बडे गुलामअलीखाँ

बडे गुलामअलीखाँ

संगीताची आवड

बडे गुलामअलीखाँ हो आंतरराश्ट्रीय किर्तीचो गायक.ताचो बापूय अलीबक्ष आनी बापोलयो कालेखाँ हे दोगूय पतियाळा घराण्याचो नामनेचो गायक फतेअली हाचे शिश्य आशिल्ले.खाँसायब अलीबक्ष गावप वांगड दिलरुबा हें वाद्य बेस बरें वाजयतालो.

शिक्षण

गुलामअलीखाँ आनी ताचो धाकलो भाव बरकत अलीखाँ ह्या दोगांयनी संगिताचें मुळावें शिक्षण आपल्या बापायकडेनूच घेतलें.गुलामअलीक गोड आवाजा वांगडाच ग्रहणशक्तीची जोड लाबिल्ल्यान पिरायेच्या विसाव्या वर्सासावन तो बरे तरेन गावंक लागलो.

जिविताची वाट

तरी स्वतंत्र मैफली करूंक लागतकच 1927 वर्सासावन ताका नामना मेळूंक लागली.पंजाब तशेंच कलकत्त्याक भरिल्ल्या संगीत परिशदांनी ताणें 1940-42 मेरेन बरेंच नांव मेळयलें.1944 वर्सा मुंबय भरिल्ल्या ‘विक्रम संगीत परिशदेत’ ताणें आपले कलेन लोकांक भारावन उडयले.देशाचो फाळणे उपरांत तो मुंबय रावपाक आयलो.ख्याल, ठुमर्योव, भजनां आदी प्रकार सारक्याच समर्थपणान आनी गोडव्यान गावपी एक असामान्य गायक म्हणून पुराय देशांत ताची नामना जाली.तेचपरी पंजाबी ढंगाचो ठुमरी गायक म्हणून ताची एक वेगळीच नामना आशिल्ली.’सबरंग’ ह्या टोपण नांवान ताणें जायत्यो ख्याल आनी ठुमर्योम रचल्यो.

भोवमान

1956 वर्सा ताका भारताचें नागरिकत्व मेळ्ळें. संगीत नाटक अकादमी वरवीं इनामा आनी भारत सरकारावरवीं ताका ‘पद्मभूषण’ हो किताब मेळ्ळो.