Alakshmi
| |
Romi
|
Lokxmichi vhoddli bhoinn. Tika ‘jyexttha’ hem vegllem namv asa. Moharaxttrant tika ‘akkabai’ mhunn vollkhotat. Olkxmi hea utrache orth ji lokxmi nhoi ti oso zata.Kxirsagorachea somudromonthona vellar vikh (kalkutt) bhair sortokoch, punn lokxmichea poilim doreantlean bhair sorli mhunn tika lokxmichi vhoddli bhoinn manpak lagle. Olkxmi mhollear daridry, doiny ani dukhkh. Ti doreantlean bhair yetkoch tinnem vicharolem, ‘hamv khoim ravum?’ tacher devamni tika sanglem, ‘zom-i kellso, kunddo ani kems astat thoim tum ravo.’‘jea ghorant zhogddim, zhuzam, dukhkham hanche rabito asa. Guru devo, soire dhaire ixtt hancho opman zata. Zom-i fott uloitat, zom-i lok ekamekank fottoitat. Zom-i odhrmacheo gozali choltat thointum ravo.’
Kxirsagorache monthon cholta astona olkxmi fattlean lokxmicho zolm' zalo. Tichem vixnnukodden logn tharlem. Vhoddle bhoinnichem logn zalea bogor dhaklechem logn korpak zaina oxem xastrant sangil'lean lokxmichea lognak addmellim ailim. Mhunn devamni olkxmichem logn ud'dalok rixi kodden lailem (podmopurann br. 9.10). Ligpurannant tichem duHsha kodden logn zal'leachem sangla (2.6). Fuddem ud'dalokak ticho sobhavo auddunk naxil'lean to tika soddun gelo. Uprant ti eka pimpllaponda bosun roddpak lagli. Tichem roddop aikun lokxmi, vixnnu soit tika mellpak aili. Lokxmin tika vor dilo ki ‘je konn oxvot'thomullim tuji puza kortole, te girest zatle.’ ten'na saun dor xenvara lokxmi pimpllachea mullant tika mellpak yeta oxem somzotat. Xenvarak sury udeuchem adim kel'li pimpllachi puza lokxmiprod mantat.
He devichem vornnon agom' ani vixnnupurann hatunt melltta. Ti kalli samvlli, tambddea dolleanchi, don bhuzam axil'li, lamb nakachi, thanam ani pott vhodd axil'li. Kakdhvoz dharonn korpi, boila sarkem vhodd tondd axil'li, apnnalea dhuv-putam vangdda asta. San'n hem tichem ayudh. Xitladevinchem svorup kaim toren olkxmi sarkench asta. Hea vornnona kodden zullpi modhyoyugantoli xilpam pollounk mellttat.
Hichi bhomvddi aplea ghoracher yeunchi nhoi mhunn axvin xu.8 mohaukxmiche pujepoilim jyexttha hea namvan tichi puza kortat ani fattlea daran ek vat laun ti ghorachea konxakonoxank bhomvddaun mukhavelea darant haddun uddoitat. Hi tora mhollear olkxmik bhaili vatt dakhoup oso somoz asa. Hachea urfattem vat dakhoun ti ghorant haddop, haka lokxmik bhitor yeupachi vatt dakhoup oxem somzotat. Bongalant axvin umaxek xennachi ‘kxonnika olkxmi’ toyar korun lokxmiurim tichi puza kortat ani uprant visrdon kortat.
Poux punvek puxy nokxotr lagil'lem asta. Tea disa ghorchea dadlean dhovea sasvancho lep laun nhamvchem ani olkxmik ghorantlean bhair dhamvddaun ghalchi oxem dhormogronthamni sanglam.Magir narainn, indr, chondr, brifospoti ani puxy hanchea murtik sorvaxodhiyukt udkan nhann ghalun tanchi puza korchi toxench tea vellar hom' ghalcho oxem mhollam.