Sherpa

देवनागरी

Romi

Xerpa nepallantoli ek zat. Tibettantlea xorp hea xobda posun xerpa hem namv ailam. Xorp hea xobdacho orth udentekoddolo oso asa. Punn xerpanchi choddxi vosti tibettache dokxinnek asa. Nepallchea her vattharamni-i xerpa asat. Kaim xerpa lok nepallochi xim' humpun bongalchea darjiling jilheant yeun rauleat. Xerpa lokanchi mukhel vosti khumvu, farok ani solu hea tin vibhagamni asa. Khumvuntole gamv 12 te 13 hozar futt unchayecher asun farkantole gamv 8 te 9 hozar futt unchayecher asat. Hea tinoi bhagank mellun solu-khumvu va xor-khumvu hem samany namv asa. Hea tinoi bhagantole xerpa ekech zatiche asle tori khumvu ani sol hea vibhagantolem hovaman ani zomnicho vatthar hatunt khub forok axil'lean xerpanchea rabiteantuy khub forok asa.

Sherpa family with traditional Sherpa clothing

Nepal ethnic groups : Sherpa, Thakali, Gurung, Sunuwar Kirati, Rai, Lohorung, Parali, Bahing, Limbu, Newar, Pahari, Tamang

Zati ani ghorannim

Nepallant je tibetti lok rautat, tankam nepalli lok bhottia hea samany namvan vollkhotat. Punn bhottiancheo khub zati asun, tatuntoli xerpa hi zat porvot-bhomvddeche kuxllotayek lagun chodd prosid'd asa. Himaloyantlea oxir degnnam ani euhoresttachea temkanchyai suvatimni he lok vosleat.

Xerpa lokanchi otthra ghorannim asun, tancheant porspor lognosombond zatat. Tanche bhaxent ghoranneak ru mhonnttat. Dor ek ghoranneachem kuldoivot vegllem asta. Hea sogllea doivtancho aspavo jhidog mhollear bhudeuta hea vorgant kela. Khumvuyulh namvacho sthanik devo hea sogllea doivtamporos xrextth mantat. Hea otthra ghoranneantlea lokank somazant chodd protixttha asta karonn tankanch khore xerpa mantat. Her xerpa tancheporos komi mantat, tankam khomba mhonnttat. Punn soglle xerpa ekcharan rautat. Hea khomba xerpantuy khoddyu ani khomenddyu namvache veglle pottbhed asat. Khoddyu he khomenddyu xerpamporos uchch. Hea donuy pottbhedamni porspor lognosombond zainat.

Dhormik Vidhi

Xerpa lok boudhd ponthache onuyayi asat. Te aplea ghorant prarthana kortat, prarthona-chokram firoitat ani gomba, chortten hankam prodkxinna ghaltat. Kaim lokanchea ghorant deughor asta. Xerpa lokank mhotvache dhormik vidhi ani bhouxik sonna-porbank lamachi goroz poddtta. Te khatir pitth va xit ani lonni ghalun torma mhollear deutancheo akriti toyar kortat. Vidhi purai zatkuch teo akriteo moddun tanche kuddke prosad mhunn vantt'ttat. Tea tormanchea fuddeant manvi koutti posun toyar kel'le tin pele ani tatunt mer mhollear mhomv ani rogot dourotat. Rogot mellop xoky naxil'lean chea dourotat. Pujechea vidhint poilim deutank avahon korun vadeancho gozor kortat. Uprant tea deutanchem stoun ani montrozop kortat. Nimanni prarthona kortat.

Motthantlea bhikxu ani bhikxunninchem jiun xistobdhd ani tharil'lem asta. Tankam sotot dhormacho obheas korcho poddtta. Tanchey kaim sonn ani utsou astat. Gamvantole lok tanchea hea utsovank umedin ekttham-i yetat. Samany xerpank motthantlea bhikxumvixim khub ador asta. Karonn grihosthaxromaporos motthantolem somnyost jiun uchch xrennichem asa oxem soglleanchem mot asa. Gamvant ravun somvsar korpi-i lama astat. Gamvantole sonn-utsovantole dhormik vidhi te kortat ani khaxelea mhotvachea vidhinkhatir motthantlea lamank apoitat.

Logn

Xerpa lokant, lognapoilinchea loingik sombondancher koslinch bondhnam nat. Oslea sombondantlean bhurgem zolmak ailear cholyecho auy-bapuy tea bhurgeacho samball kortat. Tornatte chole-choleo apunnoch aplo zoddidar tharaitat. Logn sombond chodd korun soman dorjeachea ghoranneantuch tharaitat. Ate-mame-maus bhaunddanchim lognam korinat. Lognosombond pokko tharaupakhatir sakor-puddeacho somarombh kortat taka ddem'-chong mhonnttat. Uprant kaim vorsamni logn kortat.

Mukhel somarombha vellar eke xendrecher tandull patllaun tatunt don svostikam kaddttat. Tancher nhouro-vhonkol bostat. Mukhar lama bosta. Nhourea vhonklechea koplak lonni laun, ekmekankodde eknixtth raupacho tankam updex kortat. Nhourea vottenoche lok xonkh fukun nachtat. Hea vidhik gyen-kuttop mhonnttat. Haka khub khorch yeta. Te khatir rit namvacho lognacho prokar ruddh asa. Hatunt nhouro vhonklechea bapaik kaim rupea divn aplea ghora vhorta. Hoi prokar gyen-kuttopa itloch kaidexir mantat.

Eke bailek don bhavankodde logn zaupak melltta. Toxem kel'lean ghorantole malomt'techi vanttnni zaunk pauna. Punn oxe torecho logn sombond chodd kall tigna karonn dhaklo bhavo choddso dusre tornatte cholye vangdda logn zaun novo somvsar manddtta. Dadleak kitlyai bailankodde logn zaupak melltta. Tankam ghottsfott samko sadeponnan gheupak melltta. Dogamychea soireank soro divpacho ani ghovan ‘ami vegllim zaleant, atam ami ghovo-bail nat’ oxem soglleanchea mukhar sangpachem. Tea vellar ghova vottenchea eka ani bailechea vottetlea eka soirean dhoril'lo doro toddttat. Hench ghottsfottachem protik asa.

Hea lokant ghorzaum-i korpachi chal asa. Zankam cholo na oxe auy-bapuy cholyechea ghovak ghora apoitat ani taka aplo varos nemtat. Punn tachem ghorannem vegllench urta. To mavachem namv laina. Utsou ani porbo

Xerpa lok vegvegllea hongamant toratorachem dhormik vidhi ani sonn monoitat. Tatuntole kaim oxe asat.

   Tsirim' : epril mhoineant xetachim kamam suru kortona ani ekttobor mhoineant tim kamam purai zatkoch ho vidhi kortat. Xetant pernni kortokoch novea pikachi devan rakhonn korchi mhunn epril va me mhoineant ho vidhi kortat.
   Niungne : papantlean mukt zaupa khatir niungne ho vidhi kortat.
   Dumje : dumje ho atth dis deullant cholpi gamvantolo vhoddlo utsou.
   Ther-chong : gorvam khatir ther-chong ho utsou monoitat.
   Monni-rimddu : ho sonn dumje bhoxenuch asta punn to motthant kortat.

Veusai

Xeti, poxupalon ani vepar he xerpanche mukhel veusai asat. Tibettakodde xerpa lokancho veusai cholta dekhun her zatinchea lokamporos te sodhon asat. Tibettantlean te mitth ani lokor haddttat. Gorvam, dhany, lonni, kagod, chamddem, kakhor he podarth tibettant dhaddttat. Kaim podarth te bhartantlean haddun tibettant dhaddttat. Halim tankam girearohonn ho novo veusai mell'lla. Girearohonn korotleanche margodrxok, modtogar mhonnun xerpanchi kheati asa. Tensing xerpa hachem namv tache girearohonnache kamgirikhatir namnek paulam.

Adhunik kallantlea suvidhanchea somprkak lagun ani vicharosoronninchea probhavak lagun, her zomatim bhoxen xerpanchyai chali ritimni ani poromporamni bodol zal'le dixtti poddttat.

Moronn

Xerpa monis mortokoch lamak apoitat. To prarthona mhonntta ani mel'lea monxache tokleche kems humttun kaddtta. Thoinchean mel'lea monxacho atmo bhair sorta oxi tanchi somzut asa. Uprant tin dis tem moddem boxil'le sthitint vonnttik bandun dourotat. Lama vegvegllea deutanchi torma korun tanchi stotram mhonntta. Mornna vellar vadeam-i vazoitat. Xerpa lokant moddem zallpachi chal asa. Bhurgeanchim moddim mat purtat. Mel'lo monis gorib aslear va taka konnuch soiro-dhairo nasot zalear tachem moddem nhomyent uddoitat. Punn ken'na ken'na lamachea sangnneavoilean tem purtat. Satvea va ikravea disa nopur namvacho vidhi asta. Mel'lea monxachi ek akriti korun tika tache kopdde ghaltat ani lama ek pustok vachta. Tika on'n dita ani tea atmeak sorgant vochpak sangta. Teach disa soireank-ixttank jeunn ghaltat. Hea lokant xradhd korpachi chal na.

Polleiat

Sherpa_people