Romi
   

Abdul Kalam Azad (Zolm 11 Novembr 1888, Makkah; mornn 22 Februvari 1958, Delhi). Bhartacho ek mukhel rajki fuddari. hachem mull namv Mohiud'din Ahmed oxem asun Abul Kalam' (vachspoti) hi tachi podvi. Tachea fuddem Azad (svotontr) hem ttopnnonamv to laitalo. Tacho zolm' eka vidvan ghoranneant zalo. Tachem lhanponn Makkek gelem. Tajea Bailechem nav Zuleikha Begum aslem (m. ?–1943) Arbi ani Farsi bhas to aplea Bapai laghim xinklo. Bapaichea sangatak 1890 to to Kolkoteak ailo. Paromparik Musolmanachi xikxonn podhdoti promannem tannem Farsi, Urdu, Arbi, hea bhaxanchem xikop poilim korun torkoxastr, Islam 'dhorm', totvoginean ani gonnit hanchem xinkop kelem. Fuddem Sir Sayed Ahmed Khan hachea lekhancho porinnam' zaun tannem Inglish bhaxecho obheas svotontr ponnan suru kelo. Lhan pirayecher 1902 posun tannem nemalleamni lekh boroupak survat keli. 1905 to Lucknow-chea ‘Ain-Nadwa ’ hea potracho to sompadok zalo. Tea uprant don vorsamni to Amritsar gelo ani thoinchea ‘Vokil ’ hea potracho sompadok zalo. 1908 to Ijipt, Arabstan, Turkistan, France hea dexank tannem bhett dili. Thoinchea krantiviranchea sompkarak lagun tachim rajki-i motam bodlopak laglim ani Kolkot'ta porot etoch Hindu Muslomanamni svatontr zhuzant vantto gheucho oxem mot tannem manddlem. Lok zagritaye khatir 1912 to Kolkot'ta hanga tannem svotachem ‘ Al-Hilal hem urdu satollem suru kelem. Urdu bhaxent hache adim itlea unchelea pamvddeachem nemallem eunk nasl'lem. Nemalleamni, khobreptramni ‘Azhad’ hea ttoponn namvan to boroitalo. Vrit'toptrachem sompadon korta astona to French bhas xinklo.

Maulana Abul Kalam Azad
At Wardha Railway Station:Maulana Azad, Acharya Kripalani, Sardar Patel, Subhash Bose.

‘Al-Hilal ’ potrant kel'le khor rajki tikek lagun British sorkaran tache koddosun 10,000 rupeancho zamin maglo. Tannem to dilona mhunn tem vrit'tpotr bond poddlem. 1915 to tannem ‘Al-Baladh’ hem dusrem disallem suru kelem. Taka lagun Azad-ak zaitea prantamni vochpak Sorkaran bondi ghatli. Fuddem taka Sanchi hanga sthanbondh kelo. Tache Atkek lagun Musolman khuball'lle. 1920 to bondkhonnintlean suttlo. Ashahkarachea chollvollint vantto ghetlo mhunn porot 1921 vorsak taka attok zali. Punn eka vorsa uprant taka prezantlo sodlo. 1923 vorsak Dil'lik khaxelea kongres odhivexonacho to odhyokx zalo. 1930 vorsa taka porthun bondkhonnint ghalo. 1930-31 hea don vorsant kaim Musolman lokani soteagrohant bhag ghetlo, hachem sogllem xrey Azhadak mellta.

1939 te 1946 meren to kongrescho odhyokx aslolo. 1942 vorsak Bharot Choddochea soteagrohavellar taka porot bondkhonnint vochchem poddlem. 1945 vorsak her fuddaream vangdda tachi suttka zali. 1942 chi Krips yeuzonn, 1945 chi Wavhelchi Simla porixod ani 1946 to Brittix montreanchem xixtmonddoll hea prosongantlea sogllea vattaghattint kongres vorvim odhyokx hea natean tannench fuddakar ghetlo. 1947 vorsa svotontrotai mell'llea uprant to kendri montri monddollant ailo ani xikxonn montri mhunn akher meren thoinch urlo. Ek khampo uloupi mhunn tannem nam melloilolem. Tachem Inglish, Urdu, French, Arbi ani Farsi bhaxancher probhutv aslolo. Tannem taitea nemalleantlean, khobro potrantlean sfutt boroup kelem. Urdu bhaxentlo to ek vhoddlea tankicho sahitykar zaun asa. Tachim kaim namnechim urdu pustokam oxim - ‘ Tajkera ’, ‘Gubbare-khatir ’, ‘Kaule-faisal ’, ‘Dastane karbala ’, ‘Majaminne Al Hilal ’, ‘Majaminne Azad ’, ‘ Khutbatem Azad ’, ‘ Insaniyat Mout ke darvaje par ’. Tannem boroil'lo ‘Torzumanul Koran ’ ho Kurannocho urdu onnkar khub lokpriy zalo. ‘India wins freedom' ’ (1959) hem tachem atmocharitr mornnauporant ujvaddak ailem. Hea atmocharitrantlo 30 panancho vantto rajki nodren vadgrost thartolo hea hixoban adinch kaddek kaddun douril'lo. He sombondi prakaxak ani prokaxonache hokk aslolea Moulana Azhad Kalamachea varsadaram'modim vad zalo. Tachim uloupam-i pustoka rupan halinch ujvaddak aileant.

Polleiat बदल

Abul_Kalam_Azad

Chitr Prodorxonn बदल

Sondorbh बदल

"https://gom.wikipedia.org/w/index.php?title=Abul_Kalam_Azad&oldid=198911" चे कडल्यान परतून मेळयलें