Vidhva

देवनागरी

Romi

Vidhva bail hi ek ghov naxil’li veakti. Ti somazacho ek bhag. Vidhva bailek zaite prosong sotaitat. Dhorm tori tiche dukh omzun gheta hoi? Sonvsarant kitlech dhorm asat. Sonkheient vhodd axil’lea dhormachi nodor tanche vixim kitem kaim? Dhorm tanche prosnn suttoita vo tache prosnn ghuspaita? Dhorm tachea ghaiank molom laita vo tachea ghaiar mitt ghalta? Dhorm tachi ufollnim korta vo tacher cheponn ghalta? Oslea prosnnak fuddem zap sodum-ia. Dhormachim bondhona ani dhormak lagon somazache chali riticher vhodd cheponn poddta oxm amkam zannovta. Hech nodretlean ho lekh vinnlolo asa.

Vidhve vixim somoz

Ghov melo mhonnttokuch bail vidhva zata. Bail vidhva zali mhonnttokuch ti konnak naka. Ghovachea mornnant sogllim natim foddant denvtat. Ghov morop vo jito urop hem tichea hatant nasta tori ghor bhor tika kopol futtki mhonn pavlam konkonnim hinnsaitat. Bhov korun ghov tornne pirayecher melo zalear odik tollmolle bhogche poddtat. Tichem jivit bharadik zaunk pavta. Water hea cinemant Modhu didi hem patr oxem mhonntta “jab pati marta hai to patni adi marti hai!” hea cinemant vidhva bailancher kholaien uzvadd ghatla. He sombodint N. D. Borkar bimb masikant vidhva vixim boroitana oxem mhonntta. “ti (vidhva)kitlii bhurgi asum, kitlii xikil’li asum, kitlii sundor asum, her bailam mukhar tichi suvat gounnuch. Ticher nodor poddli mhonnttokuch purai somazache dolle tirxe ani varxe zatat. Tonddacher kallokh poddta.” (Bimb Masik, March 2013, pan 34)

Sonkhia xastr

Eka vorsak sumar sat lakh bailo vidhva zatat ani chouda vorsa pasun zogtat, oso sod U.S Bureau hachi sonkhia xastr nond korta. (U.S Bureau of the census 1999) heach vorsa dadlea randdam poros vidhva bailancho ankddo char favtti odik, mhonnllear 8.4. million vidva bailo zalear 1.9 million dadle randd astat, oxem AARP nond kortat. U.S. census 200 hachea soda pormonnem 55 vorsa ani odik pirayecheo vidhva baileo 32% asat zalear dadle randd hech pirayeche fokot 9% asat. Bharotant vidhva bailecho ankddo 34 million asa oxem amkam Native Widows In India hanche sonkhia xastr sagta fuddem tanchi oxi sagnni asa: vidhva sonkhia xastr ghetli zalear Bharotacho poilo krom (1st rank) lagta.

Kristanv Dhorm

Akhia sonvsarant Kristanv dhormachi sonkhia khub vhodd asa. Tanchem Povitr Pustok vidhva bailam vixim kitem xikvonn dita kai? Povittr Pustok don bhaganim vanttlam, Adlo Korar ani Novo Korar. Adlo Korar vidhva bailek oniai korta tem disun yeta. Utpotichem Pustok 38:8 “Judan ten’na ierachea bhavak onak mhonnle, “chol, tujea somplolea bhavache bailek lagim ekvott kor tichea poticho bhav koso ho kaido tichem sovem pall ani tujea bhavak sonsot utpon kor.” Vidhva mhonnllear mel’lea bhavachi mhalmata (property) oxem Judev lok somzotale. Bhava kodden logn zaum-chea vellar tichi manyatai lagonasli. Hi chal azun pasun Israel-ant chalik asa. Ghovacho bhav somoz pirayen lhan aslo zalear to voiar ie meren tinnem ravonk zai aslem. Ghorkar meea uprant tanchi girestkai tankam mellonasli. Ghovachi girestkai dadleak soireak pavtali, ho magir tichem udar posonn polloitalo. Vidhva bailek ek vost zal’lea bhaxen lekhop ani tichea moneaponnacho faido ghevop. Tika somazache degek axil’lea bhaxen lektale. Judevanche chali pormonnem ek bil tin pautt vidhva zalear tika prann ghatki (fatal) koxi mandtale ani tichean anik logn zaunk zainaslem. Mhaiadnik logn zata ten’na to apleach kullantlea ankvar cheddva lagim tannem logn zaumchem. Ghov mel’le vo ghovan soddlole baile kodden vo bhaddeak bhonvta tosle konn nhoi oxem levi xastrachem pustok nod korta. (Lev. 29: 13) hi chal Israel-ant kohin zat samballta. Novo Korar vidhva bailek doiall nodren polloita. Bhagevont Paulo Timotak borovn poile chittint sondex dita. “konn na tea vidhvank manan vagoi” (1Tim. 5:3) toxench Dhorm Dutanchea Itihasant oxem vachunk mellta. “kiteak dispot’tem jevonn vaddtana tanchea vidhvanchi favo te fikrin seva zainasli……. Tea pasot tumi sat dadleank vinchun kaddat tanchi seva korunk.” (D.I 6: 1-7) oxe toren vidhva bailek zaitem boremponn mel’llem.

Islam Dhorm

Arab lok Islam dhorm pallche poilim, tanchi chall asli ti mhonnllear “ghovache vhoddlea cholean vidhve kodden logn zaunk zai aslem. Ho chalo ticho nhoi ghovache dusre bailecho” Qurann hi osli noxti chal pois dovorta. “tuzo bapui logn zal’le baile kodden tuvem logn zaum-chem nhoi, oxem korop mhonnllear ek kantallo vo lojechi gozal” (Quran 4:22) Qurannant oxem boroil’lem vachunk mellta. “ghorkar melea uprant bailen char mhoine ani dha dis ravpak zai oxem kelear ghovacher koslench vaitt ieunchem na” (Quran 22: 34) fuddem oxem boroil’lem asa. “zor tor ghorkar melo zalear vidhva bailek ek vorsachem udar posonn favo zaunk zai toxench ravpachi sovlot mellunk zai (Quran 2: 240)” Quranna pormonnem vidhva bailek zaitem boremponn favo zata, tika portun logn zaupak mellta tem borem asa tech borabor tichi ukolnni kel’li dista.

Hindu Dhorm ani Chali Riti

Hindu dhormant eke vatten bailek devi koxi puztat, tika paiam poddtat ani hatui zoddtat. Zalear dusre vatten tika vostu saman lekhtat, Bhagvat Gitant oxem vachunk mellta. “where women is respected there the God reside” anik eke kodden oxein boroilam, “women are like sudras, low in birth” tinnem adlea jivitant patok adarlam dekhun tika hem bhogchem poddta. Vishnnusmurti hea pustokant oxem nod kel’lem asa. “eke bhailecho ghov melo zalear tinnem nirmoll ani Povitr jivit zogunk zai na zalear ghova borabor uddi marun morunk zai. (Vishnnusmurthi- XXV: 14) ghov mel’le bailek dolldir mhonn lekhtat (bad women) tinnem dhormik ritini vantto gheunk zaina, tambddem nhesunk zaina, mas khaunk zaina, kaknnam foddop, bindi kaddop, dhovem nhesop, hech vixm N. D. Borkar oxem boroita. “vidhven fullam mallunk zaina, tinne koplak kukum launk zaina, bori kapddam nhesun nettunk zaina, porpuruxa kodden ulounk zaina, char choungam modem utt bos korunk zaina, dhorma karyank vantto gheunk zaina,tulsi kodden ani devariatlea Deva kodden divo vo vat launk zaina, Dev karia khatir fulam toddunk zaina, porsant ollmi aili zalear taka afddunk zaina toxem kelear zomin padd poddta ani fuddem ollmi ieupachem bond zata (Bimb Masik March 2013, pan 35) hi volleri itlean sompona toch borovpi he osle sotavnnechi lamb volleri korta. Eke vidhve baile kodden ulounk mhonnllear pasun patok. Heach vixim water cinemantli Kalyanni (vidhva) aplea lagim ulounk sodtolea Narayannak sangta. “pap lagega” teach cinemant chirya (bhurgem vidva) ‘sweets’ gheupak veta ten’na taka vikhpi mhonnta “vidhva kabse sweets khane lagi?” vidhve bailen koxem kitem korunk zai tem somaz tankam xikoitalo. Hem somazachem xikovop dhormik pustokancher adarit asta. Oslem chitrann hea cinemant dakhoilam.”

Xevott

Hea lekhant ami kheritponnim vidhva bailecher dhormik nodretlean ek dhanvti nodor marlea. Kristanv dhormachem Povitr Pustok usoitanam amkam ek vost zannovlea, Adlo Korar vidhva bailek piddapidd dita zalear Novo Korar vidhva bailek doiall nodren polloita. Novea Korarachea uzvaddan “Naomis grace” ho pogodd oslea vidhvacheam boreponna khatir vavr kortat toxench ani her dhormik pongodd oslo kurpecho vavr kortat. Islam dhorm tor vidhva bailecher cheponn ghatil’lem disna. Hindu dhormant zaiteo chali riti asat. Teo vidhvache prosnn vaddoitat.