Pernnem Zagor

देवनागरी

Romi

Pernni zagor gõychea lok somskrititlea lok natteacho ek prokar. Dokxinn goyant fokot poinginnit ho prokar pollounk melltta. Tonddar mukhtti ghalun, soung nattoun lokanchi kormonnuk korpacho proitn ya zomatin suru kela.

Poinginn gamvat pernni zagor korpeanche ekoch kuttumb asa. Baraboluteampoiki ek oso ho somaz. Sadaronnoponnan 1881 te 1892 salant poile pautti aile. Hea somazacho mull purus molu dulba pernni ani sodaxiv pernni. Hancho varos supul'lo pernni ani supulealo varos pako pernni. Hi mull kotha. Sounga nachoun lokanche kam'.[1]

pernni hi zomat sounga nachoita hacho lab gheun tea vellavelea devaleachea mehalogddeamni pernni zomatik devaleani kam' korpak apoile. Tea vellar monrizounnichem dusrem sadhon naxil'lem ani pernnik pott bhorpachem sadon naxilean pernni zomatin devaleank zagor korpache many kelem. Ani poinginnchea xri vetall devaloi boroboroch, xri porxuram', xri.Durga devi techbhaxen khotigamv, gamvddongori, xristhollochem mol'likarzun deusthan, kholchem betall deusthan tebhair barxem sarkelea gavant legit pernni zagor sodeak cholta.

Poinginnchea xri vetall deullakodden zo goddeanchea zotrecho utsou zata tea utsovatea nimtan pernni zagor cholta. Hi zomat eke pettyent ghalun somvga (mukhtti) haddtta. Ani ratchea sadaroponnan okra te bara voranchea modengot zagrak survat zata. [2]

Pernni zagrak puraton manla. Sorsvotiche nomon, adimateche nomon, dhovo podd'do, divli, tambddea pittkullechi fulanchi mall, mhatari, ghoddo hem ghoddye devo deutank, sontuxtt korpakhatiroch cholyil'lem. Poinginnik zo zagor zata tatunt poilim gonnpoti yeta, tea uprant sorsvoti, ani xonkor yeta. Mohadevo komrak 'ling' bandun nachpak yeta. Hanga gonnpotichi puza zaina. Zalear xonkrachi puza zata. Mull zo pernni asta to sogllea kareavollichem sutr sonchalon korta. Te uprant madhu, kittu ya rakxosamboroboroch 'zalimon' namvacho rakxos yeta ani ten'na mohixasurachea akheanak survat zata. Rakxosanche bollgem vaddlam, devale bollgem unnem zalam. Ten'na sorpacho chabuk , vagacho ghoddo korun laddhayek vochuya ani rakxosank marun uddovea oxi akheanam suru zatat.[3]

Hea rakxosak marpa khatir devi yeta anim hem kam' dadle kortat. Tea dadleak lamb paibhor deutele kapodd nhesoitat.

Sata somudra mode mohixa sur rajyokori doiteache bolle undodd ddhale. Devache volle moddle vaghacha koru re ghodda sorpacho koru re chabuk hati ghevun khoddgovatti lagle doitachea patthi ek doity mrindombh zhala. Roktacha themb poddla doityoraz marile. Devo rajy kele attkhott pachaule. Sorv sontoxi zale

Teach bhoxen xemsor bhortastana je ek pod mhonnttat te legin voixixtty purnn oxench asa.

Ara monddoll bara | gava ontor tera gavachi addapidda |rozoveachi nidda apuliancha voddouni koisa | ghagriancha talla ollsa devi mollsa devi | pivlla devi, soir pach oise milloni ya | gamv deti xems gavachi addapidda | ijvayachi nidda ek mull vhovilear | sohstr kumbh pik ek ghunnia bhor hat dhunnia | sohstr gunniapatt.

Tokler mukutt, hatant khoddog, gheun deutechea rupant ho dadlo monis yeta ten'na tachea angak devi soncharil'li asta. Tacher bhar yeta. Taka doni votten dog zann dhortat oxa sthitint hi devi doiteankodden loddhai korta. Madhu,kittu zalimon rakxosank marta. Hea vellar peronnycho mukheli ghoddeacho mukhoutto gheun yeta. Zagor sompta.

Ratchea sadaronn okra-baranchea modem zagrak survat zata. Mukhel pernni ddholkem gheta. Dusreachea hatant zhanz asta. Deullachea monddpak mukheli divli pettoicha. Divlek pittkulleanchea fulancho har ghalta. Pernneamborobor sangatak ayil'le don monis ek dhovo podd'do bhair kaddta doni votten ho podd'do dhortat. Ani zagrak survat zata.

Poile nomon koru sorsvoti maye sorsvoti xarda ronge aili maye.

Gonnpotichea kheriz ony deudeutachi nava gheun zhale uprant komrak moracho mukhtto bandhun sorsvoti yeta.Poilim he somvg ek kumarika kortali. Atam poristhoti bodl'lea. Sogllim kamam mukhel pernnich korta.

Poinginnchea pernni zagrak mukhel patr mhollear mhatari. Adimaya patli ga oxe mhonnot tonddar mhatarelo mukhtto, hatant ek boddi ghevun mhatari manttvat yeta. Pernni zagratole mhatari he je patr asa tem vinod korpachem, ekamekanchi fokanna marpache patr. 'sata somudra peleat panch mojli bonglo bandhun xeuttchea mojlear sut kaddpak boxil'lim hamv tumchem mon rizhoupa khatir ailea'. Oxem sagumn mhatari poilech gaukreank hamsoita. Hea vellar mhatarek gamvche mukhel je manttvak boxil'le astat te nana proxrn vicharotat. Tuka bhangor konne dil'le? . Tika ghor konne bandun dil'le? ten'na mhatari ekadea mukhel gaunkoreanche navo tantuk guntun mhonnta 'mhaka bhangor more ...... Dil'lem.

Pernni zomat hi deudasi somazasarokhich. Ya somazatlea choleanchi poili logna zaina axil'lim. Xems ghalpachi' pod'dhot choltali . Karonn choleank ghora douroli mhollear zagrak upeogi poddttalim. Pernni zagrachea kheriz poinginnik doiteancho zagor, divzancho zagor, chorancho zagor he utsou choltat. Goddeanchea zotrechea nimtan suru axilea ya utsovak veglle xastr ani vegllo vidhi legit asa. Pernni zagor korpi somazak deuskhanat xet zomin soddil'li asa. Poromporen cholpi hi kola sodeak tori namxex zaupachea margar asa. Ektor pernni somazatoli bhurgim her dhondeak laglim. Zannttelim jim asat tim fokt ek vidhi mhonnun deullachea dhormik utsovachea vellar kaim promannak zagor kortat. Punn poilim zoxe talukeachea her vattharank legit zagor choltalo ti pod'dot sodeak tori bond poddot gel'li asa. Pernni zagrachi mukhtti ji asat ti pornni zait geleant. Tim porot toyar korpachea diken proitn zal'lo disna. Eke votten suxtti utpoti poilinchi kotha,pittkollechea fulancho aspavo axil'lea yautsvak az fokt bhogaull, vidhi itloch sombodh urla. Gõychea loknatteache ek mukhel ang axil'lo pernni zagor sompot aila.