korta tache-von odik chodd khunna kortolo gai?"
Jezuk Dhorunk Chovkidarank Pattoitat
बदल32 Tache vixim futfutun lok osleo gozali korta mhonn Farizevamnim aikolem. Porom' — Iadnikamnim ani Farizevamnim Taka dhorun haddcheak chovkidarank pattoile. 33 Tednam Jezun mhonnlem: "Anink ilo vell Hanv tumche modem asam ani uprant Mhaka pattoila Tache-xim vetam; 34 tumi Mhaka sodteleat, punn Hanv tumkam mellchona. Hanv asam thoi tumchean ieunk zaina". 35 Judevamnim ekamekak mhonnlem: "Amkam mellona zauncheak ho khoi Vochunk korta gai? Zoi videxeam modem amche lok ximpoddla, thoi videxeank xikovnn diunk vetolo gai? 36 'tumi Mhaka sodteleat ani Hanv tumkam mellchona', ani Hanv asam thoi tumchean ieunk zaina': oxem to mhonnta tacho orth kitem?"
Jivea Udkachi Zhor
बदल37 Porbechea nimannea ani dobajik disa, ubo ravun Jezun vhoddlean mhonnlem "Konnak zor tan laglea tannem Mhoje-xim ieuchem, 38 ani Mhojer visvas thevta tannem pieunchem". Povitr Pustok oxem mhonnta: Tache bhitor-leo udkacheo zhori ghosghoxit vhanvteleo". 39 Jim konn Jezucher visvas thevtelim aslim, tankam Atmo mellcho aslo, hache vixim Tannem oxem mhonnlem. Jezu azun mhoimevont zaunk naslo, dekhun Atmo azun naslo.
Loka Modem Futt
बदल40 Him utram aikun kai zannamni mhonnlem: "Khorench ho ek provadi". 41 Dusreamni mhonnlerd: "Hoch to Krist". Punn heramnim mhonnlem: "Krist Galileiantlo ieum-iet? 42 Krist Davidachê sonstintlo ani Davidachea Belea nogrant ietolo mhonn Povitr Pustokar na?" 43 Oxi, Tache vixim loka modem futt poddli. 44 Kai zann Taka dhorunk sodtale, punn konnench Tacher hat ghalunk na.
Judevancheam Vhoddilancho Ovisvas
बदल45 Tednam chovkidar Porom-Iadnikam ani Farizevam sorxim portun gele. Hannim tankam mhonnlem: "Tumi Taka kiteak dhorun haddunk nam?" 46 Chovkidaramni mhonnlem: "Ho monis uloita te bhaxen kodinch konn ulounk na!" 47 Farizevamni tankam zabab dilo: "Tumi-i fosovleat kitem? 48 Vhoddilantlea ani Farizevantlea konnem tori Tacher visvas dovorlo mhonn asa? 49 Punn ho lok xastrachi ollok naslolo, padd poddlolo!" 50 Tanche modem Nikodem aslo, Jezu-xim adim ailolo to; tannem tankam mhonnlem: 51 "Eka mon'xachem poilem aikolea bogor, ani to kitem korta tachi ollok ghetlea xivai, amchem xastr tachi monsubi korta zait?" 52 Tannim mhonnlem: "Tum-i bi Galiliekar? Chovkoxi korun polle ani tuka kollon ietelem ki eklo-i Provadi Galileiantlo upzona. 53 Te ap-aplea ghora poitole.
8:1 Ani Jezu Ajetinachea Dongrar kaddun gelo. 2 Ani bhov sokallim To novean Devmondirant ailo; soglo lok Tache-xim zomlo ani bosun To tankam xikounk laglo. 3 Dhormxastreamnim ani farizevamnim pordvarant sampoddlele eke bailek haddli ani modem ubi keli. 4 Tannim Taka mhonnlem: "Guruji, hi bail atanch pordvarant sampoddlea. 5 Xastrant Moizesan osleank fatraun marcheak amkam formailam. Tor tum kitem mhonnta?" 6 Tacher boglantt ghalunk ek koslem-i nib sodun kaddcheak tannim oxem mhonnlem. Voddov ghalun Jezu Aplea bottan zomnir borounk laglo. 7 Ani te Tache kodde vicharit raule dekhun, ubo raun Tannem tankam mhonnlem: "Tumche modem zaka patok nam, tannem ticher poilo fator marche". 8 Anink ek pavtt voddov ghalun To zomnir boroit raulo. 9 Hem aikun, te soglle, eka pattlean eklo, koddsorun gele, odik zannte te poile. Ekloch urlo Jezu ani modem ubi asli thoch, ti bail. 10 Novean nitt zaun Jezun tika mhonnlem: "Bai, te khoi gele? Konnench tujer khastichem formonn marunk na?" 11 Tinnem mhonnlem: "Konnench na, Saiba". Ani Jezun mhonnlem: "Hanv-ui tujer khastichem formonn marina; voch ani hea fuddem anink patok korum naka".
12 Uprant Jezun novean tanche kodde uloun mhonnlem: "Hanv sonvsaracho uzvadd, Mhozo pattlav korta to kallokant cholchona, punn taka jivitache uzvadd astolo." 13 Tedna Farizevamni Taka mhonnlem: "Tum Tujech vixim govai ditai; Tuji govai khori nhoi". 14 Jezun portipall kelo: "Hanv Mhojech vixim govai ditam zalear-ui, Mhoji govai khori; karann, Hanv khoicho ailam ani khoi vetam tem Hanv zanno; punn Hanv khoicho ailam ani khoi vetam tem tumi nokllot. 15 Tumi masa-kuddiche nodren mon'subi kortat; Hanv konnachich mon'subi korinam. 16 Punn mon'subi korin zalear Mhoji mon'subi khori: kiteak Hanv ekloch nam: Zannem Mhaka pattoila To Mhozo Bap Mhoje borobor asa. 17 Doganchi govai khori mhonn tumchea Xastrant boroilelem asa. 18 Hanv Mhojech vixim govai ditam, ani Zannem Mhaka pattoila to Mhozo Bap Mhoje vixim govai dita". 19 Tea pasot tannim Taka mhonnlem: "Tuzo Bap? Khoi asa re to?" Jezun zap diun mhonnlem: "Tumi Mhaka ollkenant ani Mhojea Bapak-ui ollkonant; tumi Mhaka ollkol'lo zalear, Mhojea Bapak-ui ollkotele asleat". 20 Him utram Devmondirant xikoitana dhorm-dananche pette-xim To uloilo; punn Tacho vell azun paunk naslo dekhun konnench Taka dhorlona.
Hanv Vetam thoi Tumchean eunk Zainam
बदल21 Anink ek pavtt Tannem tankam mhonnlem: "Hanv chol'lom, ani tumi Mhaka sodteleat ani tumchea patkan tumi morteleat; Hanv vetam thoi tumchean ieunk zainam". 22 Judevamnim mhonnlem: "Hanv vetam thoi tumchean ieunk zaina' oxem to sangta mhonntoch, to aploch jiv ditolo mhonn to sangunk sodta gai?" 23 Tannem tankam mhonnlem: "Tumi sokoile, Hanv voilo; tumi hea sonvsarantle, Hanv hea sonvsarantlo nhoi. 24 Tumi tumcheam patkamnim morteleat mhonn Hanvem tumkam sanglam, kiteak Asa To Hanvuch mhonn tumi sotmanina zaxat zalear, tumcheam patkamnim tumi morteleat". 25 Tannim Taka mhonnlem: "Tum konn tor?" Jezun tankam zabab dilo: "Poilinch thaun Hanvem tumkam sanglam toch. 26 Tumche vixim sangchem ani nivaddchem zaitem asa; punn Mhaka pattoila To sotevont, ani jem Hanvem Tache koddsun aikolam tench Hanv sonvsarak sangtam". 27 To Bapachi khobor sangta mhonn te somzunk nant. 28 Tea pasot Jezun mhonnlem; "Tumi Mon'xachea Putak ubarteleat tedna tumkam kollon ietelem ki Asa To Hanvuch, ani Mhojech osttongim Hanv kai korina, punn zoxem Bapan Mhaka xikoilam toxem Hanv uloitam. 29 Ani Zannem Mhaka pattoila To Mhoje sovem asa; Tannem Mhaka eklo sanddunk na, kiteak Taka man'ta tench Hanv sodam kortam". 30 To oxem 'uloilo tedna, zaiteamnim Tacher visvas dovorlo.
Svotontr ani Gulam' Monis
बदल31 Apnnacher visvas dovorlo team Judevank Jezun mhonnlem: "Tumi Mhojea utra pormonnem cholxat zalear tumi Mhoje khore xis zateleat. 32 Ani tumkam sot kollon ietelem ani sot tumkam svotontr kortelem". 33 Tannim Taka mhonnlem: "Ami Abrabamachi sonsot, ani konnachech gulam' ami kednanch zaunk nanv, 'Tumi Svotontr zateleat' oxem tum koso mhonntai tor?" 34 Jezun tankam portipall kelo: "Hanv tumkam sot sangtam, patok korta to patkacho gulam'. 35 Gulam sodanch ghorant uronam; put to sodanch ghorant asta. 36 Hea pasot Put zor tumkam svotontr korit, tor tumkam khorich suttka mellteli. 37 Tumi Abrahamachi sonsot mhonn Hanv zannom; tor Mhojim utram tumche bhitor rigonant dekhun tumi Mhozo jiv kaddunk sodtat. 38 Jem Hanvem Mhojea Bapa sovem dekhlam tem Hanv sangtam, ani jem tumim tumchea bapaichem aikolam tem tumim kortat". 39 Tannim Taka portipall kejo; "Abraham' amcho bap". Jezun tankam mhonnlem: "Tumi Abrahamache put zal'le zealear, jem Abrahaman kelem tem tumi kortele asleat. 40 Punn Deva koddsun aikol'lem sot Hanvem tumkam sanglam, tori astana tumi Mhozo jiv kaddunk sodtat. Abrahaman oxem korunk nam. 41 Tumcho bapui korta toxench tumi kortat". Tannim Taka mhonnlem: "Kam'charan ami zolmak ieunk nanv; amkam ekloch Bap asa, to Dev". 42 Jezun tankam mhonnlem: "Dev tumcho Bap zal'lo zalear, tumi Mhozo mog kortele asleat, kiteak Hanv Deva thaun upzolam ani ailam; Mhojech khuxen Hanv ieunk nam. Punn Tannem Mhaka dhaddla. 43 Hanv sangtam tem tumi kiteak somzun ghenant? Kiteak Mhojem utor tumchean kanar gheunk zainam? 44 Tumcho bap devchar, ani tumchea bapaik zai tem korunk tumchi khuxi. Mudlak thaun to prannghatki, ani taka ani sotak poddona, kiteak tache sovem sot nam. To lottikponnam sangta tednam aplea soimba pormonnem uloita, kiteak to fottkiro ani fottincho bapui. 45 Punn Ham sot uloitam dekhunuch, tumi Mhojer visvas dovrinant. 46 Tumche bhitorlo konn-ui Mhaka patok asa mhonn dakhoit. Hanv tumkam sot sangtam zalear, tumkam kiteak Mhozo visvas nam? 47 Zo Devacho, to Devachim utram aikun gheta; tumi Devache nhoi dekhun, tumi tim aikun ghenant".
48 Judevamnim Taka portipall kelo: "Tum Samariekar ani Tujer devchar bosla, oxem ami mhonntany tem sarkem zalem nam?" 49 Jezun portipall kelo: "Mhojer devchar nam, punn Mhojea Bapak Hanv man ditam ani tumi Mhaka beman kortat. 50 Tori Hanv Mhojich vhoddvik sodinam; ti sodtolo ani nit kortolo konneklo asa. 51 Sot tem sangtam, zo konn Mhojem utor samballta to kodinch morchona". 52 Judevamni Taka mhonnlem: "Tujer devchar asa mhonn atam amkam sarkem koll'lem. Abraham melo ani provadi-i morum gele; ani Tum amkam sangtai: 'Zo konn Mhojem utor samballta to kodinch morchona!' 53 Amcho bap Abraham morun gelo, tache poros Tum vhodd kitem? Ani provadi-i morun gele! Tum apunn konn mhonn sangunk sodtai?" 54 Jezun portipall kelo: "Hanv Mhojich vhoddvik korin zalear Mhoji vhoddvik kaich nhoi; Mhoji vhoddvik korta to Mhozo Bap, tumi tumcho Dev mhontat Toch. 55 Tori tumi Taka ollkunk nam; punn Hanv Taka ollkotam; Taka ollkona mhonn Hanvem mhonnlelem zalear tumcha bhaxen Hanv-ui fottkiro zatolom; punn Hanv Taka ollkotam ani Tachem utor samballtam. 56 Mhozo dis polleunche axen Abraham' tumcho bap khuxal zalo; tannem to dekhlo ani taka khup anond zalo". 57 Tedna Judevamnim Taka mhonnlem: "Tuka azun pon'nas vorsam zaunk nant, ani tunvem Abrahamak dekhloi?" 58 Jezun tankam portipall kelo: "Hanv tumkam sot sangtam, Abraham asche adim Hanv asam". 59 Dekhun tannim Tacher marunk fator ukol'le; punn Jezu liplo ani Devmondirantlo bhair sorlo.
9:1 Aple vatten vetanam Jezun eka zolmachea kurddeak dekhlo. 2 Ani Tacheam xisamni Tache kodde vicharlem: "Guruji, konnachea patkak lagun ho monis kurddo zolmolo? tachea vo tachea avoi-bapaichea patkak lagun?" 3 Jezun zabab dilo: "Hea mon'xan vo tachea avoi-bapain patok kelem mhonn nhoi, punn Devachim kortutvam tache udexim porgott zaunchim mhonn to oso zolmolo. 4 Disacho uzvadd astanam, Mhaka pattoila Tachim kamam Hanvem korunk zai; rat ieta tedna konnachean vavr korunk zaina. 5 Hanv snvsarant aso-sor, Hanv sonvsaracho uzvadd". 6 Oxem uloitana Tannem zomnir luti uddoili, lutien mati kaloili, ani kaloileli mati kurddeacheam dolleank kaddli, 7 ani taka mhonnlem: "Voch ani Siloamache tollient dhu (Siloam' mhonnge Dhaddlolo". Kurddean vochun dhulem, ani taka nodor aili, magir to portun ailo. 8 Tachim xeza-samarim ani zannim taka adim bhik magtana pollel'lo, tim mhonnunk laglim: "Bhik magunk bostalo to ho nhoi?" 9 Konn-konn mhonntalim: "Hoch to"; dusrim mhonntalim: "Kodinch nam, punn to tache bhaxen dista" Tannem mhonnlem: "Hanvuch to". 10 Tannim taka vicharlem: "Tuje dolle koxe ugoddle?" 11 Tannem zabab dilo: 'Jezu nanvachea mon'xan mati kaloun mhojeam dolleank kaddli ani mhaka mhonnlem: 'Siloam" tollient vochun dhu'. Hanvem dbulem ani mhaka nodor aili". 12 Tannim taka mhonnlem: "To khoi asa?" Tannem zap dili: "Hanv nokllom".
Farizev Choukoxi Kortat
बदल13 Adim kurddo asleak tannim Farizevam-xim haddlo. 14 Jezun mati kaloun tache dolle ugoddlele to dis Son'var aslo. 15 Taka nodor aili gai mhonn Farisevamnim novean vicharlem. Ani tannem tankam mhonnlem: "Tannem kaloileli mati mhojeam dolleank kaddli, hanvem dhulem ani atam mhaka dixtti poddta'. 16 Farizevantleam kai zannamnim mhonnlem: "Ho monis Devacho nhoi. To Son'var pallina". Punn dusreamnim mhonnlem: "Patki monis osleo khunna koxeo korunk xokot?" Tanche modem veg-vegllim motam zalim. 17 Dekhun anink ek pavtt kurddea mon'xak mhonnlem: "Tuje dolle ugoddleat tache vixim tum kitem mhonntai?' Tannem sanglem: "To ek provadi". 18 To kurddo aslolo ani magir taka nodor aili mhonn Judev sotmanina zale; dekhun tedna tachea avoi-bapaik apoun haddun, 19 tannim tanche kodde vicharlem: "Ho tumcho put? to kurddo zolmololo mhonn tumi sangtat to atam koso polleta tor?" 20 Tachea avoi-bapain zap dili: "Ho amcho put ani to kurddo zolmololo mhonn ami zannanv; 21 punn to atam koso polleta tem ami nokllonv, ani konnem tache dolle ugoddleat tem-i bi ami nokllonv; tache kodde Vicharat; taka apli pirai asa; to aplem sangtolo". 22 Tacho avoi-bapui Judevank bhietalo dekhun tannim oxem sanglem; kiteak to Krist mhonn konnem-imanun ghetlem zalear, taka devosthanantlo bhair ghalcho mhonn tannim tharailelem. 23 Tea pasot tachea avoi-bapain mhonnlem: "taka apli pirai asa, tache kodde vicharat". 24 Tedna adim kurddo aslelea mon'xak tannim dusre pavtti apoilo ani taka sanglem: "Devachi vakhann'nni kor; to monis patki mhonn ami zannonv". 25 Tannem portun sanglem: "To patki zalear mhaka khobor nam; ek mat hanv zannom: hanv adim kurddo aslom punn atam mhaka dixtti poddta". 26 Tannim taka vicharlem: "Tannem tuka kitem kelem? Tuje dolle Tannem koxe ugoddle?" 27 Tannem tankam zabab dilo: "Hanvem tumkam atanch sanglam, ani tumi tem kanar ghenant. Anink ek pavtt kiteak aikunk sodtat? Tumi-i tache xis bizaunk sodtat?" 28 Te taka oxe hinddsunk lagle. "Tum za tacho xis! ami Moizesache xis! 29 Dev Moizesa kodde uloilo mhonn ami zannonv, punn ho monis khoicho aila tem ami nokllonv." 30 Tea mon'xan zabab diun mhonnlem: "Ojap tem hem! To khoicho aila to tumi nokllot, ani tori tannem mhoje dolle ugoddle. 31 Dev patkeanchem aikonam mhonn ami zannonv, punn konn Devachi bhokti korta ani Tachi khuxi pallta zalear, Dev tachem aikota. 32 Sonvsar ghoddleleak konnem kurddo zolmol'leache dolle ugoddleat mhonn kodinch aikunk nam. 33 Ho monis Devacho nhoi aslo zalear, tachean kitench korunk zaunchem naslem". 34 Tannim taka portipall kelo: "Tum nibel patkant zolmolai ani amkam xikounk ailai?' Ani tannim taka bhair ghalo.
Otmik Kurddeponn
बदल35 Tannim taka bhair ghalo mhonn Jezuchea kanar poddlem, ani Taka to mell'lo tednam Jezun taka vicharlem: "Tum mon'xachea Putacher visvas dovortai?" 36 Tannem portun zap dili: "Saiba, hanvem Tacher visvas thevunk, to konn to mhaka sang". 37 Jezun mhonnlem: "Tunvem Taka dekhlai ani tuje lagim uloita Toch to". 38 Tannem mhonnlem: 'Saiba,' hanv visvas dovortam". Ani paiam poddun tannem Jezuk nomoskar kelo. 39 Jezun mhonnlem: "Nit korunk Hanv hea sonvsarant ailam: zankam dixtti poddonam tankam nodor mellcheak ani zankam dixtti poddta tim kurddim zauncheak Hanv ailam. 40 Tache sorxim asleleam thoddeam Farizevamnim hem aikun Taka mhonnlem: "Ami-i kurdde bi?" 41 Jezun tankam mhonnlem: "Tumi kurdde zal'leat zalear tumkam guneany ascho naslo; 'punn amkam dixtti poddta' oxem tumi mhonntat dekhun, tumi patkantuch asat".
10. Gottheachi Vopar
बदल
10:1 Hanv tumkam sot sangtam; zo menddranchea gottheant darantlean nhoi punndusre vatten bhito sorta to chor ani nagovnno; 2 punn zo darantlean bhitor sorta to menddrancho gonvlli. 3 Taka dar-rakhnno dar ugoddta; menddram tacho tallo aikotat ani apleam meddrank to ap aplea nanvan ulo korta ani tankam bhair vhorta. 4 Apleam menddrank bhair haddtoch to tanche fuddem cholta ani menddram tacho tallo ollkhotat dekhun tache pattlean vetat. 5 Porkea pattlean tim vochonant, punn tache sorxilim tim pollun vetat kiteak porkeancho tallo tim ollkhohat". 6 Jezun tankam hi vopar sangli, punn jem To tankam mhonntalo tacho orth tankam mell'lona.
7 Dekhun Jezun anink ek pavtt tankam mhonnlem: "Hanv tumkam sot sangtam, Hanv menddranchem dar. 8 Mhoje adim aileat te sogott chor ani nagovnne; punn menddramnim tankam lekhunk nam. 9 Hanv dar; Mhojeantlean zor konn bhitor sorot tachem taronn zatelem, ani to bhairbhitor sortolo ani taka chorov melltolo. 10 Chor ieta to fokot chorunk, marun uddounk ani ibadd korunk ieta: Hanv ailam to tankam jivit melloun diunk ani tem tankam subham' ponnan melloun diunk ailam. 11 Hanv boro gonvlli. Boro gonvlli menddram pasot aplo jiv dita. 12 Gonvlli nhoi ani zachim khaxachim menddram nhoi, toslo muxarekar landdgo ieta to dekhta, ani menddrank sanddun par kaddta; ani landdgo tankam dhorun vhorta ani duspottaita. 13 To muxarekar ani taka menddranchem kai poddunk nam, dekhun to pollun veta. 14 Hanv boro gonvlli: 15 Zoso Bap Mhaka ollkota ani Hanv Bapak ollkotam, 14 toso Hanv Mhojeank ollkotam ani Mhojim tim Mhaka ollkotat, 15 ani Hanv Mhojeam menddram pasot Mhozo jiv ditam. 16 Ani Mhaka anink-ui menddram asat; tim hea gottheantlim nhoi; tankam-i Hanvem haddunk zai. Tim-i Mhozo tallo aikotelint. Ani oso ekuch hind zatolo ani ekuch gonvlli. 17 Hanv Mhozo jiv ditam ani uprant to portun ghetam dekhun, Bap Mhozo mog korta. 18 Konn Mhozo jiv kaddina, punn Mhojech khuxen Hanv mhozo jiv ditam. Mhozo jiv diunk Mhaka podvi asa ani to portun gheunk-ui Mhaka podvi asa; hi adnea Mhojea Bapan Mhaka dilea." 19 Heam utrank lagun anink ek pavtt Judevam modem veg-vegllim motam zalim. 20 Tanche modleam zaiteamnim mhonnlem: "Tacher devchar bosla, tachi mot firlea; tumim kiteak aikotat?" 21 Dusreamnim mhonnlem: "Devchar laglolo monis oso uloinam Devchar kurddeanche dolle ugtte korunk xokta?"
22 Hinvalleachea somoiar Jeruzaleant Bhettovnnechi Porob choltali; 23 Devmondirant Solomonachea Tarangnnant Jezu bhonvtalo. 24 Tednam Tache bhonvtonnim ektthai zaun, Judevamni Taka mhonnlem: "Kedna porian Tum amkam dubhavan dovortoloi? Tum Krist zalear, amkam sarkem sang". 25 Jezun tankam portipall kelo: "Tumkam Hanvem sanglam ani tumi sotmaninant. Mhojea Bapache nanvim Hanv kortam tim kamam Mhoje vixim govai ditat; 26 punn tumi sotmaninant, kiteak tumi Mhojeam menddrantle nhoi. 27 Mhojim menddram Mhozo tallo aikotat, ani Hanv tankam ollkotam, ani tim Mhozo pattlav kortat; 28 ani tankam Hanv sasnnachem jivit ditam, ani tim kodinch ibadd zaunchimnant, ani tankam Mhojeam hatantlim konn kaddun vhorchona. 29 Mhojea Bapan tim Mhaka dileant, To sogttam poros vhodd, ani Mhojea Bapachea hatantlim tankam konnacheanuch kaddun vhorunk zainam. 30 Hanv ani Bap ekuch". 31 Tednam Jezuk fatraunk Judevamnim novean fator ukôl'le. 32 Jezun tankam sanglem: "Bapachê podven zaiteo boreo kornnio Hanvem tumcheam dolleam mukhar korun dakhoileat; tantle khoicha kornna pasot tumi mhaka fatraunk sodtat?" 33 Judevamnim Taka zabab dilo: "Bore kornnek lagun ami Tuka fatraunk sodinanv, punn Tuje devninde pasot: kiteak Tum monis zaun Apunn Dev mhonn sangtai". 34 Jezun tankam zap dili: "'tumi dev mhonn Hanv sangtam' oxem tumchea Xastrant boroilelem asa ki nam? 35 Povitr Pustokantlem utor moddo nozo: mhonntoch, zankam Devachem utor paulam tankam tumchem Xastr 'dev' mhonnta; 36 ani Bapan Mhaka sonvskarla ani sonvsarant dhaddla astanam, tori Hanv Devacho Put mhonn Hanvem sanglam dekhun, tumchean mhaka 'tum devninda kortai' koxem mhonnun ieta? 37 Hanv Mhojea Bapacheo kornnio korinam zalear tumi Mhojer visvas dorum nakat; 38 punn Hanv teo kortam zalear, zori tor tumi Mhojer visvas thevinant, team kornniancher tori visvas dovrat, ani oxem Bap Mhoje sovem asa ani Hanv Bapa sovem asam mhonn manun gheiat ani hem tumchea monant odik-odik rigum-di". 39 Tea vellar Taka novean dhorunk sodtale, punn To tanchea hantantlo suttun gelo. 40 Juanv poilim Jordana poltoddi snan ditalo thoi Jezu porot vochun raulo. 41 Zaiteam zannamnim Tache-xim, ieun mhonnlem: "Juanvan koslich khunna korunk nam punn hea mon'xa vixim tannem sanglam titlem-i khorem zalem". 42 Ani zaiteamnim Tacher visvas thevlo.
11. Lazarachem Moronn
बदल
11:1 Lazar nanvacho konneklo monis piddent aslo; to Maria ani tichi bhoinn Marta, hanche borobor Betania ganvant rautalo. 2 He Marien Somiak pormollachea telan makhlolo, ani Tache pai apleam kensamnim puslele. Ticho bhav Lazar boro naslo. 3 Dekhun bhoinnimni Jezuk sangun dhaddlem: "Somia, Tuzo mogacho ixtt boro nam." 4 Hi khobor aikun Jezun mhonnlem: "He piddent to morchona; ti Devachea manak ailea, tiche vorvim Devachea Putak mhoima mellunk zai!" 5 Marta, tichi bhoinn Maria ani Lazar, hancho Jezu mog kori. 6 To boro nam mhonn Taka khobor pauli; tori aslo tech svater Jezu anink don dis raulo. 7 Tea uprant Tannem xisank mhonnlem: "Anink ek pavtt Judeiant vochum-ia". 8 Xisamnim zabab dilo: "Guruji, niktech porian Judev Tuka fatraunk kortale, ani Tum porot thoi vetai?" 9 Jezun portipall kelo: "Eka disak bara tas asat ki nam? Disacho cholta tache pai addollnant kiteak to hea sonvsaracho uzvadd dekhta. 10 Punn konn ratcho cholta zalear tache pai addolltat kiteak taka uzvadd nam!" 11 Oxem uloun zatoch, Tannem tankam mhonnlem: "Amcho ixtt Lazar nidla, punn Hanv taka utthounk vetam". 12 Xisamnim Taka vicharlem: "Somia, to nidla zalear boro zatolo". 13 Jezun tachea mornnachi khobor kel'li, punn To nidechea visovachi khobor sangtalo mhonn tankam dislem. 14 Tednam Jezun tankam sarkem sanglem: "Lazar mela; 15 ani Hanv thoi naslom mhonn, tumche pasot khuxal zatam, tumcho visvas ghott zauncheak: punn tanger vochum-ia". 16 Zonvllo mhonnlelea Tomasan apleam vangddeam xisank mhonnlem: "Ami-i vochum-ia, Tache bori ami-i morum-ia".
Jezo Jivontponn ani Jivit
बदल17 Jezu paulo tednam, Lazarak fonddant ghalear char dis zal'le. 18 Betania Jeruzaleak laginch aslem, sumar tin kilometranchi vatt. 19 Ani zaite Judev Martak ani Mariek, tanchea bhava pasot, pacharunk ailele. 20 Jezu ieta mhonn aikun, Marta Taka mellunk geli punn Maria ghorant bosun rauli. 21 Martan Jezuk mhonnlem: "Saiba, Tum hangasor asloi zalear, mhozo bhav morcho naslo. 22 Ani azun porian Tum Deva lagim magxi titlem-i Dev Tuka ditoloch mhonn hanv zannom". 23 Jezun tika mhonnlem: "Tuzo bhav novean jivo zatolo". 24 Martan taka porot mhonnlem: "To nimannea disa, jivontponnanchea somoiar, novean jivont zatolo mhonn hanv zannom. 25 Jezun tika portipall kelo: "jivontponn ani: jivit Hanvuch. Zo konn Mhojer visvas dovorta, to melo-i zalear jivo astolo 26 ani zo konn jivo asa ani mhojer visvas dovorta to sasnnak morchona. Hem tum sotman'tai?" 27 Tinnem taka mhonnlem: "Hoi, Saiba, sonvsarant ieuncho aslo to Krist Devacho, Put to Tunch mhonn hanv sotman'tam"
28 Oxem mhonntoch, ti aple bhoinnink apounk geli, ani tika lhuvan mhonnlem: "Guruji hanga asa ani tuka sodta". 29 Hem aikun, ti rokddich utthli ani Tachê sorxim geli. 30 Jezu azun gramant paunk naslo, punn Marta Taka mell'leli thõich aslo. 31 Tika ghorant buzvonn ditale te Judev, Maria veginch utth'ta ani bhair veta tem polleun, ti fondda sorxim roddunk veta mhonn chintun, tiche pattlean gele. 32 Jezu aslo thoi pautoch, Taka polleun Maria Tacheam paiam poddli; tinnem mhonnlem: "Saiba, Tum hanga aslo zalear mhozo bhav morcho naslo". 33 Maria ani tiche sangatim ailele te Judev roddtale te polleun, Jezu bhov khontibhorit zaun, apunn-ui soglloch thorthorlo. 34 Tannem vicharlem: "Taka tumi khoi ghala?" Tannim Taka sanglem: "Saiba, ie ani polle". 35 Jezu roddlo. 36 Dekhun Judevamni mhonnlem: "Polleiat, ho tacho kitlo mog kori!" 37 Punn tanche bhitorleam thoddeamnim mhonnlem: "Tannem kurddeache dolle ugoddle, tor Tachean haka mornantlo nivarunk zai naslo?"
Jezu Lazarak Panorjivont Korta
बदल38 Tednam novean khonticho huskar soddun Jezu somadhi-xim paulo; ti ek dhol koxi asli ani tichea tonddar ek fator oddleli. 39 Jezun mhonnlem: "Fator kuxin kaddat". Mel'leache bhoinnin Martan Taka mhonnlem: "Saiba, taka char dis zale, atam taka ghann marteli". 40 Jezun tika sanglem: "Tum visvas dborxi zalear Devachi mhoima dekhtelii mhonn Hanvem tuka sangunk nam?" 41 Mhonntoch tannim fator kuxin kaddun dovorli. Tednam dolle voir laun Jezun mhonnlem: "Bapa, Mhojem aikoleim dekhun Tuje upkar atthoitam. 42 Mhojem sodanch aikotai mhonn Hanv zannom aslom, punn hanga asleleam pasot Hanv oso uloilam, Tunvem Mhaka dhaddlai mhonn tannim sotman'cheak". 43 Hem mhonntoch To vhoddlean oso uloilo: "Lazar, bhair sor!" 44 Melolo to bhair ailo, tache hat ani pai faliiamnim bandlele, ani tachem tondd rumalan pangurlelem. Jezun tankam sanglem: "Tache bandpas soddat, taka vochum-di".
45 Tannem kelelem tem polleun, Marie-xim ailele team Judevantleam zaiteam zannamni Tacher visvas thevlo. 46 Punn tanche bhitorleam kai zannamnim Farizevam-xim vochun Jezun kelelem tem tankam kolloilem. 47 Mhonntoch Porom'-Iadnikamni ani Farizevamni apli sobha bhorli. Tannim mhonnlem: "Ho monis zaiteo khunna korun dakhoita. Ami kitem kortanv? 48 Ami taka osoch soddlo zalear soglo lok Tacher visvas dhortolo, ani Romi odbikari ieun amchea Devmondiracho ani amche porjecho bhosm kortele". 49 Tanche modlo eklo Kaifas nahvacho, tea vorsacho Porom-Iadnik aslo tannem tankam mhonnlem: "Tumi kaich somzonant. 50 Sogllea raxttracho bhosm zaunche poros, porje pasot eklo melear odik borem mhonn somzochnant". 51 Hem tannem apleach monantlem mhonnlem nam; punn tea vorsacho Porom-Iadnik koso tannem oxem bhakit kelem, ki Jezu porje pasot morcho aslo, 52 ani nhoich porje pasot punn Devacheam ais-pois ximpoddleleam bhurgeank zoma korun ek korcheak 53 Tea disa thaun Taka jivexim marunk te ievjitale. 54 Dekhun Jezu Judevam modem ugtteponnim bhonvonam zalo, punn thoisorlo bhair sorun oronnea lagim aslelea prantant, Efraim' nanvachea xarant gelo ani thoi Apleam xisam borobor raulo. 55 Judevanchi Paskanchi Porob lagim pauleli. Apli xudhi korcheak zaito lok ganv-ganvam thaun Jeruzaleak gel'lo. 56 Te Jezuk sodtale, ani Devmondirant ekamekak mhonntale: "Tumkam kitem dista? To porbek ietolo ki nam?" 57 Taka dhorche khatir Porom-Iadnikamni ani Farizevamni oso hukum ghal'lo, ki Jezu khoi asa to konnak khohor asot zalear apnnank tem kollounchem.
_-_2.jpg)
12:1 Paskanche Porbek so dis asat mhonnlear, Jezu Betaniek ailo; Tannem meleleantlo jivont kel'lo to Lazar hanga rautalo. 2 Thoi jeyonn kelem; Marta poramos kortali ani Tache bori jevnnak bosleleam modem Lazar aslo. 3 Osol zotamanxechem chodd molachem ek rat-bhor pormollit tel gheun, Jezuche pai makhle ani apleam kensamni te pusle, ani telachea domdomit pormollan ghor bhorlem. 4 Tednam Tacheam xisam modlo eklo, Tacho ghat ghetolo aslo to, Judas Iskariot, hannem mhonnlem: 5 "Hem tel tin'xin denarank vikun, te duddu durbollank dium nozo asle?" 6 Taka durbollanchem poddlele mhonn nhoi, punn to chor aslo dekhun tannem toxem mhonnlem; tache lagim pongtichi gantt astali dekhun, tantunt ghaltale tem to apnnak kaddi. 7 Jezun mhonnlem: "Tika kimar korum nakat, Mhaka purpachea disak tinnem ho pormol samballcho aslo. 8 Dublle sodanch tumche modem asat, punn Hanv tumche modem sodanch aschonam.
Judev Lazarak Marunk Kortat
बदल9 Jezu thoi asa mhonn Judev lokantleamz aiteam zannank koll'lem. Mhonntoch te thoi aile, Jezukuch polleunk mhonn nhoi, punn Tannem meleleantlo jivont kel'lea Lazarak-ui polleuncheak. 10 Mhonnun Porom- Iadnikamnim Lazarak-ui jivexim marcho mhonn tharailem, 11 kiteak taka lagun zaite zann Judev tankam soddun Jezucher visvas thevtale.
12 Dusrea disa porbek ailelea zaitea lokan Jezu Jeruzaleak aila mhonn aikolem. 13 Maddanchim chuddtam gheun Taka mellunk to lok bhair sorlo ani oxi bob marunk laglo, "Zoi! Zoi! Sorvesporache nanvim ieta to, Izraelacho Raza sodoiv!" 14 Ani Jezuk ek Ihan-xem gaddum mell'lem ani tacher To boslo; Povitr Pustokant oxem boroun aslem: 15 "Sionache dhuve, bhieum naka; ho polle tuzo Raza ieta, gaddvachea poracher bosun ieta!" 16 Tache xis poilim heo vostu somzolenant; punn jednam Jezu mhoimevont zalo, tednam Tache vixim oxem boroun aslem mhonn ani Taka oxem kel'lem mhonn tankam ugddas ailo. 17 Lazarak fonddantlo bhair apoilo ani taka jivont kelo tednam Jezu-xim aslo to lok bache vixim govai ditalo. 13 Heach pasot lokachi vhoddli urponz Taka mellunk bhair sorli: Jezun hi khunna kel'li mhonn tannim aikol'lem. 19 Tednam Farizevamni ekamekak mhonnlem: "Pollelem mum? amchem kaich cholona; akho sonvsar Tache pattlean chol'lo".
20 Porbechea somoiar, Devak bhozunk aileleam modem thodde Greg aste. 21 Galileiantlea Betsaidecho Filip, hache sorxim ieun tannim oxi magnni keli: "Saiba, ami Jezuk polleunk sodtanv". 22 Filipan vochun Andrek sanglem: Andren ani Filipan borobor Jezuk sanglem. 23 Ani Jezun tankam portipall kelo: "Mon'xacho Put mhoimevont zaunebo vell paulo. 24 Hanv tumkam sot sangtam, gonvacho konno zomnir poddun moronam zalear, to tosoch urta; punn morot zalear zaitem pik dita. 25 Zo konn aplea jivacho mog korta, to aplo jiv ibadd korta; ani zo konn hea sonvsarant aplea jivacho dvês korta, to aplo jiv sasnnachea jivitak samballta. 26 Konn-ui Mhoji seva korta zalear, tannem Mhozo pattlav korunk zai, ani zoi Hanv asam thoi Mhozo sevok-ui astolo. Konn-ui Mhoji seva korit zalear, Mhozo Bap taka man ditolo".
Jezu Aplea Mornnachi Khobor Korta
बदल27 "Atam Mhojer akant aila. Hanv kitem mbonnum! Bapa, hea vellantlo mhaka nivar, oxem mhonnum? Nam, beach pasot Hanv hea vellak paulam. 28 Bapa, Tujea nanvak mhoima zoddun ghe". Tednam ek sorgincho tallo ailo: "Hanvem Mhojea nanvak mhoima zoddun ghetlea ani porot mhoima zoddun ghetolom". 29 Lagim aslelea lokan ho tallo aikolo ani mhonnlem: Goddgoddo marla". Dusreamni mhonnlem: "Ek devdut Tache kodde uloila". 30 Jezun portipall kelo: "Ho tallo Mhoje pasot nhoi, tor tumche pasot gazla. 31 Atam sonvsarachi mon'subi korcho vell; atam hea sonvsaracho odhikari bhair poddtolo. 32 Ani jednam Mhaka zomni velo unch ubhartit, tednam soglleam mon'xank oddun haddtolom". 33 Oxem mhonnun Apunn kosle torechem moronn bhogcho aslo, tem Tannem dakhoun dilem. 34 Lokan Taka zabab dilo: "Krist sodankal jivo astolo mhonn ami Xastrantlem aikolam. Mon'xachea Putak ubarunk zai mhonn Tum koso sangtai tor? Moh'xacho Put konn?" 35 Jezun tankam mhonnlem: "Anink iloch vell tumche sovem uzvadd asa. Uzvadd astanam cholot ravat, nam tor tumi kallokak sampoddteleat; kallokant cholta to apunn khoi veta to nokllo. 36 Tumkam uzvadd astanam uzvaddacher visvas dhorat, ani tumi uzvaddachim bhurgim zateleat".
Judevancho Ovisvas
बदलOxem sangun, Jezu tanche sorxilo gelo ani liplo. 37 Zori Tannem itleo khunna tanche hujir kel'leo, tori tannim Tacher visvas thevlonam; 38 Izaias provadean sangun dovorlelem tem ghoddon ieuncheak, hem oxem zalem; tannem mhonnlelem tem oxem: "Sorvespora, amcho, nirop konnem manun ghetla? Ani Sorvesporachi sokti konnak dokhol zalea?" 39 Khorench tanchean sot manunk zalemna, kiteak mholear oxem-i Izaasan sangun dovorlelem: 40 "Tanche dolle Tannem kurdde keleat, ani tanchem kalliz darunn kelam: oxem apleam dolleamnim tim polleunchinant, tim aplea monant somzochimnant, tim Mhoje-xim portun ieunchimnant, ani Hanv tankam borim korchonam". 41 Jezuchi mhoima dekhli tednam Tache sombondim Izaias oso uloilo. 42 Tori astanam odhikareantleam zaiteam zannamni Tacher visvas dovorlo, punn te hem bhailean dakhoi nasle, kiteak tankam Farizevanchi bhirant asli ani apnnank devosthanantle bhair ghaltit mhonn te bhietale; 43 Karann, Devache xebaske-von mon'xanche xebaskechi te odik porva kortale.
44 Jezun vhoddlean mhonnlem: "Mhojer visvas thevta to Mhojeruch nhoi, bogor Mhaka pattoila Tacher visvas thevat. 45 Ani Mhaka polleta to Mhaka pattoila Taka polleta. 46 Hanv sonvsarant uzvadd koso ailam; dekhun Mhojer visvas dovorta to kallokant urchonam. 47 Konn-ui Mhojim utram aikoleant astanam tim pallinam zalear, Hanv tacher khastichem formonn marinam, kiteak sonvsaracher khastichem formonn marcheak Hanv ieunk nam, punn sonvsarachem taronn korunk ailam. 48 Mhaka lekhinam ani Mhojim utram manun ghenam, tachi mon'subi kortolo konn eklo asa; jem utor Hanv uloilam tench nimannea disa tachi mon'subi kortelem. 49 Kiteak Mhojech osttongim Hanv ulounk nam; bogor Hanvem kitem sangchem ani kitem ulounchem tem Mhaka pattoila tea Bapan Mhaka formailam. 50 Ani Tacho hukum' sasnnachem jivit mhonn Hanv zannom. Dekhun Hanv uloitam zalear, jem Bapan Mhaka sanglam titlench Hanv uloitam".
13:1 Paskanche Porbe adim, Jezu hea sonvsarantlo bhair sorun Bapa-xim vecho Aplo vell paulo mhonn zanno aslo. Tannem sonvsarant asleleam Apleancho mog kel'lo, punn atam sopurnnaien tancho mog korun dakhoilo. 2 Tanchem ratchem jevonn choltalem. Simanvacho put Judas Iskariot, hachean Tacho ghat gheuncho mhonn devcharan monant ghal'lem. 3 Bapan sogllem Aplea hatant dilam, Apunn Deva thaun aila ani Deva-xim veta mhonn zanno zaun, 4 Jezu jevnnavelo utthlo, ani Aplem avoronn kaddun Aplea penkttak Tannem ek rumal bandlo. 5 Uprant, eka tostant udok otoun To xisanche pai dhuunk laglo, ani Apnnak bandlolo tea rumalak te pusunk laglo. 6 To simanv Fedru sorxem gelo; Pedrun Taka mhonnlem: "Somia, Tum mhoje pai dhutai?" 7 Jezun taka portipall kelo: "Hanv kortam tem tuka atam somzonam, punn magir somzotelem". 8 Pedrun Taka mhonnlem: "Mhoje pai dhuunk hanv tuka kodinch diuncho nam". Jezun taka portun mhonnlem: "Hanv tuka dhuinam zalear, Mhojea vangdda tuka kaich aschemna. 9 Simanv Pedrun portipall kelo: "Toxera zalear, Somia, mhoje paich nhoi, bogor mhoje hat ani mhoji tokli-i dhu'. 10 Jezun taka mhonnlem: "Nhala tannem fokot pai dhulea puro: to soglloch nitoll asa; tumi tor nitoll asat, punn soglle nant". 11 Apnnacho ghat konn ghetolo aslo tem To zanno aslo; tea pasot Tannem mhonnlem: "soglle tumi nitoll nant". 12 Tanche pai dhuun zatoch, Aplim angvostram ghalun, Jesu aple svater portun ailo. Tannem mhonnlem: "Hanvem tumkam kitem kelam tem tumi somzoleat mum? 13 Tumi mhaka Guru ani Somi mhonntat; ani tumi sarkem uloitat, kiteak Hanv khorench Guru ani Somi. 14 Mhonntoch, tumcho Somi ani Guru zaun-ui, Hanvem tumche pai dhule zalear, tumim-i ekamekache pai dhuunk zai. 15 Hanvem tumkam dekh dilea: hanvem tumkam kelam toxench tumim-i korchem. 16 Hanv tumkam sot sangtam, aplea dhoniavon chakor vhodd nhoi; toxench konn pattoilolo apnnak pattoila tache-von vhodd nhoi. 17 Hem zanno zaun, tumi tem korxat zalear, tumi subhagi! 18 Hanv tumchi soglleanchi khobor korinam; konnak Hanvem vinchun kaddleat te Hanv zannom; punn Povitr Pustokantlem hem utor pallon ieunk zai: Zo Mhoje borobor jevnnak bosla, tannench Mhojer khontt ubarlea. 19 Hem ghoddche adim Hanv tumkam atam sangtam, tem ghoddon ietelem tednam Hanvuch to mhonn tumi sotman'cheak. 20 Tumkam sot sangtam: Hanv dhaddtam taka konn-ui manun gheta zalear, to Mhaka manun gheta: ani Mhaka manun gheta to Mhaka pattoila Taka manun gheta".
21 Oxem uloun zatoch Jezu khontibhorit zalo ani hachi govai diun Tannem mhonnlem: "Hanv tumkam sot sangtam, tumche bhitorlo eklo Mhozo ghat ghetolo". 22 To konnachi khobor kortalo gai mhonn dubhavun, xis ekamekak polleunk lagle. 23 Tacheam xisam modlo eklo, Jezu mog kori to, Jezuchea horddeak tenkun aslo; 24 dekhun Simanv Pedrun taka khunna korun mhonnlem: "To konnachi khobor korta?" 25 Tannem apli tokli Jezuchea horddear bagaun Taka mhonnlem: "Saiba to konn?" 26 Jezun portipall kelo: "Zaka Hanv unddeacho kuddko buddoun ditolom, toch to". Ani unddeacho kuddko buddoun, Tannem Judasak, Simanv Iskariotachea putak, dilo. 27 Unddeacho kuddko ghetlea uprant, tache bhitor Soitan riglo. Jezun taka mhonnlem: "Tum korunk vetai tem veginch kor". 28 Kitea pasot Tannem oxem taka mhonnlem, hem jevnnak boslelea dusrea konnakuch somzonk nam. 29 Judasa lagim pongtichi gantt asli dekhun Jezun taka oxem mhonnlem mhonn kai zannank dislem: "Porbek amkam gorjechem tem ghe" vo "durbollank kitem-i ghal". 30 Mhonntoch unddeacho kuddko ghettlea uprant, to rokddoch bhair sorun gelo. Rat zal'li.
31 To bhair vetoch, Jezun mhonnlem: "Atam Mon'xachea Putak mhoima mell'li ani Tache sovem Devak mhoima mell'li. 32 Devak Tache sovem mhoima mell'li zalear Dev-ui Taka Apnna sovem mhoima ditolo, ani rokddoch Taka mhoimevont kortolo. 33 Mhojea supurleam bhurgeamno, anink thoddoch vell tumche sangatim asam. Tumi Mhaka sodteleat; ani zoxem Hanvem Judevank mhonnlam, toxem Hanv atam tumkam-i sangtam: 'Zoi Hanv vetam thoi tumi atam ieunk xokonant'. 34 Ek novi adnea tumkam ditam: ekamekacho mog korat: Hanvem tumcho mog kela, tosoch tumi-i ekamekacho mog korat. 35 Ekamekacho mog korxat zalear, tumi Mhoje xis mhonn soglleam mon'sank kolltelem."
.jpg)
36 Simanv Pedrun Taka mhonnlem: "Saiba, Tum khoi vetai?" Jezun portipall kelo: "Hanv vetam thoi tum atam ieunk xokonai, punn magir ietoloi". 37 Pedrun Taka vicharlem: "Saiba, kiteak hanv Tuje pattlean atam ieunk xokonam? Tuje pasot hanv mhozo jiv diunk toiar!" 38 Jezun zabab dilo: "Hoi? Mhoje pasot tum jiv diunk toiar asai? Hanv tuka sot sangtam, kombean sad ghalche adim, tin pavtti tum mhaka nakartoloi".
14:1 "Tumchem kalliz uchamboll zaum noie; zoso tumi Devacher visvas dovortat toso Mhojer-ui dovrat. 2 Mhojea Bapachea ghorant puskoll svato asat; oxem nhoi aslem zalear, Hanv tumkam svat toiar korunk vetam mhonn tumkam sangtolom aslom? 3 Ani vochun tumkam svat toiar kelea uprant, Hanv novean ietolom ani tumkam Mhoje-xim vhortolom; oxem, zoi Hanv asam, thoi tumi-i asteleat. 4 Ani zoi Hanv vetam, ti vatt tumi zannot". 5 Tomasan Taka mhonnlem: "Saiba, Tum khoi vetai tem ami nokllonv tor vatt koxi zanno zateleanv?" 6 Jezun taka zap dili: "Vatt, sot ani jivit Hanvuch; konnuch Bapa-xim vochonam bogor Mhoje vorvim. 7 Tumkam Mhoji ollokh asli zalear, Mhojea Bapachi ollokh tumkam asteli asli; atanchean tumi Taka ollkhotat ani tumim Taka dekhla". 8 Filipan Taka mhonnlem: "Saiba, amkam Bap dakhoi: itlench amkam puro". 9 Jezun taka portipall kelo: "Filip, itlo vell tumche sangatim asam, ani azun tumi Mhaka ollkhunk nam? Zo konn Mhaka polleta, to Mhojea Bapak polleta; amkam Bap dakhoi', oxem tujean koxem mhonnum ieta? 10 Hanv Bapa sovem asam ani Bap Mhoje sovem asa mhonn tum sotmaninai? Jim utram Hanv tumkam sangtam tim Hanv Mhojech osttongim uloinam; punn Mhoje sovem asa to Bap Aplim kortutvam koirt asa. 11 Mhojem sotmanun gheiat: Hanv Bapa sovem asam, ani Bap Mhoje sovem asa; kortutvank lagon tori sotmanat. 12 Hanv tumkam sot sangtam: zo konn Mhojer visvas dhorta, to Hanv kortam tim kortutvam apunn-ui kortolo, ani tanche poros xrextt kortutvam kortolo, kiteak Hanv Bapa-xim vetam. 13 Tumi Mhojea nanvan magxat titlem-i Hanv kortolom, ani oxi Puta sovem Bapak mhoima mellteli; 14 tumi kitem-i Mhoje nanvim magxat zalear Hanv tem kortolom.
15 Tumi Mhozo mog kortat zalear, Mhojeo adnea samballteleat. 16 Ani Hanv Bapa kodde magtolom ani To tumkam anink ek Xerati ditolo ani Ho tumche sovem sodankal astolo. 17 Toch to sotacho, Atmo, sonvsar Taka gheunk xokonam, kiteak sonvsar Taka pollenam ani Taka ollkho-i nam; punn tumi Taka ollkhotat, kiteak To tumche sangatim rautolo ani tumche bhitor astolo. 18 Hanv tumkam onath koxe sanddchonam; punn tumche-xim ietolom. 19 Anink thoddoch vell asa ani sonvsar Mhaka anink dekhchonam, punn tumi Mhaka dekhteleat kiteak Hanv jivo asam ani tumi-i jive asteleat. 20 Hanv Mhojea Bapa sovem asam ani tumi Mhoje sovem asat ani Hanv tumche sovem asam mhonn tea disa tumkam kolltelem. 21 Mhojeo adnea gheta ani pallta toch Mhozo mog korta; ani Mhozo mog korta tacho Mhozo Bap mog kortolo, ani Hanv tacho mog kortolom ani taka Mhoji ollokh ditolom". 22 Zo Iskariot nhoi tea Judasan Taka mhonnlem: "Saiba. Tum sonvsarak Tuji ollok diunchonai punn amkam ditoloi, hem oxem kitem?" 23 Jezun taka portipall kelo: "Konn Mhozo mog korta zalear, Mhojem utor samballtolo, ani, Mhozo Bap tacho mog kortolo, ani Ami tache thai ietelenv ani tache sovem thikann kortelenv. 24 Mhozo mog korinam to Mhojim utram samballinam; ani jem utor tumi aikotat tem Mhojem nhoi, punn Mhaka patthoila tea Bapachem. 25 Tumche modem astanam, Hanvem tumkam heo gozali sangleat. 26 Punn Bap Mhoje nanvim tumkam Xerati dthaddtolo, to Povitr Atmo tumkam sogllem xikoitolo ani Hanvem tumkam sanglam tem sogott tumchea monant haddtolo. 27 Xanti tumkam dovortam; Mhoji xanti tumkam ditam; sonvsar dita toxi Hanv ti tumkam dinam. Tumchem kalliz uchamboll vo bhezudd zaum noie. 28 Hanv vetam ani Hanv tumche-xim ietam, oxem Hanvem tumkam sanglam, mhonn tumim aikolam. Tumim Mhozo mog kel'io zalear Hanv Bapa sorim vetam mhonn tumi sontosbhorit zatele asleat, kiteak Bap Mhoje-von vhodd. 29 Hem ghoddon ailea uprant tumi visvas dovorcheak atam hem ghoddche adim Hanvem tumkam sanglam. 30 Anink tumche lagim chodd Hanv ulounchonam. Hea sonvsaracho odhikari ieuncho zalo; Mhoje voir taka koslich podvi nam; 31 punn Hanv Bapacho mog kortam ani Bapan formailam tem palltam mhonn sonvsarak kollon ieunk zai. Utthat, hangasorle vochum-ia".
.jpg){kind=icon}
15:1 "Hanv khori dak-vel ani Mhozo Bap kullvaddi 2 Mhoje sovem follam dinam to dor-ek fantto To katrun uddoita, ani follam dita to dor-ek fantto odik follam diuncheak, To bhenddta. 3 Hanv tumche lagim uloilam tea utra vorvim tumi nitoll zaleat. 4 Mhoje sovem ravat ani Hanv-ui tumche sovem rautam. Fantto dak-velik lagon raulea xivai, tachean apxim follam diunk zainant; toxench tumi Mhoje sovem raulea xivai tumchean-ui follam diunk zainant. 5 Hanv dak-vel, tumi fantte. Zo Mhoje sovem rigun rauta ani zache sovem Hanv rautam, to subham' follam dita, kiteak Mhoje viret tumchean kaich korunk zainam. 6 Konnui monis Mhoje sovem rigun ravonam zait zalear, to eka katrun uddoilelea fanttea sarko sukta; osle fantte zoma kortat ani ujean uddoitat ani te lastat. 7 Tumi Mhoje sovem rigun rauxat ani Mhojim utram tumche sovem zai tem magat ani tumkam tem ghoddtelem. 8 Tumi subham' rautit zalear, tumkam follam diunchim, ani Mhoje xis tumi zaunche, hi Mhojea Bapachi mhoima. 9 Zoso Bapan Mhozo mog kela toso Hanvem-i tumcho kela; Mhojea mogant ravat. 10 Hanvem Mhojea Bapacheo adnea samball'leat ani Tachea mogant Hanv asam, toxench tumi-i Mhojeo adnea samballxat zalear, Mhojea mogant rauteleat. 11 Mhoji khuxalkai tumche sovem ascheak ani tumchi khuxalkai purnn zauncheak Hanvem tumkam heo vostu sangleat. 12 Mhoji adnea hi: Hanvem tumcho mog kela tosoch tumi-i ekamekacho korat. 13 Konnem zor apleam ixttam pasot aplo jiv dilo, hache poros vhoddlo mog nam! 14 Hanv formaitam tem tumi korxat zalear, tumi Mhoje ixtt. 15 Hea fuddem Hanv tumkam chakor mhonnchonam, kiteak aplo dhoni kitem korta tem chakor nokllo; punn Hanv tumkam ixtt mhonntam, kiteak Mhojea Bapachem Hanvem aikolam titlem-i Hanvem tumkam kolloilam. 16 Tumi Mhaka vinchun kaddunk nam, punn Hanvem tumkam vinchun kaddleat, ani hea pasot tumkam nemleat ki tumi vechem ani follam, togtat toslim follam, tumi diunchim. Oxem Mhoje nanvim Bapa kodde tumi magtat titlem-i To tumkam ditolo. 17 Hi Mhoji adnea tumkam: ekamekacho mog korat.
Sonvsar Xisancho Dves Kortolo
बदल18 Sonvsar tumkam zollta zalear, tumkam zollchê adim to Mhaka zoll'la mhonn zanno zaiat. 19 Tumi sonvsarache nhoi, ani Hanvem tumkam sonvsarantle vinchun kaddleat dekhun, sonvsar tumkam zollta. 20 Chakor aplea dhonia poros vhodd nhoi: oxem Hanvem tumkam sanglam, tacho ugddas dhorat. Tannim Mhaka dhumallo dila zalear, tim tumkan-i dhumallo ditelim; tannim Mojem utor samball'lam zalear, tumchem-i samballtelim. 21 Punn hem sogllem Mhoje pasot tim tumkam kortelim, kiteak Zannem Mhaka patthoila Taka tim ollkonant. 22 Hanv ieunk naslom ani tanche lagim ulounk naslom zalear, tankam guneanv ascho naslo; punn atam tankam aplea guneanvachem koslench nib nam. 23 Mhaka zollta to Mhojea Bapak-ui zollta. 24 Konnench korunk nant toslep kornnio Hanvem tanche modem korunk nasleo zalear, tankam guneanv ascho naslo; punn khorench tannim hem sogllem dekhlam, tori astanam tim Mhaka ani Mhojea Bapak-ui zolltat. 25 'Karanna viret tãnnim Mhozo dves kelo': hem utor zemtanchea xastrant boroilelem asa, tem ghoddonk zai mhonn oxem zalam. 26 Zaka Hanv Bafia koddsun tumche sorim patthoitolom to Xerati, mhonnge Bapa-sun nipzota to sotacho Atmo, ietolo tednam, to Mhoje vixim govai ditolo; 27 ani survatek thaun tumi Mhoje sangatim asat dekhun, tumi-i Mhoji govai ditele".
Chapter 16
बदल16:1 "Tumcho bhavart halonam zauncheak hem Hanvem tumkam sanglam. 2 Te tumkam devosthanantle bhai-raitele; khorem mhollear oslo vell pavot ailo, ki zo konn tumkam jivexim marta to apunn Devachi bhokti korta mhonn somzotolo. 3 Ani tãnnim Bapak ani Mhaka-i ollkhunk nam dekhun te oxem kortele. 4 Tancho vell pautoch Hanvem tumkam heo vostu sangleleo mhonn tumkam ugddas zauncheak, Hanvem teo tumkam sangleat.
Povitr Atmeachem Kam'
बदल.jpg)
.jpg)
Hanv tumche modem aslom dekhun, survatek thaun Hanvem tumkam heo vostu sangunk nasleo. 5 Punn atam Hanv Mhaka patthoila Tache-xim vetam; tori Tum khoi vetai gai mhonn tumche bhitorlo eklo-i Mhaka vicharinam. 6 Punn Hanvem tumkam heo vostu sangleat dekhun, tumchim kallzam khontin bhorlean. 7 Tori astam Hanv tumkam sot sangtam: Hanv gelom zalear tumkam adavachem; hanv vochonam zain zalear, Xerati tumche sorim ieunchonam; punn Hanv gelom zalear, Taka tumche sorim dhaddtolom. 8 Ani To ietolo tednam patka vixim, niti vixim ani nirnnoia vixim To sonvsarak guneanvkari kortolo. 9 Patka vixim, kiteak tannim Mhojer visvas dovorlonam; 10 niti vixim, kiteak Hanv Bapa-xim vetam ani tumi Mhaka anink polleunche nant; 11 nirnnoia vixim, kiteak hea sonvsarachea odbikareacher khastichem formonn poddlem. 12 Azun zaiteo vostu Hanvem tumkam sangcheo asat, punn teo tumchean atam monant gheunk zainant. 13 Sotacho Atmo ietolo tednam, To tumkam purnn sot xikoitolo; kiteak To Aplea podorchem ulounononam, punn jem kitem To aikota tem To sangtolo, ani ghoddchem asa tem sogllem tumkam kolloitolo. 14 To Mhaka mhoima ditolo, kiteak jem To tumkam kolloitolo, tem To Mhoje koddsun ghetolo. 15 Jem Bapachem tem sogllem Mhojem; hea pasot Hanvem oxem mhonnlam: tumkam kolloitolo tem To Mhoje koddsun ghetolo.
Khont ani Sontos
बदल16 Thoddeach vellan tumi Mhaka dekhchenant; ani anink thoddea vellan tumi Mhaka polleteleat. 17 Tacheam xisantleam kai zannamnim ekamekak mhonnlem: "To sangta: 'thoddeach vellan tumi Mhaka dekchenant, ani thoddea vellan tumi Mhaka polleteleat' ani 'Hanv Bapaxim vetam' —hem To amkam mhonnta tem kitem?" 18 Tor te mhonntale: "To 'thoddeach vellan' oxem mhonnta tem kitem? To sangta tem amkam somzonam." 19 Te Apnnakodde vicharunk kortale mhonn zanno zaun Jezun mhonnlem: "Thoddeach vellan tumi Mhaka dekhchenant ani anink thoddea vellan tumi Mhaka polleteleat' oxem Hanvem mhonnlam tacho orth tumi ekameka kodde vichartar? 20 Hanv tumkam sot sangtam, tumi roddteleat ani pinrgoteleat punn sonvsar khuxalbhorit zatolo; tumi khontibhorit zateleat, punn khontiche bodlek tumkam melltolo sontos. 21 Ek bail porsut zaunchea vellar aplo vogot paulo mhonn kontibhorit zata, punn bhurgeak zolm ditoch sonvsarant ek monis zala mhonn sontosun, tika anink khonticho ugddas zainam. 22 Toxench tumkam atam khont zalea, punn Hanv tumkam novean polletolom, ani tumchem kalliz khuxalborit zatelem, ani tumchi khuxalkai konnuch tumchea kallzantli kaddcho nam. 23 Mhojea nanvan Bapa lagim tumi kitem-i magxat zalear, To tumkam ditolo. 24 Azun porian tumi Mhoje nanvim kitench magunk ham; magat ani tumkam melltelem, ani oso tumcho anond purnn zatolo".
Sonvsaracher Zoit
बदल25 "Hem sogllem Hanvem tumkam voparimni sanglam; punn oslo vell pavot ailo, ki Hanv anink tumche kodde voparimni ulouncho nam, punn Bapa vixim ugddapem uloitolom. 26 Tea disa tumi Mhoje nanvim magteleat; ani tumche khatir Hanv Bapa lagim magtolom mhonn Hanv tumkam sanginam; 27 Karonn Bap khaxa tumcho mog korta, kiteak tumim Mhozo mog kela ani hanv Deva-sun upzolam mhonn tumim visvas dhorla. 28 Hanv Bapa-sun upzolam ani sonvsarant ailam; atam sonvsar soddum Hanv Bapaxim vetam". 29 Tacheam xisamnim mhonnlem: "Atam ki Tum ugddapim uloitai, voparimni nhoi! 30 Tum sogllem zannoi mhonn atam amkam koll'lem, konnem Tuka kitench vicharchi goroz nam; hea pasot Tum Deva thaun ailai mhonn ami visvas dhortanv". 31 Jezun tankam portipall kelo: "Atam tori tumi visvas thevtat? 32 Oslo vell pavot ailo, khoreponnim to paulo, ki tumi soglle ap-aple vatten ximpoddteleat ani Mhaka eklo sanddteleat; khorench mhollear Hanv eklo nam, Mhojea sangata Bap asa. 33 Mhoje sovem tumkam sovosteai mellcheak, Hanvem tumkam oxem mhonnlem: Sonvsarant tumkam khont astelich; punn kalljidar zaiat! Hanvem sonvsaracher zoit vhelam."
7:1 Oxem Jezu uloilo; uprant Aple dolle sorgak laun Tannem mhonnlem: "Bapa, vell paulo, Putan Tuka mhoima diuncheak, Tujea Putak mhoimevont kor. 2 Tunvem Taka dileleam soglleank sasnnachem jivit diuncheak, Tunvem akhea mon'xakullacher Taka odhikar dilai. 3 Sasnnachem jivit tem hem: tannim Tuka ekleach khorea Devak ani Tunvem patthoilai tea Jezu Kristak ollkhun gheunk. 4 Hanvem Tuka prithumecher mhoima dili; Tunvem Mhaka korunk dil'lem kam' Hanvem xarti pavoilem. 5 Atam, Bapa sonvsar asche adim Tujea sangata ji Mhaka mhoima asli, tech mhoimen Mhaka bhor. 6 Sonvsarantle kaddun Tunvem mhaka dileai team mon'xank Hanvem Tujem nanv kollit kelem; te Tuje asle, ani. Tunvem te Mhaka dilei, ani tannim Tujem utor samball'lam. 7 Jem sogllem Tunvem Mhaka dilai tem Tuje koddsun ieta mhonn atam tankam koll'lem. 8 Jixikovnn Tunvem Mhaka dileai ti Hanvem tankam dilea, ani tannim ti manun ghetlea, ani Hanv Tuje-sun ailam mhonn tannim khoreponnim ollkhun ghetlam; ani Tuvench Mhaka patthoilai mhonn tannim sotman'lam. 9 Tanche pasot Hanv magtam; sonvsara pasot maginam, punn Tunvem Mhaka dileai tanche pasot magtam, kiteak te Tuje. 10 Jem Mhojem tem sogllem Tujem, ani jem Tujem tem sogllem Mhojem; ani tanche vorvim Mhaka mohima mell'lea. 11 Ani atam Hanv anink sonvsarant nam, punn te sonvsarant asat, ani Hanv Tuje-xim ietam. Povtir Bapa, Tunvem Mhaka dileai tankam Tuje nanvim samball, oxem te-i amche bori ek zauncheak. 12 Tanche sangatim astanam, Tunvem Mhaka dileai tancho Tuje nanvim Hanv samball kortalom. Hanvem tankam rakhle, ani Povtir Pustokantlem utor khorem zauncheak, zachem nisontton zaunk zai aslem taka ekleakuch bhairaun, tanche bhitorlo konnuch ibadd zalona. 13 Punn atam Hanv Tuje sorim ietam, ani azun sonvsarant astanam heo vostu uloitam, Mhozo sontos tankam sopurnnaien mellcheak. 14 Hanvem utor tankam dilam, ani zoso Hanv sonvsaracho nhoi, toxe te-i sonvsarache nhoi dekhun, sonvsar tancho dves korta. 15 Tum tankam sonvsarantle kadd mhonn Hanv maginam, punn Noxtteachea hatantle tankam rakh mhonn magtam. 16 Hanv sonvsaracho nhoi, toxe te-i sonvsarache nhoi. 17 Sota vorvim sonvskarlele kor; Tujem utor sot. 18 Zoso Tunvem Mhaka sonvsarant patthoilai, toxech Hanvem-i tankam sonvsarant patthoileat. 19 Ani te sota vorvim sonvskarlele zauncheak, tanche pasot Hanv Mhakach sonvskartam. 20 Hanv magnnem kortam tem hanchech pasot nhoi, tor tanchea utra vorvim jim Mhojer visvas dovortelim tanche-i pasot. 21 Tim sogott ek zaum; Tum, Bapa, Mhojesovem asai ani Hanv Tuje sovem asam, tech bhaxen tim-i Amche sovemek zaum, ani oxem Tunvem Mhaka patthoilai mhonn sonvsar visvasdhorum. 22 Ami ek, toxim tim ek zauncheak, Tunvem Mhaka dileai timhoima Hanvem tankam dile1a.
23 Hanv tanche sovem ani Tum Mhoje sovem: oxim tim sopurnnaien ek zaum ani Tunvem Mhaka patthoilai mhonn, ani zoso Tunvem Mhozo mog kelai tosoch Tunvem tancho-i mog kelai mhonn sonvsar ollkun gheum. 24 Bapa, zoi Hanv asam, thoi Tunvem Mhaka dileai tim-i aschim mhonn Mhoji khoxi, ani oxi Tunvem Mhaka dileai ti mhoima tannim polleunchi kiteak sonvsar rochche adim Tunvem Mhozo mog keloi. 25 Promannik Bapa, sonvsaran Tuka ollkhun gheunk nam, punn Hanv Tuka ollkhotam; ani Tunvem Mhaka patthoilai mhonn hannim ollkholem. 26 Hanvem tankam Tujem nanv kolloilam ani kolloitolom, Tunvem Mhozo mog kelai toch mog tanche sovem ascheak ani Hanv-ui tanche sovem ascheak".
18:1 Oxem uloitoch, Jezu Apleam xisam sangata Kedron vallache poltoddi gelo. Thoi ek bag asli; tantunt To Apleam xisam borobor bhitor sorlo. 2 Ghatki Judas ho zago ollkotalo, kiteak sobar pavtti Jezu thoi Apleam xisam borobor vocho. 3 Judas ek poltton ani Porom-Iadnikamni ani Farizevamni dhaddleleam chovkidarank gheun ailo; divtteo, uzvaddi ani hatiaram gheun te thoi paule. 4 Tednam Jezu, Apnnak kitem ghoddtelem aslem tem sogllem zanno zaun, fuddem sorlo; Tannem tankam mhonnlem: "Tumi konnak sodtat?" 5 Tannim Taka zabab dilo: "Nazaretchea Jezuk". Jezun tankam mhonnlem; "Hanv to". Ghatki Judas tanche bori ubo aslo. 6 Jednam Tannem 'Hanv to' mhonnlem, tednam te pattim sorle ani zomnir xevttole. 7 Novean Tannem tanche kodde vicharlem: "Tumi konnak sodtat?" Ani tannim mhonnlem: "Nazaretchea Jezuk". 8 Jezun portipall kelo: "To Hanv mhonn Hanvem tumkam sanglem; mhonntoch, tumi Mhaka sodtat zalear, hankam vochum-diat". 9 Oxem Tannem mhonnlem tem utor ghoddon ieunk zai aslem: "Tunvem Mhaka dileai tanche bhitorlea ekleak legun Hanvem ibadd zaunk diunk nam". 10 Simanv Pedru kodde ek torsad asli, ti tannem bhair kaddli, ani Porora-Iadnikachea chakracher marun tacho uzvo kanuch katorlo. Tea chakrachem nanv Malku. 11 Jezun Pedruk mhonnlem: "Tuji torsad poteant ghal; Bapan Mhaka dilam tem patr Hanv pieunchonam?"
12 Polttonen, tichea sardaran ani Judevanchea chovkidaramni Jezuk dhorlo ani bandlo. 13 Tannim Taka pollo Anasager vhelo kiteak to Kaifasacho, tea vorsachea Porom'Iadnikacho, sasro aslo. 14 Porje khatir eklo monis melear odik faideachem mhonn Judevank bud dil'li to hoch Kaifas.
Pedru Jezuk Nakarta
बदल
15 Simanv Pedru ani dusro eklo xis Jezu pattlean geie. Ho xis Porom'- Iadnikache ollkhicho aslo dekhun, Jezu borobor to Porom-Iadnikachea angnnant bhitor sorlo, 16 punn Pedru dara bhair raulo. Porom'-Iadnikache ollkicho aslo tea dusrea xisan dar-rakhnne kodde utor ghalem ani Pedruk bhitor kaddlo. 17 Dar-rakhnnen Pedruk mhonnlem: "Tum-i hea mon'xacheam xisantlo nhoi?" Tannem mhonnlem: "Hanv nhoi". 18 Itlea mhonno-sor, hinv khatalem dekhun, kollxeancho doktto kel'lo tache bhonvtim ravun chovkidar ani chakram xek ghetalim; Pedru-i tanche bori aslo ani xek ghetalo.
Mha-Iadnik Jezuchi Chovkosi Korta
बदल19 Porom-Iadnik, Jezuk kai vichar ghalun, Tacheam xisam ani xikovnne vixim Tachi chovkoxi korunk laglo. 20 Jezun taka zabab dilo: "Sot'ten Hanv sobhemazar uloilam; sodanch Hanvem devosthanant ani Devtmondirant sogott Judev ektthai zatat thoi xikovnn dilea; guptim Hanv kitench ulounk nam. 21 Mhoje lagim kiteak vichartai? Mhaka aikolam tanche lagim Hanvem kitem mhonnlam tem vichar; Hanvem sanglam tem te bore zannot". 22 Tannem oxem mhonnonam fuddem, thoi aslelea eka chovkidaran Jezucher thapott marlem ani mhonnlem: "Mha-Iadnikak tum oso zabab ditai?" 23 Jezun oxi zap dili: "Hanv vankddem uloilam zalear, tachi govai di; punn zor tor Hanv sarkem uloilam, kiteak, mhonn tum Mhaka martai?" 24 Tednam Anasan Taka bandun, Kaifas Mha-Iadnikager patthoilo.
Pedru Novean Jezuk Nakarta
बदल25 Simanv Pedru azun thoi aslo ani xektalo. Tannim taka mhonnlem: "Tum-i Tacheam xisantlo nhoi?" Tannem nam mhonnlem: "Hanv nhoi". 26 Porom-Iadnikachea eka chakran Pedruk mhonnlem: "Are! hanvem tuka tache bori bagent polleunk nam re?" (Ho chakor Pedrun kan katorlolo tacho soiro aslo). 27 Pedrun, anink ek pavtt nam mhonnlem, ani tednach kombean sad ghalo.
28 Sokall zatoch tannim Kaifasager thaun Jezuk nitixallent vhelo. Apunn battonam zauncheak, punn apnnank Paskanchem jevonn korunk mellcheak, te niti-xallent bhitor gelenant. 29 Dekhun Pilatan apunnuch tanche-xim bhair ieun mhonnlem: "Hea mon'xacho tumi koslo guneanv kortat?" 30 Tannim taka zabab dilo: "Ho monis noxtto nhoi aslo zalear, ami taka tuje-xim haddche nasleanv". 31 Pilatan tankam mhonnlem: "Tumi taka vhorat ani tumche Somurti pormonnem tachi nit korat". Judevamnim aka mhonnlem: "Konnacheruch mornachem formonn marunk amkam podvi nam." 32 Apunn koso mortolo aslo, hache vixim jem Jezun sangun dovorlelem tem khorem zauncheak oxem ghoddlem. 33 Pilat novean niti xallent gelo ani Jezuk apoun tannem Taka mhonnlem: "Tum Judevancho patxai?" 34 Jezun portipall kelo, "Hem tum tujech osttongim mhonntai vo dusreamnim tuka Mhoje vixim oxem sanglam?" 35 Pilatan mhonnlem: "Hanv Judev tor? Tujeach lokan ani Mha Iadnikamni tuka mhojea hatant ghala; kitem kelai tor tuvem?" 36 Jezun portipall kelo: "Mhojem raj hea sonvsarantlem nhoi; Mhojem raj hea sonvsarantlem zal'lem zalear, Hanv Judevanchea hatant poddonam zauncheak Mhoje xipai zhuztele asle; punn Mhojem raj hangasorlem nhoi." 37 Pilatan Taka mhonnlem: "Mhonntoch patxai tum?" Jezun zabab dilo; "Hanv patxat mhonn tunvench sangleim. Heach pasot Hanv zolmolam, heach pasot sonvsarant ailam: sotak govai diuncheak. Jim konn sot manun gheunk toiar asat, tim Mhozo tallo aikotat". 38 Pilatan Taka mhonnlem: "Sot mhonnge kitem?"
Jezuk Mornnachem Formonn Poddta
बदलOxem uloun, Pilatan novean Judevam sorxem bhair vochun tankam mhonnlem: "Mhaka tacho kosloch guneanv mellonam. 39 Punn Paskanchca somoiar tumche vinovnnek kan diun hanvem ekleak suttka diunchi mhonn tumchi chal asa; Judevanchea Patxaiak hanvem suttka dil'li tumkam zai?" 40 Tannim porot bob marun mhonnlem: - "Haka nhoi, Barabasak sôdd!" (Barabas mhollear ek pundd aslo.)
Chapter 19
बदल
19:1 Tednam Pilatan Jezuk dhorun Tacher jerbond marunk laile. 2 Xipaiamni kanntteancho ekmukutt vinnlo, ani Tachea mathear ghalo, ani Taka ek zambllem anglemnesoilem; 3 te Tache-xim ieun mhonntale: "Noman, Judevanchea patxaia," ani Tacher thapttam martale. 4 Novean bhair ieun Pilatan tankam mhonnlem: "Polleiat, tacho mhaka kosloch guneanv mellonam mhonn tumkam kollon ieuncheak hanv Taka bhair haddtam". 5 Jezu tokantteancho mukutt ani tem zambllem anglem ghalun, aslo tosoch bhairailo. Pilatan tankam mhonnlem: "Polleiat, ho asa tumcho monis!" 6 Taka dekhlo tednam Porom'-Iadnikamni ani chovkidaramni bob marli: "Taka khursar mar! Taka khursar mar!" Pilatan tankam mhonnlem: "Tumich taka vhorat ani khursar marat, mhaka tacho kosloch guneanv mellonam". 7 Judevamni taka portipall kelo: "Amkam amchem Xastr asa, ani tea Xastra pormonnem taka moronn favo, karann to apunn Devacho Put mhonnta". 8 Him utram aikolim tednam, Pilat odik bhielo. 9 Porot niti-xallent vochun tannem vhicharlem: "Tum khoicho?" Punn Jezun taka zap dilinam. 10 Tea pasot Pilatan Taka mhonnlem: "Tum mhoje kodde uloinai? Tuka soddunk ani tuka khursar marunk mhaka podvi asa mhonn tum noklloi?" 11 Jezun taka portipall kelo: "Ti tuka voir thaun diunk nasli zalear, Mhojer tuka koslich podvi aschi nasli; hea pasot zannem Mhaka tujea hatant dila, taka odik vhoddlo guneanv asa". 12 He ghoddie meren Piht Taka soddunk sodtalo, punn Judevamni bob marli: "Hea mon'xak soddxi zalear, tum Sezaracho ixtt nhoi; apunn patxai mhonnta to monis Sezaracho dusman". 13 Pilatan him utram aikolim tednam tannem Jezuk bhair haddlo ani Chirebondj mhonnta te suvater Hebrev bhaxen Gabbatha, apunn nitt sodrer boslo. 14 To dis Paskanche toiarecho dis aslo; sumar donpar zal'lo. Pilatan Judevank mhonnlem: "Polleiat, ho asa tumcho patxai!" 15 Te arddunk lagle: "Taka nanch kor, taka nanch kor, taka khursar mar!" Pilatan tankam mhonnlem: "Tumchea patxaiak hanv khursar marum?" Porom'- Iadnikamnim zabab dilo: "Sezara bogor amkam patxai nam". 16 Tednam Taka khursar marcheak tannem tanchea tabeant kelo.
Tannim Jezuk dhorun vhelo. 17 Ani to Aplo khuris gheun Kortteachea mhonnlelea zagear vochunk gelo: hea zageachem nanv Hebrev bhaxen Golgotha. 18 Thoi Taka ani Tache borobor anink dogank tannim khursar khillaile: Jezuk modem ani team dogank Tache e-eke kuxik. 19 Pilatan ek namlekh boroilo ani to khursa voir ghalo; tacher oxem boroilelera aslem: "Jezu Nazaretkar Judevancho Patxai". 20 Jezuk khursar marlo ti svat xara lagim asli dekhun, zaiteam Judevamni ho namlekh vachlo; to Hebrev, Latin ani Greg bhasamni boroilo. 21 Tednam Judevamcheam Porom- Iadnikamni Pilatak mhonnlem: "Judevancho Patxai mhonn boroum naka. Funn ho monis apunn Judevancho Patxai mhonntalo mhonn boroi". 22 Pilatan zabab dilo: "Hanvem boroilem tem boroilem". 23 Jezuk khursar khillaitoch, xipaiamni Tachim angvostram ghetlim ani tanche char vantte kele, dor xipaiak ek vantto. Toxench Tachem anglem ghetlem. Angleak xivonn nasli tem voir-san sokol eksarkem vinnlelem; 24 hea pasot tannim ekamekak mhonnlem: "Amim tem pinzchem nhoi, punn sorti ghalun tem konnak poddta tem polleum-ia". He porim Povitr Pustokantlim him utram ghoddon ailim: "Tannim mhojim angvostram apnnam modem vanttlim ani mhojea angleacher sorti galeo". Oxem xipaiamnim kelem. 25 Jezuchea khursa-xim Tachi avoi, Tache avoichi bhoinn Kleofasachi potinn Maria, ani Magdalachi Maria, heo ubeo asleo. 26 Aple avoik ani tiche kuxik aslelea mogachea xisak polleun, Jezun avoik mhonnlem: "Ostore, ho tuzo put!" 27 Uprant xisak mhonnlem: "Hi tuji avoi!" Ani tea vellar thaun xisan tika apnnachi mhonn ghetli.
Jezuchem Moronn
बदल28 Hea uprant sogllem sompadlem mhonn zanno zaun, Povitr Pustok sopurnnaien khorem zauncheak, Jezun mhonnlem: "Mhaka tan laglea". 29 Xirkean bhorlelem donddul thoi aslem; tannim xirkean buddoilelem ek alombem boddiek laun, Tachea tondda-xim pavoilem. 30 Xirko chaklo tednam, Jezun mhonnlem: "Sompadlem." Ani tokli bagaun Tannem prann soddlo.
Xipai Jezuchi Kus Vidhta
बदल31 To toiarecho dis aslo, ani kherit dobajeacho Son'var lagim paulolo. Dekhun, Son'vara disa moddjm khursar uronam zauncheak, tanche pai moddche ani tanchim moddim kaddun vhorchim mhonn, Judevamnim Pilata kodde maglem. 32 Xipai aile ani Jezu borobor khursar marleleanche, poileache toxech dusreache-i, tannim pai moddle; 33 punn Jezu-xim pautoch. To melo mhonn polleun tannim Tache pai moddlenant. 34 Punn eka xipaian ek bhalo gheun Tachi kus vidhli, ani rokddench rogot ani udok vhanvlem, 35 Zannem hem pollelem tannench hi govai dilea, tumi-i visvas dhorcheak: tachi govai khori ani apunn sot uloita mhonn To zanno' 36 Povitr Pustok oxem mhonnta; "Tachem ek-punn add moddehenant": hem utor khorem zauncheak, heo vostu ghoddleo. 37 Povitr Pustok oxem-i mhonnta: "Aspas vidhleleak tim polletelim".
38 Hache uprant, Arimateiacho Juze, Jezucho xis, punn Judevanche bhirantin guptim raulolo, hannem Jezuchi kudd kaddun vhorunk Pilata kodde maglem. Pilatan rojea dili. Tannem ieun Jezuchi kudd kaddun vheli. 39 Ani Nikodem, Jezu-xim poilim ratcho ailolo to, sumar xembhor rat gondhrosachi ani musambhorachi misollnni gheun ailo. 40 Tannim Jezuchi kudd ghetli, ani Judevanche nikhipinneache riti pormonnem, pormoll laun ti oiimnim ghuttlaili. 41 Taka khursar marlolo te svater ek bag asli, ani te bagen azun konnak ghalunk naslo tosli ek novi somadhi asli. 42 To Judevancho toiarecho dis aslo ani ti somadhi laginch asli dekhun, tannim Jezuk thoi ghalo.
20. Riti Somadhi
बदल
20:1 Satolleachea poilea disa, Magdalachi Maria bhov sokallim, azun kallok astanam, fondda-xim aili. Tinnem somadhi veli fator kaddleli dekhli. 2 Mhonnun, Simanv Pedru ani Jezu mog kortalo to dusro xis asle thoi dhanvun vochun, tinnem mhonnlem: "Somiak somadhintlo kaddun vhela ani Taka khoi ghala tem ami nokllonv". 3 Dekhun Pedru tea dusrea xisa bori bhair sorlo ani somadhi-xim gelo. 4 Te dog-ui dhanvunk lagle, punn to dusro xis Pedru poros vegim dhanvlo ani somadhi-xim poilo paulo; 5 ani voddov ghalun, tannem zomnir asleleo oli dekhleo, punn to bhitor gelonam. 6 Tednam tache pattlean Simanv Pedru paulo ani somadhint bhitor gelo; thoi zomnir oli asleo teo tannem dekhleo, 7 ani Tache tokler ghal'lo to rumal, olim sorxim nhoi, punn kuxin kovoll'lolo. 8 Tednam somadhi-xim poilo paulolo to-i xis bhitor sorlo, ani tannem dekhlem ani visvas dhorlo. 9 Povitr Pustoka pormonnem To meleleantlo jivont zaunk zai aslo mhonn te azun nokllo asle. 10 Uprant xis ghora portole.
_-_WGA11503.jpg)
11 Punn Maria somadhi lagim roddot rauli, ani roddtnnam voddov ghalun somadhint polle zalear, 12 dhovim angavlim neslele dog devdut tinnem dekhle: zoi Jezuchi kudd dovorleli, thoi te bosun asle, eklo tokle vatten ani dusro paiam vatten. 13 Hannim tika mhonnlem: "Bai, tum kiteak roddtai?" Tinnem tankam mhonnlem: "Kiteak mhojea Somiak kaddun vhelo ani Taka khoi ghalo to hanv nokllom". 14 Oxem mhonnun tinnem patt voll'li ani Jezuk thoi aslo to dekhlo, punn To Jezu mhonn tinnem Taka ollkhunk nam. 15 Jezun tika mhonnlem: "Bai, tum kiteak roddtai? konnak sodtai tum?" To mali mhonn chintun, tinnem Taka mhonnlem: "Saiba, tunvem kaddun vhelai zalear, Taka khoi ghalai to mhaka sang, ani hanv Taka kaddun shortelim". 16 Jezun tika mhonnlem: "Marie!" Tinnem vollon Taka mhonnlem: "Raboni!" (mhonnge "Guruji"). 17 Jezun tika mhonnlem: "Mhaka dhorun raum naka! Hanv azun Bapa sorxim choddunk nam; punn Mhojeam bhavam-xim voch ani tankam oxem sang: Mhojea Bapa ani tumchea Bapa-xim, Mhojea Deva ani tumchea Deva-xim Hanv choddun vetam". 18 Maria Magdalen geli ani tinnem Somiak pollela ani Tannem apnnak oxem-oxem sanglam mhonn tinnem xisank kolloilem.
19 Tech sanje, mhonnge satolleachea poilea disa, xis zomlele asle thoichim daram Judevanche bhirantin bond korun dovorlelim; Jezu bhitor sorlo ani tanche modem ubo raulo. Tannem tankam mhonnlem: "Xanti tumkam!" 20 Hem mhonnun Tannem tankam Aple hat ani Apli kus dakhoilim. Somiak polleun xis khuxal zale. 21 Novean Jezun tankam mhonnlem: "Xanti tumkam! Zoso Bapan Mhaka patthoila, tosoch Hanv tumkam patthoitam". 22 Oxem uloun Tannem tancher svas soddlo ani tankam mhonnlem: "Povitr Atmo gheiat. 23 Zanchim patkam tumi bogxixat tim tankam bogsotelim, ani zanchim patkam tumi bogxinam zaxat tim tankam bogsochim nant."
24 Jezu ailo tednam baram modlo eklo, Zonvllo mhonnlolo Tomas, tanche borobor naslo. 25 Dekhun dusream xisamnim taka mhonnlem: "Amim Somiak pollela". Punn tannem tankam mhonnlem: "Tacheam hatancher hanvem khilleanchi khunna pollelea xivai, ani khilleanche svater mhojem bott ghalea bogor, ani mhozo hat Tache kuxint ghalinam zain zalear, hanv sotman'cheak nam". 26 Atth disam uprant, xis novean ghorant asle, ani tanche bori Tomas. Daram bond astanam Jezu bhitor ailo ani tanche modem ubo raun, Tanneam mhonnlem: "Xanti tumkam!" 27 Uprant tannem Tomasak mhonnlem: "Tujem bott hanga ghal: polle Mhoje hat; tuzo hat lagim hadd ani Mhoje kusint ghal; hea fuddem anink dubhav dhorum naka punn bhavart dhor". 28 Tomasan Taka zap diun mhonnlem: "Mhojea Somia ani Mhojea Deva!" 29 Jezun taka mhonnlem: "Mhaka polleloi mhonn, visvas dhorloi; pollenastanam visvas dhortat tim khorench subhagi".
Hea Pustokacho Hetu
बदल30 Anink zaiteo khunna Jezun xisam hujir keleo teo hea pustokar boroun dovrunk nant; 31 punn Jezu mhollear Krist Devacho Put mhonn tumim visvas dhorcheak ani visvas dhorun Tachê vorvim tumkam jivit mellcheak, heo vostu boroun dovorleat.
21:1 Tea uprant, Tiberiasachea Doria-xim Jezu dixtti poddlo; he porim To dixtti poddlo. 2 Simanv Pedru, Zonvllo mhonnlolo Tomas, Galileiantlea Kanacho Natanael Zebedevache put, ani Tacheam xisam modle anink dog ektthai asle. 3 Simanv Pedrun tankam mhonnlem: "Hanv maslli marunkvetam". Tannim taka mhonnlem: "Ami-i tuje borobor ietanv". Te gele anihoddeant choddle; punn te rati tankam kaich mell'lemnam. 4 Sokallim Jezun veller ubo aslo; to Jezu mhonn xisank kol'lemnam. 5 Jezun tankam mhonnlem: "Ixttamnno, maslli kitem tori poddlea mum?" Tannim Taka zabab dilo: "Kaich nam". 6 Tannem tankam sanglem: "Hoddeache uzve vatten ramponn ghalat ani tumkam nistem poddtelem". Tannim ramponn ghali, ani maslli ekdom' chodd poddli dekhun, tanchean ti oddun haddunk zainam zali. 7 Jezu mog kori tea xisan Pedruk mhonnlem: "To Somi!" To Somi mhonn aikun, Simanv Pedrun aplem anglem penkttak bandlem kiteak tachea angak kainch naslem, ani tannem doriant uddki marli. 8 Punn, masllen bhorleli ramponn oddit—oddit her xis aile; te toddik laginch asle sumar deddxem hat bhair. 9 Te veller paule tednam, tannim, thoi unddo dekhlo ani kollxeanchea ujear dovorleli maslli. 10 Jezun tankam mhonnlem: "Tumim atam dhorlea tantli thoddi maslli hanga haddat." 11 Hoddear choddun Simanv Pedrun ramponn veller oddun haddli. Ti ekxem trepon'n vhoddleam nisteamnim bhorleli asli; ani itleo vhodd maslleo astanam-i, ramponn pinzlinam. 12 Jezun tankam mhonnlem: "Nosteak ieiat". Tum konn gai mhonn vicharunk nosteak bosleleantlea konnakuch kalliz zalemnam; To Somi mhonn te zanno asle. 13 Tednam Jezun fuddem sorun unddo ghetlo ani tankam dilo; toxench maslli-i dili. 14 Meleleantlo jivont zalea uprant Jezu xisank dixtt poddlo ti hi tisri pavtt.
Mogache Ucharnne Uprant Mogachi Zutti
बदल15 Nosto zatoch Jezun Simanv Pedruk mhonnlem: "Simanv, Juanvachea puta, hanche poros tum Mhozo odik mog kortai?" Tannem Taka mhonnlem: "Hoi Saiba, hanv Tuzo mog kortam mhonn Tum zannoi!. Jezun taka mhonnlem: "Mhojim menddram rakh" 16 Dusre pavtti Tannem taka vicharlem: "Simanv, Juanvachea puta, tum Mhozo mog kortai?" Tannem Taka zabab dilo: "Hoi, Saiba, hanv Tuzo mog kortam mhonn Tum zannoi". Jezun taka mhonnlem: "Mhojim menddram rakh". 17 Tannem taka tisre pavtti vicharlem: "Simanv, Juanvachea puta, tum Mhozo mog kortai?" "Tum Mhozo mog kortai?" oxem apnnak tisre pavtt vicharlem dekhun Pedruk khont zali, ani tannem portipall kelo: "Saiba, Tum soglem zannoi; hanv Tuzo mog kortam mhonn Tum zannoi". Jezun taka mhonnlem: "Mhojeo xellio rakh. 18 Hanv tuka sot sangtam, tum lhan asloi tednam, tujea penkttak andtaloi ani tuka zai thoi tum vetaloi, punn tum mhataro zatoch tuje hat vistartoloi ani dusro konn tujea penkttak bandtolo ani tuka naka thoi vhortolo". 19 Koslea mornna vorvim to Devak mhoima ditolo aslo tem dakhounk Jezun toxem mhonnlem. Tea uprant mhonnlem: "Mhojea pattlean ie".
20 Pedru voll'lo ani Jezucho mogacho xis apnna pattlean ietalo to tannem dekhlo; heach xisan rat-jevnnar Jezuchea horddeak tenkun Taka mhonnlelem: "Saiba, Tuzo ghat ghetolo to konn?" 21 Taka dekhlo tednam, Pedrun Jezuk mhonnlem: "Somia, hachem kitem?" 22 Jezun taka mhonnlem: "Hanv ieum-sor to raulolo Mhaka zai zalear, tuka kiteak poddlam? Tum Mhojê pattlean ie". 23 Ho xis morchonam mhonn bhavam modem khobor zali; punn "to morchonam" oxem Jezun Pedruk mhonnlemnam, bogor "Hanv ieum-sor to raulolo Mhaka zai zalear, tuka kiteak poddlam?" 24 Hoch xis heam vostunchi govai dita: tannench heo vostu boroun dovorleat: ani tachi govai khori mhonn ami zannonv.
Sompadni
बदल
25 Jezun kel'leo anink-ui zaiteo vostu asat; teo soglleo ekan-ek boroun dovorleleo zalear, borounk poddtelim aslim tim pustokam dovrunk, sonvsar legun pauncho naslo mhonn mhaka dista.