Kandolechi Igorz

KANDOLECHI IGORZ Bardesan Fransiskani motthvaxi 1550 vorsa bhitor sorlole ani Verenche dongurler tannim aplem pennem kel’lem. Veream san te motthvaxi ek dis kandole pavlet ani tea-i vattarant kristanvponn vistarunk laglet. Kandolechea gavant Verenchea Fransiskanamnani kristanvponn pavoilem ani, magir Nagvechea gavant. 1585 vorsa Narveam ani Kandole Fransiskani vigar nemlole melltat; hea vorsa zaitem adim, heam don gavamnim kristanvponn vaddon gel’lem zait kiteak 1560 vorsa heam donui gavamnim katolk igorzo ubharloleo meltat; oxem tor heo don igorzo vo figorzo zaunk zai Bardesantleo poileo igorzo, eka- meka phattlean ubharloleo –mhoineachem ontor asot.

Veg Vegllim Motam

Poilem dev-mondir vo kopel anik dusrea zagear aslem zait, kiteak F. X. da Costa, hea itihaskara pormannem, 1556 vorsantlo ek dakhlo vo dokument eke Pornne Igorjecho (Igreja Velha) ul’lek korta. (Anais Franciscanos em Bardez , Nova Goa , 1926 P. 7-8 Ricardo M. Teles:Franciscanos em Bardez, p. 28) Hi poili igorz vo kopel khoim aslem kai ? Pri. Augusto Torrado , kandolecho adlo vigar ekdam sangtalo ki hi poili igorz asli atanche igorje san tinttear nitt rosto veta techea uzveak; aiz thoim xetam dixtti poddtat.

Anik ek tondd-kotha asa tichea pormonnem , Pinto Vaddeant (aiz Boscio Hospital asa thoim ), Dr. Guctavo Monteirachea ghora kuxik ek MANDD asa . Adlea kallar zhoim ganvkaranchi zomat ba bhortali ani zhoim ganvponn choloitalet, tea zageak MANDD mhonnot . Hea zagear ti poili igorz asli mhonn kaim zannacho odmas asa . Atam tea manddachea zagear ek KHURIS ghatla ani techer potreacho ek asro . Febrerache dusrer kandoi Saibinnichem fest zatoch, ratcho MANDD bhorta . Manddache vangddi kiristanvui asat; ximer san gumttam ani maddim vazoun ietat ani eka palkar nachtat , ho ek zagor ani to hindu ani kaim kristanvam-i kortat. Mukhi ZAGORIO sodanch hindu. Thoim KHURIS ghalta ani eka peddar Tulxi-I asa. Agnel Barreto hi itli sogott mahiti dita. Ghodeak hea zagear survek kristanvanchem kitem tori aslem jedna Kandole ozun kristanvponn rigunk naslem. Eka kherit disa bhailo lok porian tea Khursak vati pettounk ani Ladin kantar korunk ieta.

Novi Igorz Bandhunk Yevzonn

Poili igorz Fransiskanamnim 1560 vorsa bandhloli, zoxem Frei Antonio de Padua boroun dovorta (Livro de Monção No. 143). Hi pornni igorz bogor-bogor vaddouchi poddtalli, durust korchi poddtali , torui ek xekkdo bhor ti vapurli. Xekim 1661 ti adli igorz zaitich durust keli punn torui faideak poddli na. Heo soglleo oddchoneo dolleam mukhar dovrun , Frei Antonio de Assumpção (1668-71) hea Prantik voddilan ek novi igorz bandhunk formailem punn vegllea zagear, aiz asa tea zagear. Aiz ubhi asa ti igorz 1667 vorsa ubharloli punn adli sarki moddun ghatloli; ho novo zago bhikxa magun vikto ghetlolo. Hi igorz bandhunk ganvkaramnim duddvam-adhar dill’lo . Chodd khorch zai na zaunk , Frei Jeronimo de Navidade, hannem te igorjecho plan zaito bodol’lo kiteak to zaun also ek arkitekt; ani he porim bandhavollicho khorch devoilo.

Ek Vichitr Ghoddnnuk

1561 vorsa , ek vichitr ghoddnmnuk kandole ghoddli. Tea vorsa kaim Bamnnamnim ek Khuris bhoxttailo ani to Fransiskanamnim ubharlolo. Eka Fransiskanak boroch bodddoilo ani to melo mhonn teka soddun gelet. Tennim oxem kelem kiteak, apleo kaim murteo te Fransiskani mhottvaxi moddit mhonn te bhielole; tori kaim poileam kristanvamnim kaim murteo gheun tencho bhosm kelo.( Chitt: C. Luis, S.J., Goa, Dez. 1561, Documenta Indica, V, 358-98).

PINTO

Igorjecheo torri vo minari bandhleot teo eka xekddea uprant . Kandolecho ek motto kristanv , Frei F. X. da Costa pormonnem , zait ek Santu Sinai; to zollmol’lo 1577 vorsa ani teka Bautism dil’lo Nov. 3rer, 1585, diun nanv Salvador Pinto. Ho zait ghoddiek kandolecho poilo kristanv; kandole zaite PINTO mhonnlole kristanv asat. PINTO vaddo-i asa; te adle SINAI zait.

Durusti

Poili igorz Frei Pedro de Belem Hea Fransiskanani 1560 vorsa bandloli khoim ( Directory : Goa And Daman, 1992. P. 72). Hi igorz Nossa Senhora de Esperança ( Bhorvanxeache) Saibbinnik bhettoilea mhonn Frei Paulo da Trindade sangta. Punn igorjechea darvonttear vo darvontteanchea konvllancher EXPECTACÃO mhonn asa; he vixim gozal fuddem korchi. Igorjechea don torrim modhem , ek tikttem koxem onott asa techer boroilolem dixtti poddta oxem. N. S. E.; heam okxorancho orth zaum xokta: NOSSA SENHORA (de) ESPERANCA VO (de) EXPECTACÃO. Teo donui torri ganvkarannim 1764 vorsa bandhleo. Tantli ek, dave vattentli, panvsallean Agostache 17ver, 1948 ratchea 9 vaztam moddun poddli tedna , igorjecho-i kor, moddlo. Pro. Nicolau Noronha vigar also tedna, ti torr bandun kaddli. Team torrink 5 mallio asleo ani tencher fhantto umkolltaleo . Teo mallio supurlim kopelam koxim disot. Eke ghanttri Sant Pedruchi Protima (imaj) kantoiloli asa ani him utram: S. Pedro – Jose Domingos V. F. S. da Costa hennem keli Lisdoak; ani eke ghanttir asa “N. Sra. Da Esperança – hichi protima – e o Padre Pascal Pinto mandou fundir (Padr Pascal Pinto hennem korunk lailoli). Anikui don ghantti asat.

Torr moddun poddli tedna tea korar ek organv also to-i moddlo; ho organv Sevilha (Espanha) san haddlolo; 1955 to kor novean bandhlo ani tedna torrui bandhun kaddunk zai. Ho vavr suru kel’lo 1955 vorsa ani to sompoilo Abrilant 1959, khorchun 53 hozar rupoi. Hi khobor tednacho vigar, Pri. Nicolau Noronha, Mons. F. X. Catão heka ditalo. Korar boroiloli mellta hi tarik: 13-8-1955. Kora sokol onttincher donnui bazumnim “tribunas” – lokak ravunk – aslint tim Pinto (?) familichi rojea gheun vigaran kaddlim, kor bandhun kaddtana – hi bariksann mhaka sorgest Pri.