Natal

Romi

Natalam ani Paskam heo Kristanvanleo don mukhi an vhodd porbo. Natalanche porbent Jezucho zolm somarombhtat. Dusrea utramni sangchem zalear Devacho Put monis-rupan hea sonvsarant zolmolo ho gutt somarombhtat. Paskanchie porbent Jezuchem mornnacher zoit somarombhtat. Jezu morun tisrea disa novena jivont zalo. Jezuchea punorjivontponnachi porob. Dusrea utramni, hi porob, Kristi ani taronnik nodren, Paskanchea ghuttachi porob. Patkanche Soddvonnechi porob.

Natalam

Natalam, Kristi bhavartiank Kristachea dusrea yenneak toyar korta. Hem Kristachem dusrem yennem fuddarak ek khori ghoddnni. Ti kenna ghoddttoli hem ami nook. Tea khatir ami amchea patkantlim utthun Krista vatten vollunk goroz. Patok Devachea Rajeachea yenneak addkholl zaunk favonam. Zuanv Batista bhaxen Povitr Sobha, Kristavank sogllo vell monstap (repentance) porgott korta ani Somiachea hea dusrea yenneak toyar asunk ulo marta.

Sumar chovtea xekddeant thavn Kristanvam Jezucho zolm (Natalam) somarombhunk laglim. Natalam ho ek chodd umedicho sonn. Zoxem zoxem hi porob lagim pavot ieta toxem-toxem ek attvich umed ani anon dattun yeta. Khuxalkai bhoron yeta.

Natalanchi porob Goychea vatavoronnant Goykarank ek soglleant vhodd ani anondbhorit porob. Somest Goykarank ektthaim haddpi hi porob. He porbe nimitan soirim-dairim, ixtt-mitram ekamekak mellttat, vicharpus kortat. Kitlei motbhed, vaittponn aslear legit, Natalanchea disa sogllim ektthaim zatat. Pordesant ani aispos aslolim Goykaram Natalank aplea ganv-ghora yevpacho nem dhortat. Aplea kuttumba vangdda hi porob korunk anvddetat. Natalam khorench ek kuttumbik porob.

Aiz Natalam ek jagtik (global) somarombh zala. He porbe vixim poramporo dosturio (customs) ani jevnnam-khannam zori desam, sonskrutayam ani hovamana pormannem veg-vegllim tori tea disachi umed sogllim ontoram hupta. Ho porbecho dis soglleank suttiecho dis zallean hi porob konnachoi somaromb koso zala. Je bhaxen aiz him Natalam zatat te drixttin hie porbent sonvsari ani udeogi mon dhirim-dhirim bhitor sorunk laglam.

Pun khorea Natalanchie porbecho orth Biblient melltta. Xubvortomanachea don pustokancher tacho ullekh asa : Matev 1: 18-25 ani Lukas 2 : 1-20. konn bhaxen Mariek Jezu zolmolo tem hea avesvoramni sanglam. Tachea zolma vixim jeo vichitr vostu ghoddleo teo Devachie yevzonne pormannim zaleo oxem Kristanvam sotmantat. Jezu ek khalto ani durboll monis-rupan ailo. Provadianchea pustokamni tachea zolmachi khobor adim guddench sangloli asli.

Sobd monis zalo ani amchea modem jielo ho Dev-monisponnacho ghutt, Natalant, Kristanv somarombhtai.

Natal, Somia Jezu Kristachi zolom' somarom'bhta. Dor vorsa hi porob Dezembrachea 25ver zata.

Mandavôll

Jezu Kristachea zolmachi mural, San Juanv Bautistachea Igorjentli, Rio Jordanant

Survatechim utram

Natal Kristanvanchi dusri vhodd porôb, Paskam uprant.

Jezu Kristacho zolmacho dis konnech thiraien sangunk zaina, punn hinvachea vô xi'iechea disamnim zala mhunn somoz asa.

Jezu Kristacho Zolom'

Jezu Kristacho zolom' Belea nogra zalo. Devan bhasail'lo sonvsaracho soddvondar-acho vô Tarôk-acho zolom' eka gorvam-gottheant zalo. Tachi avôi Ankvar Maria, ji Povitr Otmeachea kurpent gorbest zali. Ankvar Morien, San Juzek lognnache utor dilelem.

Agust Romi patxai-achea razvottke vellar, Kirin razpalan aplea rajeant, lok kitlo aslo tem mezunk, hukum' ghatlo. Dor dadlean ap-aplea ganvant vochun nond korpachi goroz aslelean, San Juze Galileiachea Nazaret ganvasun Belea nogra gelo.

Jezuchea Zolmak Boddve, Menddream-Rakhnne ani Rai

Oso adlo somoz asa ki, Anj-Boddveanim Ankvar Moriek zolom' ditanam adar dilo. Boddveanim Gloria in excelsis Deo gaion ontrollar gailem ani Devak vakhannlo.

Jezuk polleunk gorvam rakhnne aile. Udentiche tin rai Melkior, Gaspar ani Bartolomeu eka nokhetrak polleun aile. Tannim bhangar, gondh-ros bi haddlim.

Herod Jezuk marunk sodta

Jezuk bhett korpachea adim udentiche tin rai Raza Herod-ak mellunk ailole. Raza Herod-ak Jezuchea zolmachi khobor koll'li. Herod-ik ballkak marunk zai aslo kiteak Jezu raza aslo. Jezuk nomoskar korunk udentichea tin rai-ank fott marun, Tacho zolmacho zago kollounk lailem. Punn Jezuk bhett korun, udentichea tin raiank eka sopnnam vorvim, Devan tankam aplea desak veglli vatt dhorunk laili.

Herodik hem koll'lea uprant, soglleam don vorsam unnem aslolea putank marpak hukum' ghatlo.