Shri Mangesh Devastan

देवनागरी

Romi

Shri Mangesh Devastan gõyantolem namnechem deusthan. Hem fonddem talukeantlea Prioll gamvant Ponnji-Moddgamv hea mukel rosteacher Ponnjisaun sumar 21 ki.mi. ontracher asa. Hem devull jea vattharant asa, tea vattharak mongexi mhunn vollkhotat.

Shri Mangesh Devastan, Prioll.

Itihas

Purvil'lea kallant hem devull Saxtti talukeachea Kuxstholli va Kutthtthalli hea vattharant axil'lem.

Porxuraman gomontokant vosoupakhatir Trihotr purasaun doxgotri brahmonn ani tanchi 64 kullam haddlim mhonnttat. Hea kullamni Mongexi, Xantadurga, Nagex, Mohalkxmi, Soptokottexrvor, Mohalosa adi aplea kuldeutancheo protimai haddun Gõyant sthapon keleo. Tatuntolem Mongex doivt mull Kuxstholli hangam sthapon kel'lem.

Scan of a wallet card depicting Shri Mangesh

Fuddem i.So.1510t Gõyacher Purtugezanchi sot'ta yetkoch tamnnim hanga Hindu dhormiancho chholl, battabatti, devaloyancho vidhvoms korpachem sotr choloilem. Jen'na Kuxsthollichea Xri Mongex deusthanachea kullavi lokank khubor koll'lli ki Purtugezamni saxtti talukeantlea lokank battoun thoinchea devaloyancho nax korpacho kottrochola, ten'na tamnni ratorat gupitonnan Mongex devachem ling ukhlun xezarchea adiloxohachea rajeant zom-i Hindu sordar tevellar odhikaracher axil'le, thoim fonddem talukeachea prioll gamvant vhorun sthapon kelem.

Sthapna

Hi sthapna xalivahon xoke 1482 roudr nam' somvtsori mhollear i.So. 1560 vorsa zali oxi mhaiti tea deusthanachea purvil'lea itihasant melltta.

Hem stholantor 1me 1560 hea disa adi zalem oxem kompaji-i de Jhezhuschea padri monddllan tea kallant boroun douril'lea ani aplea vorixtthank sador kel'lea ohvalant boroil'lem asa.

Stholantorak lagun hea devaloyachi imarot tea Jhezhuitt padrimni aple chorchikhatir vaproli ani aplea dhormacheo deuta thoim sthapon keleo osoi tatunt ul'lekh melltta.

Prioll vattharant

Kuxstholla saun Prioll vattharant stholantor kortokoch thoim bandil'lem devull koxem axil'lem hachovixim mhaiti mellna.

Uprantochem dusrem devaloi Moratthexahichea voibhou kallant bandil'lem. Tacheuporant i.So.1890 to teach zagear tisre khepek devull handlem.

Chouthe khepe hea deulacho jirnnodhdar xoke 1894 magh xukl punvent purai zalom ani teach disa sumhurtacher 17 Februvari 1973 disa Xri Mongex devachea devaloyacher bhangracho kolos bosoilo. Dor vorsa hea devaloyant magh xukl punve disa mohaprvonni utsou monoitat.

Xibikotsou

Hea devasthanant dor somara ratcho xibikotsou zata.

Hea devasthanache kulavi Vats ani Kandinea hea donuch asAat. Hea devasthanat agrasohalachi sai aasa.