किशोर छोटुभाई जोशी

किशोर छोटुभाई जोशी हाचो जल्म २९ जुलय १९३५ दमणांतल्या भीमपूर वाठारांत जालो. तो गोंयचो एक सुटके झुजारी जावन आसलो.ताणें बी.ए.मेरेन शिक्षण घेतलें.दमण आनी दीव वाठाराचे शिमेचेर डेप्युटी जनरल आनी स्टेट रिझर्व पोलीस हांच्या मार्गदर्शनाखाला पोर्तुगेज सरकारान दमण वाठारांत नेमिल्लें पोर्तुगेज सैन्य,लश्करी विमानतळ,राजभवन,वीजकेंद्र,लश्करी हॉस्पिटल हांचेविशीं पुराय म्हायती काडून घेवपाचें काम तो करतालो.लोकांक सुटकेविशीं म्हत्व कळचे पासत तो तांकां राश्ट्रवादी साहित्य वाटतालो.शीम हुपता आसतना पोर्तुगेज पोलिसांनी ताका धरपाचे जायते यत्न केले.अखेरेक ३० नोव्हेंबर १९५६ दिसा पोलिसांनी ताका ताच्याच घरांत धरलो आनी १५ मे १९५७ मेरेन ताका दमण बंदखणींत दवरलो.थंय ताका हवा आनी उजवाड हांची फाव ती वेवस्था ना,अशा एकांतवासांत दवरिल्लो.१७ मे १९५७ दिसा ताका पणजे बंदखणींत व्हेलो आनी थंयसावन जून १९५७ त,ताका आग्वाद बंदखणींत दवरलो.उपरांत पणजे शारांत आशिल्ल्या प्रादेशिक लश्करी न्यायालया (Territorial Military Tribunal)मुखार चवकशी करतकच,ताका दोन वर्सा आनी आठ म्हयने खर बंदखणींची ख्यास्त दिली.१७ मे १९५९ दिसा जेन्ना सगळ्या कैद्यांक सूट मेळ्ळी तेन्ना ताचीय बंसखणींतल्यान सुटका जाली.१४ ऑगस्ट १९७४ दिसा भारत सरकारान ताम्रपत्र दिवन ताचो भोवमान केलो.१८ जून १९८५ दिसा गोंय सरकारान सुटके झुजांतल्या ताच्या वावराचो भोवमान केलो.