Povitr Pustokant Bailanchem Sthan

Povitr Pustokant Bailanchem SthanPovitr Pustokant bhailechem sthan ho amcho mukhel vixoi asa. Povitr Pustokant bhailanchi khobor zaite kodden Vachunk mellta. Ek- ek bhailechi khobor keli zalear, ho obeas fuddem vhorunk zaito vell- khall lagtolo. Povitr Pustokant sogllim mellun 73 pustikam asat. Adlea korarant 27 pustokam aspavleant. Heach karonnak lagon amcho vixoi fokot panch pustokam bhovtonnim bhonvddi martolo.

Povitr Pustok

Povitr Pustok hem Kristi dhormachem mukhel Pustok don bhaganim vanttlam. Poilea bhagak Adlo Korar (Old Testament)ani dusrea bhagak Novo Korar (New Testament) oxem mhonnttat. Adlo korar Jezu ieuncho asa oxi bovixeavanni korta zalear Novo Korar Jezu ieun Jezun kitem kelem hachi khobor sangta.

Pentateuch

Sefer Torah at old Glockengasse Synagogue (reconstruction), Cologne

Utpoti (Genesis), Suttka (Exodus), Levi- Xastr (Leviticus), Lokgonti (Number) ani Dusri Somurt (Deutronomy) him Povitr Pustokantli poilim panch pustikam. Tankam Pentateuch oxem nanv dil’lem asa. Hea pustokak Hebrevanchem pustok oxem mhonnttat. Hea pustokanim Judevanchi chal rit, tanche nem-kaide vachunk melltat. Bhov korun bailanchi protima zannovta. Bhailekn koxe vagoitale, bail mhollear kitem? Hem sogllem chitronn bhes borem hea pustokanim zannovta. Tor atam fuddem heach vixoiiachi zann korun ghevia.

Pentateuch Pustokant

Pentateuch Pustokant bailanchem sthan dadlea poros unnea dorjechem. Bailank chakram poros matxem unchli suvat asli. Bhailecho ghov ticho dhoni. Ticher zai toxi podvi chponk ietali. Bail mhonllear ghorkarachi asopt (property). Utpotichea pustokant amkam Sara ani Abrahamak ‘mhozo dhoni’ oxem mhonnta (Gen 18: 12) bailen ghorkarak manan lekhpak zai aslem. Ghorkarak toxem korchem poddonaslem. Ghov bailek ek vost koxi vaportalo. Apleak zai toxi tika vagoitalo. Bail dadleachea hatant ek bavli koxi. Bavlek such-dukh asonam toxench aplee bailechem sukh-dukh dadleak poddon vochunk naslem.

Bailen aplea ghorkarak visvaxi ravunk zai aslem. Zorui bailen dusrea konnai kodden lingik bhog ghetlo zalear moronn tichi vat polloitalem. Ghorkara vixim toxem naslem. Tannem konnui ankvar cholie kodden kuddicho sombond zoddum ietalo. Tannem nirmonnponna vixim khoinchoch kaido par korum ietalo. Kaido taka kainch vaitt korinaslo. Hech sombodim Utpotichea pustokant Judev patxaiachi khobor mellta. To logn zal’lo tori astana naikini borobor kuddicho bhog ghetalo. Taka kaideachi savlli pasun kainch vaitt korunk xokonasli. Kosloch porinnam tacher zaunk na. tachi randd sun jed’nam gurvar zali tednam tika ujeant bhazun marchi mhonn Judevan hukum dilo. Dadleak zai toxem jivit zogpak zata zalear bailek oxem kiteak korop? Ti osokt mhonn ticho faido ghevop hem sarkem asa?

Moizesache chali pormonnem ghovan aple bailek logn moddnem potr diun tika soddum ieta. Ghovalo ho hok’k also. Bailen toxem korunk zai naslem. Apleak kitem-I tras zalear pasun moneanim sospak zai aslem. Dadleak eka poros chodd baileo asum ietaleo. Bailek mat ekuch ghov. Solomon razak 700 baileo asleo. Oxe toren raza- patxaiank eka poros chodd baileo astaleo. Bailen somzum-ia, “hanv oxem kortoli vo toxem kortoli” oso soput ghetlo zalear ton soput ghorkarachean rodh’d (null) korunk zatalo. Ghorkarak zor ho soput mania zalo zalearuch ho soput pallunk zatalo na tor to soput konxak poddttalo. (Num: 30: 6-8) ankvar choliek pasun toxench tika bapaichi maniatai zai poddttali. Bapui sangta te khorem.Choliechea soputak kainch valor asonaslo (num 30: 3-5) bapaik apli choli chakorn koxi vikunk sotea asli. Ek vost koxi ticho vapor korun apleak poixe mellovop. Hem anik koslem monisponn? (Exodus 21: 7)

Eka ghorkarak dislem apli bail dusrea kodden sombond dovorta, oxi, tannem tika iadnika fuddeant vhorun tichi topasnni korunk dadleak sotea asli. Lokgontichem pustok hacher uzvadd ghalta. Ostoren zor logna bhair sombond dovorla mhonn ghovak dubav lagot zalear ho dubav pois korpa khatir iadnik ek Judevanchi rit choloitalo. Iadnik bailek xirapachem udok pivonk ditalo. Bailen somoz pordvar korunk na zalear tika kainch vaitt zainaslem. Somoz tinnem pordvar kela zalear bailechem ling-sandhe sukun vochum ani tichem pott fungum mhonn xirap lagtalo. Osli sonvoi fokot bail pordvarant asat mhonnpacho dubav asa zalear lagu zatalo. Ho dubav somzum-ia bailek ghova vixim also zalear tichea taka kanch korunk zainaslem. Dadleak osli rit nasli. Hacho somoz oso zalo dadlean kitem-I korum ieta. Apunn patkant asun pasun tannem aplea bailechea patkank xikxa dium ietali bailek kaidea neman bandun dovril’li. Zaite pautt ghov aple bailek gorje bhair dubavun tici porikxa ghetalo. Bhail zor guneavkar mhonn sid’dh zali zalear tika khast bhogchi poddttali. Ghovan oslea vellar bailek marpachem formonn magum ietalem. Tech borobor tiche sangata patok adarlam takai mornnachi xikxa magunk zatali.

Dusri Somurth hea pustokant (Deut: 22: 23- 27) amkam oxem vachunk mellta. “zor tor xarant el ankvar choliecher bolotkar zala zalear tika moronn favo zatalem”. Hachem karonn mhonnlear tinne xarant bovall marun lokank ekttaim korunk zatalem, pun tinnem toxem korunk na. zor somzum-ia konn eklean ankvar choliecher bolotkar kela zalear taka khas lagonasli. Tanne nema pormonnem choliechea bapik poixe diunk zai asle ani cholie kodden logn zaunk zatalem. Hem logn choli nhoikarunk xokonaslifokot choliecho bapui naka zalear nhoikartalo. Choliek ho tharav ghevunk mellonaslo.

Jen’na eke bailechon ghov sompta ten’na te bailen ghovache bhav kodden logn zavpak zai. Tika ghorkarachea bhava kodden logn zavpak naka zalear pasun tinnem logn svikarchem podttalem. Ghovachea bhavak sotea asli apleak zai zalear tiche kodden log zavpak to magir apli sotea vaprun logn zaunk tharav ghetalo. (Levirate Marrieage). Bailechea nanvar aspoti ken’nach asonasli. Ticho ghorkar melo zalear pasun tika aspot mellonasli. Ghovachi asop choleachea nanvar zatali. Vattni zatat ten’na poilea choleak don vantte melltale. Choliek vantto mellonaslo. Aplea bapaik chalo bhurgo na zalear hi asop choliechea nanvar zatali. Zor somzum-ia dadlo bhurgim nastanam melo zalear asopti bailek mellche suvater ghorkarachea lagxil’lea soireak favo zatali. Bail mhonnlear kainch nhoi oxem disun yeta. Bailen magir aplem jivit koxem cholovop tor? Apli khaxachi asopt Pasun tika mellona. Dadleak somoz xembor rupeacho valor also zalear bailek pon’nas rupeancho valor also. (Lev 27: 3-5) oxem astana bailen zaito vavr korcho pod’ttalo. Ghorkara poros chodd kottin vavr korcho also. Bailen sodanch aplea ghovachi lingik tan-bhuk bhagovunk zai asli. Ghorkarache khuxe pormonnem tinnem taka dhadoxikorcho pod’ttalo. Urfattem bailek toxem korunk mellonaslem. Tinne lingik tan bhukechem tollmolle sonslear zatat. Ghoval jen’na torah mhonnllear dhormachea pustoka vixim xikunk zai zatalem ten’nam tin vorsam pasun bhair urtalo. Oxea vellar bailechi porvangi taka lagonasli. Tin vorsam bailen gova borobor kuddichea ekvottvinnem ravchem pod’ttalem. Bailen taka somzun gheuncho pod’ttalo. Bailek konnuch somzonaslo.

Ek logn zal’le bailecher somoz bolatkar zalo zalear ticho ghorkar tiche lagim ken’nach kuddicho sombond zoddinaslo. Ek pautt ti boxtt zali mhonnttokuch ti sodanch boxtt. Tika ek randd bail koxo zogchi pod’ttali. Tichea ghorkarak kaido also tinne tichem udar-posonn mhonllear jevonn, kopdde ani vevastha korchi podt’tali. Tiche chukik bhogsonnem naslem.Soglle jivit bhor tika prachit korchem podt’talem. Bailek jen’nam mhoineachem zata ten’na tika oxu’dh lekhtale. Sat dis pasun tika ghorkara pasun veglli ravchi podt’tali. Ti khoinchech vostuk hat lait ti vost oxu’dh zatali (Lev 15: 19-23) ek ostori bhurgeak zolm dita ten’na ti oxu’dh zatali. Somoz tinnem choleak zolm dilo zalear ti 40 dis oxu’dh urtali ani somoz choliek zolm dilo zalear 80 dis oxu’dh zatali. Hanga amkam vegllemponn zannovta. Dadleak xembor rupeacho valor zalear bailank vo choliank pon’nas rupiancho valor. Hem oxem kiteak? Hea vicharak zap mellunk kottinn. Dadleanim kel’leo chali riti teo,dadleak zai toxem zatalem. Taka ani konnem prosnn korunk zatalo?

Anik ek khub mhotvachi vost amkam zannovta. Hebrevancho dhorm dadleanim ghoddoil’lo dhorm also. Devan mogacho korar fokot Abramalagim kel’lo taka lagun bailank dhormant manacho zago naslo. Dadle aple circum-sezint kortale ani te Devak bhetlele zatale. Bailank toxem naslem. Devak hom bhettovonk ani Devachea tombunt vochunk fokot dadleak porvangi asli. Bailo Dev mondirant mondirant vetat ten’na taka unnea molachi suvat astali. Dhorm fuddari astale te bailank ken’nach ollkhi nasle, taka ken’nach zap pasun korinasle. Tannim bailanim dadlea borabor jevonn jevunk zainaslem. Tannin bhouxik bhouxikzagear astana aplem tondd dampunk zai aslem.Tannim aplem xorir sarkem bond korunk na zalear tanchea odhikaran tankam logn moddnea potr diun soddum ietalem. Tim jen’na Dev mondirant astalim ten’na komich- komi dha dadle asunk zai asle. Baileo somzum-ia hozar pasun aslear tankam prarthna cholounk mellonaslem. Oxe toren dadle khub mhotvache ani baileo unnea molacheo oxem lekhtale.

Raza- patxai lok meznni (census) korunk laita ten’na lok meznni zatali. Lokank meztat ten’na dadleanchi meznni zatali,bailek mezpachi chal nasli. Bail asli vo nasli ek sarkem koxem lekhtale . nyaylaiant (court) bailen govai diunk zai nasli . tiche govaikek mhotv asonaslem . eka dadleak guneavkar tharaitale zalear don dadleanchi goroz asli. Oxem korun ek- ek dadleak don- don ddale lagtale. Bailam vixim toxem nhoi. Don dadleanim hozar bailank guneavkar tharaunk zatalem. Dadleanche govaikek valor astalo. Judev dadleank aplea dhorma vixim vhoddponn aslem. Apunuch Devachi mogachi porza koxi te mantale. Devak te chukoinastanam argam vomptalem. Tanchea Devak oxem prarthon te kortale. “Deva, mhakaJudev dadlo rochlo dekhun tuka argam, tuvem mhaka bhairail’lo (Gentile) na mhonn chakor vo bhail rochunk na “gentile, chakor ani bail mhonnllear Judevank ek kantallo, Deva mukhar apunnuch satvik mhonn te somzotale.

Somarop

Atam pasun ami Pentateuch pustokant dadlo bailek koso vagoita ani bail moneanim sosun gheta hem ami zannun ghetlem. Hem Adlea Korarantlem dhoronn Novea Korarant Jezu, ek- ek korun sovkas- sovkas bodolta. Jezun kaideank nhoi punn mon’xachea monisponnak odhik mhotv dilem. Bailanchem sthan jem dadleanim kaideachem cheponn ghalun dovril’lem tem cheponn Jezu unchlea sthanar pavoita. Pordvarant sampodleli ostori hachi govai zata. Toxench Jezu borobor bailo pattlavdar zatat. Bailank to xikvonn dita, bailank To kuddichi pekovnni dita, oxe toren zaitim boremponna Jezu korta. Hachi khobor ami vistaran keli zalear amka anik vell-kall zai hacher ami fuddle pautt zannvikai ghevum ieta.